ខេត្តបន្ទាយមានជ័យ ៖ ស្ត្រីមានផ្ទៃពោះម្នាក់បានស្លាប់ នៅក្នុងមន្ទីរពេទ្យបង្អែកក្រុងប៉ោយប៉ែត ខណៈទៅសម្រាលកូននៅទីនោះ ។ បន្ទាប់ពីមរណភាពរបស់ស្ត្រីរងគ្រោះ គ្រួសារបានចោទប្រកាន់ថា ករណីនេះបណ្តាលមកពីខ្វះការយកចិត្តទុកដាក់ពីគ្រូពេទ្យប្រចាំការ ឯប្រធានមន្ទីរពេទ្យបានបដិសេធការចោទប្រកាន់នោះដោយអះអាងថា…
ខេត្តបន្ទាយមានជ័យ ៖ ស្ត្រីមានផ្ទៃពោះម្នាក់បានស្លាប់ នៅក្នុងមន្ទីរពេទ្យបង្អែកក្រុងប៉ោយប៉ែត ខណៈទៅសម្រាលកូននៅទីនោះ ។ បន្ទាប់ពីមរណភាពរបស់ស្ត្រីរងគ្រោះ គ្រួសារបានចោទប្រកាន់ថា ករណីនេះបណ្តាលមកពីខ្វះការយកចិត្តទុកដាក់ពីគ្រូពេទ្យប្រចាំការ ឯប្រធានមន្ទីរពេទ្យបានបដិសេធការចោទប្រកាន់នោះដោយអះអាងថា ស្លាប់ដោយសារទឹកភ្លោះបែកហូរចូលសួតមិនអាចសង្គ្រោះបាន ។
ការបែកធ្លាយនូវរឿងរ៉ាវនេះ បានកើតឡើងកាលពីវេលាម៉ោងជាង១រំលងអធ្រាត្រឈានចូលថ្ងៃទី២៦ ខែមីនា នៅក្នុងមន្ទីរពេទ្យបង្អែកក្រុងប៉ោយប៉ែត ។ ស្ត្រីរងគ្រោះឈ្មោះ ស៊ុក ឡៃ អាយុ៤៤ឆ្នាំ ជាកម្មករស៊ីឈ្នួលកោសសាច់ត្រី និងលើកដាក់សត្វល្អិតឱ្យថៃ នៅផ្សាររុងក្លឿ ស្រុកអារញ្ញ និងមានទីលំនៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ។ ក្រៅពីស្ត្រីជាម្តាយទារក ដែលនៅក្នុងផ្ទៃមិនទាន់នឹងឃើញពន្លឺថ្ងៃផង ក៏បានស្លាប់ទៅតាមម្តាយដែរ ។
ជួបសម្ភាសន៍ផ្ទាល់ជាមួយឈ្មោះ ស៊ុក ចិត្រា ភេទប្រុស អាយុ២៣ឆ្នាំ ជាកូនទី២នៃគ្រួសាររងគ្រោះបានប្រាប់ឱ្យដឹងថា នៅម៉ោងប្រហែលជិត៩យប់ ថ្ងៃទី២៥ ខែមីនា ខ្លួនជាមួយប្អូនប្រុសម្នាក់ទៀតឈ្មោះ ស៊ុក ចិន្តា អាយុ១៥ឆ្នាំ បាននាំម្តាយទៅកាន់មន្ទីរពេទ្យ ខណៈគាត់ឈឺពោះសម្រាលកូន ។ យុវជនជាកូនបានបន្តថា ពេលទៅដល់មន្ទីរពេទ្យមានស្ត្រីម្នាក់បានមកសួរនាំ និងបានបង្គាប់ឱ្យម្តាយខ្លួនដើរទៅវិញទៅមកដោយប្រាប់ថា ស្បូនទើបនឹងបើកតិច ។ លុះម្តាយខ្លួនដើរទៅមកក្នុងមន្ទីរពេទ្យរហូតម៉ោងជិត១ទៀបភ្លឺ ក៏ដើរមកកាន់គ្រែសម្រាកវិញ ហើយនិយាយថា គាត់វិលមុខខ្លាំងណាស់ ក៏ទម្រេតខ្លួនសម្រាកទៅ ។
