រាជធានីភ្នំពេញ ៖ ថ្នាក់ដឹកនាំគណបក្សប្រជាធិបតេយ្យមូលដ្ឋាន ឬហៅកាត់ថា (GDP) បានប្រកាសចូលរួមប្រកួតប្រជែងការបោះឆ្នោតជ្រើសតាំងសមាជិករដ្ឋសភាដែលនឹងប្រព្រឹត្តទៅនាខែកក្កដា ឆ្នាំ២០១៨ ខាងមុខនេះ ដោយគណបក្សនឹងធ្វើការកសាងសមត្ថភាព និងគុណភាព…
រាជធានីភ្នំពេញ ៖ ថ្នាក់ដឹកនាំគណបក្សប្រជាធិបតេយ្យមូលដ្ឋាន ឬហៅកាត់ថា (GDP) បានប្រកាសចូលរួមប្រកួតប្រជែងការបោះឆ្នោតជ្រើសតាំងសមាជិករដ្ឋសភាដែលនឹងប្រព្រឹត្តទៅនាខែកក្កដា ឆ្នាំ២០១៨ ខាងមុខនេះ ដោយគណបក្សនឹងធ្វើការកសាងសមត្ថភាព និងគុណភាព ដើម្បីបង្ហាញថា គណបក្សប្រជាធិបតេយ្យមូលដ្ឋាន «ជាជម្រើសថ្មី និងជាក្តីសង្ឃឹមរបស់ប្រជាពលរដ្ឋខ្មែរគ្រប់រូប» តែយ៉ាងណាមិញមេដឹកនាំគណបក្សមិនទាន់បានបញ្ជាក់ច្បាស់ថានឹងមានបេក្ខជនឈរឈ្មោះនៅមណ្ឌលរាជធានី ឬខេត្ត-ក្រុងប៉ុន្មាននៅឡើយទេ ។
លោក បណ្ឌិត យ៉ង សាំកុមារ ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋានបានលើកឡើងតាមរយៈវីដេអូឃ្លីបបង្ហោះក្នុងបណ្តាញសង្គមហ្វេសប៊ុកថ្មីៗនេះថា ៖ «ប្រជាពលរដ្ឋកាន់តែច្រើន បានចាប់អារម្មណ៍លើគណបក្សប្រជាធិបតេយ្យមូលដ្ឋាន» ។ លោកបានឲ្យដឹងថា គណបក្សនេះបានកើតឡើងកាលពីខែសីហា ឆ្នាំ២០១៥ ក្រោមការជ្រោមជ្រែងពីក្រុមបណ្ឌិតមួយចំនួនរួមទាំង លោកបណ្ឌិត កែម ឡីផង ។ លោកបានបន្តទៀតថា គណបក្សប្រជាធិបតេយ្យមូលដ្ឋានកន្លងមកបានចូលរួមសកម្មភាពនយោបាយក្នុងការបោះឆ្នោតឃុំ-សង្កាត់ឆ្នាំ២០១៧ បានទទួលសម្លេង៣ឃុំ ស្មើនឹង៥អាសនៈ ។ សមាជិកក្រុមប្រឹក្សាឃុំសង្កាត់កំពុងបំពេញការងារជួយពលរដ្ឋក្នុងមូលដ្ឋាន ។ ក្នុងរយៈពេល២ឆ្នាំនេះ គណបក្សបានកសាងនូវគណបក្សដោយផ្អែកលើមូលដ្ឋាន ដើម្បីបង្ហាញដល់ប្រជាពលរដ្ឋថា គណបក្សរបស់លោកជាជម្រើសថ្មីសម្រាប់ពលរដ្ឋគ្រប់រូប ។ លោកបានអះអាងថា គោលនយោបាយ របស់គណបក្ស (គ.ប.ម) ដែលគណបក្សកំពុងកសាងទី១ – គុណតម្លៃ ទី២- មានគោលការណ៍ ទី៣-មានគោលបំណងវែងឆ្ងាយ និងទី៤- គោលនយោបាយ ។