រីឯបុរសឈ្មោះ សុខ ចាន់ណា អាយុ៤៤ឆ្នាំ ជាប្តីបានប្រាប់ថា គាត់ទៅតាមក្រោយកូនៗ ដែលនាំម្តាយគេទៅមន្ទីរពេទ្យ។ គាត់ថា មុនពេលប្រពន្ធគាត់ស្លាប់ នៅលើផ្ទៃមុខនិងកឡើងមានស្នាមជាំខ្មៅ ។ឃើញសភាពបែបមិនស្រួល គាត់ក៏បានឱ្យកូនទៅហៅគ្រូពេទ្យប្រចាំការ ដោយសារគាត់ភ័យព្រោះឃើញប្រពន្ធដកចង្កាមាន់ទៅហើយ ក៏ខំរឹតទ្រូងធ្វើចលនាឱ្យ ។ បុរសជាប្តីបន្តថា ខណៈគ្រូពេទ្យស្រីម្នាក់មកដល់ក៏យកប្រង់ការអូសប្រពន្ធគាត់ទៅបន្ទប់សង្គ្រោះ និងដាក់ខ្យល់អុកស៊ីសែន ប៉ុន្តែប្រពន្ធគាត់បានស្លាប់បាត់ទៅហើយ ។គ្រួសាររងគ្រោះនិងក្រុមសាច់ញាតិបានសម្តែងការសោកស្តាយដោយនិយាយថា ករណីខាងលើគួរតែស្លាប់ម្តាយម្នាក់បានហើយ មិនគួរគេបណ្តោយឱ្យស្លាប់ដល់កូនក្នុងផ្ទៃម្នាក់ទៀតទេ ។
ជុំវិញករណីចោទប្រកាន់នេះ លោកវេជ្ជបណ្ឌិត ហ៊ុល សុផល្លី ប្រធានមន្ទីរពេទ្យបង្អែកក្រុងប៉ោយប៉ែត បានបដិសេធដោយបញ្ជាក់ថា ការពិតស្ត្រីរងគ្រោះស្លាប់ដោយសារទឹកភ្លោះបែកហូរចូលសួត ខណៈស្បូនទើបបើកបានតែ២សង់ទីម៉ែត្រ ។ លោកវេជ្ជបណ្ឌិតបន្តថា ការសម្រាលកូនបានសម្រាប់ស្ត្រីគ្រប់រូបដរាបណាស្បូនបើកបាន១០សង់ទីម៉ែត្រទើបកើតបាន ។អ្នកគ្រូពេទ្យប្រចាំការនៅយប់កើតហេតុនោះឈ្មោះ ឡាយ អុីជួង បានបដិសេធមិនបំភ្លឺនោះទេដោយប្រាប់ថា គាត់បានធ្វើរបាយការណ៍ឱ្យប្រធានមន្ទីរពេទ្យនិងប្រធានមន្ទីរសុខាភិបាលរួចហើយ ។ ដោយឡែកប្រភពពីវេជ្ជបណ្ឌិតម្នាក់សុំមិនបញ្ចេញឈ្មោះប្រាប់តាមទូរស័ព្ទថា ស្ត្រីខាងលើកើតជំងឺអំភ្លីអាមីញ៉ូទិច គឺជំងឺបែកទឹកភ្លោះមុនបើកស្បូន ។
លោកបន្តថា ជំងឺនេះបើកើតឡើងហើយ អ្នកជំងឺ១០០នាក់ ស្លាប់ទាំង១០០នាក់ទោះទៅគ្រូពេទ្យប្រទេសណាក៏មិនអាចជួយបានឡើយ ប៉ុន្តែវាមិនសូវកើតមានទេ ។ ទោះបីជាបែបណា តើនរណាជាអ្នកដឹងថា ស្ត្រីដែលមកសម្រាលកូនហើយមានជំងឺដែលគេចពីស្លាប់មិនបាននេះ ។ បើដឹងថា មានជំងឺនេះគួររកវិធីសង្គ្រោះទារកក្នុងផ្ទៃ មិនមែនបណ្តោយឱ្យពេទ្យប្រចាំការម្នាក់ទទួលខុសត្រូវនោះទេ ៕
ចែករំលែកព័តមាននេះ