ចំពោះគោលនយោបាយមានចំណុចចំនួន៥ ដែលបានផ្តោតលើវិស័យសំខាន់ៗដែលទាក់ទងនឹងជីវិភាពរស់នៅរបស់ប្រជាពលរដ្ឋប្រចាំថ្ងៃ ។ កាលពីចុងខែកុម្ភៈ ២០១៨ (គ.ប.ម) នេះកម្មវិធីផ្សាយផ្ទាល់ពីកម្មវិធីសមាជបោះឆ្នោតជ្រើសរើសលេខរៀងបេក្ខជន តំណាងរាស្ត្ររបស់គណបក្សប្រជាធិបតេយ្យមូលដ្ឋានប្រចាំមណ្ឌលភ្នំពេញ ដើម្បីត្រៀមចូលរួមបោះឆ្នោតជាតិខាងមុខ ។ អ្នកចូលរួមប្រហែល១០នាក់មកពីភ្នំពេញ កំពង់ស្ពឺ កំពតតាកែវ ស្វាយរៀង ត្បូងឃ្មុំ កំពង់ចាម កំពង់ឆ្នាំង រតនគីរី បន្ទាយមានជ័យ សៀមរាប និងកំពង់ធំ ។ នៅក្នុងសមាជគណបក្សមន្ត្រី (គ.ប.ម) បានលើកឡើងថា នេះសមាជប្រវត្តិសាស្ត្រមួយរបស់គណបក្សសម្រាប់ការបោះឆ្នោតជ្រើសរើសបេក្ខជននៅភ្នំពេញ និងនៅតាមបណ្តាខេត្តមួយចំនួនទៀត ។ គណបក្សប្រជាធិបតេយ្យមូលដ្ឋាន បានធ្វើសមាជជ្រើសរើសលំដាប់លេខរៀងបេក្ខជនតំណាងរាស្ត្រក្នុងបញ្ជីបេក្ខជនសម្រាប់ឈរឈ្មោះ បោះឆ្នោតតំណាងរាស្ត្រ មណ្ឌលរាជធានីភ្នំពេញ នៅព្រឹកថ្ងៃទី២៤ ខែកុម្ភៈ ឆ្នាំ២០១៨ នេះ នៅទីស្នាក់ការគណបក្សប្រជាធិបតេយ្យមូលដ្ឋាន នៅក្នុងខណ្ឌសែនសុខ ។
គួរបញ្ជាក់លោក យ៉េង វិរិៈ ប្រធានគណបក្សប្រជាធិបតេយ្យមូលដ្ឋានបានថ្លែងថា សមាជនេះ គឺជាសកម្មភាពថ្មីមួយទៀតដែលគណបក្សប្រជាធិបតេយ្យមូលដ្ឋានបានបង្ហាញឲ្យសមាជិក សមាជិកា និងប្រជាពលរដ្ឋអ្នកគាំទ្រទាំងនៅក្នុងស្រុក និងនៅនាយសមុទ្ររួមទាំងសហគមន៍អន្តរជាតិ បានឃើញពីការអនុវត្តគោលការណ៍ប្រជាធិបតេយ្យផ្ទៃក្នុងបក្ស គោលការណ៍សមាជិកធិបតី គោលការណ៍ប្រជាធិបតេយ្យពីក្រោមពីក្រោមទៅលើ និងទទួលខុសត្រូវពីលើមកក្រោម ។ លោកបន្តថា សមាជនេះជាព្រឹត្តិការណ៍ប្រវត្តិសាស្ត្រ នៅក្នុងប្រវត្តិនយោបាយនៅក្នុងប្រទេសកម្ពុជា ដែលបេក្ខជនតំណាងរាស្ត្រត្រូវបានរើសដោយការបោះឆ្នោត ហើយគណបក្សប្រជាធិបតេយ្យមូលដ្ឋាន និងបង្ហាញឲ្យឃើញអំពីការអនុវត្តតនៅគោលការណ៍សមាជិកធិបតី ។ ហើយការបោះឆ្នោតជ្រើសរើសលំដាប់លេខរៀងបេក្ខជនតំណាងរាស្ត្ររបស់គណបក្សប្រជាធិបតេយ្យមូលដ្ឋានសម្រាប់ដាក់នៅក្នុងបញ្ជីបេក្ខជនតំណាងរាស្ត្រ ដើម្បីឈរឈ្មោះបោះឆ្នោតជ្រើសតាំងតំណាងរាស្ត្រ ។ ហើយនឹងមានការរៀបចំបែបនេះនៅ២៤មណ្ឌលខេត្ត-ក្រុង ។
លោក យ៉េង វិរៈ បានបញ្ជាក់ថា គណបក្សប្រជាធិបតេយ្យមូលដ្ឋានអនុវត្តគោលការណ៍សមាជិកធិបតីគោលការណ៍ប្រជាធិបតេយ្យ ពីក្រោមទៅលើមានន័យថា សមាជិកជាអ្នករើសបេក្ខជនថ្នាក់ដឹកនាំបក្ស និងរើសបេក្ខជនតំណាងរាស្ត្រ បេក្ខជនតំណាងរាស្ត្រជាអ្នករើសបេក្ខជននាយករដ្ឋមន្ត្រី ។ នៅពេលដែលនាយករដ្ឋមន្ត្រីបំពេញការងារត្រូវទទួលខុសត្រូវចំពោះបេក្ខជនតំណាងរាស្ត្រ ហើយបេក្ខជនតំណាងរាស្ត្រត្រូវទទួលខុសត្រូវចំពោះប្រតិភូតំណាងសមាជិក និងប្រជាពលរដ្ឋម្ចាស់ឆ្នោតជ ។
ជាលទ្ធផលលំដាប់លេខរៀងបេក្ខជនតំណាងរាស្ត្រក្នុងបញ្ជីបេក្ខជនរបស់គណបក្សប្រជាធិបតេយ្យមូលដ្ឋាន សម្រាប់ឈរឈ្មោះបោះឆ្នោតជ្រើសតាំងតំណាងរាស្ត្រមណ្ឌលរាជធានីភ្នំពេញ គឺលំដាប់លេខរៀងទី១-លោកសាម អ៊ីន ទី២- លោកខាត សុធី ទី៣- អ្នកស្រី ឡុង កញ្ញា ទី៤- លោកហេង សំអ៊ន ទី៥- លោកសែន ចាន់គ្រី ទី៦- លោកលី សុភ័ក្ត្រ ទី៧- អ្នកស្រី ញ៉ែម ស្រីឌី ទី៨- លោកធួក បូណា ទី៩- លោកលីន គឹមឆែ ទី១០- លោកសេង រង្សី និងទី១១-លោកស៊ាង វ៉ា ។
លោកហង្ស ពុទ្ធាអ្នកនាំពាក្យគណៈកម្មាធិការជាតិរៀបចំការបោះឆ្នោតបានថ្លែងថា គជបនឹង ចាប់ទទួលចុះឈ្មោះគណបក្សនយោបាយ និងបេក្ខជនចូលរួមប្រកួតប្រជែងការបោះឆ្នោតចាប់ពីថ្ងៃទី២៩ ខែមេសា ឆ្នាំ២០១៨ ហើយការចុះឈ្មោះនេះមានរយៈពេល១៥ថ្ងៃ ។ លោកថាគជប មិនទាន់ដឹងថា មានគណបក្សចំនួនប៉ុន្មាននៅឡើយទេនឹងចូលរួម ។ លោកបានលើកឡើងថា គជបនឹងសហការជាមួយស្ថានទូត និងអគ្គកុងស៊ុលកម្ពុជាជូនដំណឹងដល់ពលរដ្ឋខ្មែរនៅបរទេសដែលបានចុះឈ្មោះបោះឆ្នោត មកបោះឆ្នោតទាំងអស់គ្នានៅថ្ងៃទី២៩ ខែកក្កដា២០១៨ខាងមុខ ។ លោកថា ៖ «គជបមិនដែលបដិសេធន៍ចំពោះសិទ្ធិពលរដ្ឋចំណាកស្រុកនោះទេ» ។ លោកថា គជបមានតួនាទីក្នុងរៀបចំការបោះឆ្នោតដោយមានភាពត្រឹមត្រូវ យុត្តិធម៌ និងទទួលយកបានទាំងអស់គ្នាដូចការបោះឆ្នោតឃុំសង្កាត់ខែមិថុនា ២០១៧ ។
លោកបានលើកឡើងថា ពលរដ្ឋដែលបានចុះឈ្មោះ និងមានឈ្មោះនៅក្នុងបញ្ជីដែលបានធ្វើបច្ចុប្បន្នភាពកាលពីឆ្នាំ២០១៧កន្លងទៅ ជាង៨,៣លានប្រមាណ៨៤%នៃចំនួនអ្នកដែលមានអាយុចាប់ពី១៨ឆ្នាំ មានសិទ្ធិបោះឆ្នោតជ្រើសតាំងតំណាងរាស្ត្រអាណត្តិទី៦ ថ្ងៃទី២៩ ខែកក្កដា២០១៨ ខាងមុខ ។
យ៉ាងណាមិញ លោក បណ្ឌិត យ៉ង សាំកុមារ នៅថ្ងៃទី២៦ ខែមីនានេះ បានសរសេរលើផេករបស់លោកថា នៅពេលសម្រេចចិត្តទៅបោះឆ្នោត សូមប្រជាពលរដ្ឋធ្វើការសិក្សាឲ្យច្បាស់អំពីគណបក្សនយោបាយ ក្នុងនោះផ្តោតលើគោលនយោបាយ ដែលគណបក្សនីមួយៗបានសន្យា និងបេក្ខជនឈរឈ្មោះ ហើយជាពិសេសទៀត តើគណបក្សណាមានគោលការណ៍ និងយន្តការច្បាស់លាស់ ដែលធានាឲ្យប្រជាពលរដ្ឋជាសមាជិក អាចដកតំណាងរាស្ត្រ នាយករដ្ឋមន្ត្រី និងរដ្ឋមន្ត្រីមុនអាណត្តិ ក្នុងករណីបំពេញការងារមិនបានល្អ ។ គណបក្សប្រជាធិបតេយ្យមូលដ្ឋានជាជម្រើសថ្មីមួយ ដែលមានគោលការណ៍ប្រជាធិបតេយ្យផ្ទៃក្នុងបក្ស គឺប្រជាធិបតេយ្យពីក្រោមមកលើ និងគណនេយ្យភាពពីលើមកក្រោមដោយប្រជាពលរដ្ឋជាសមាជិក ជាអ្នកបោះឆ្នោតរើសបេក្ខជនតំណាងរាស្ត្រ ហើយបេក្ខជន តំណាងរាស្ត្រជាអ្នកបោះឆ្នោតរើសបេក្ខជននាយករដ្ឋមន្ត្រី ។ លោក បណ្ឌិត យ៉ង សាំកុមារ បញ្ជាក់ថា ៖ «អ្នកដែលជាប់ជាបេក្ខជនតំណាងរាស្ត្រ ត្រូវចុះកិច្ចសន្យាជាមួយប្រជាពលរដ្ឋជាសមាជិក ហើយអ្នកដែលជាប់ជាបេក្ខជននាយករដ្ឋមន្ត្រី ត្រូវចុះកិច្ចសន្យាជាមួយបេក្ខជនតំណាងរាស្ត្រ ដែលក្នុងកិច្ចសន្យានោះមានយន្តការផ្តល់សិទ្ធិដល់ប្រជាពលរដ្ឋជាសមាជិក ដកតំណាងរាស្ត្រ និងតំណាងរាស្ត្រជានាយករដ្ឋមន្ត្រីមុនអាណត្តិ នៅពេលបំពេញតួនាទីមិនបានល្អ ។ ជាសរុបសម្រាប់ការបោះឆ្នោតនៅថ្ងៃទី២៩ កក្កដា ២០១៨ ប្រជាពលរដ្ឋខ្មែរមានជម្រើស២ គឺរើសយកប្រព័ន្ធដូចបច្ចុប្បន្ន ឬប្រព័ន្ធថ្មីដែលតំណាងរាស្ត្រគោរព និងទទួលខុសត្រូវចំពោះមុខរាស្ត្រ ហើយនាយករដ្ឋមន្ត្រីគោរព និងទទួលខុសត្រូវចំពោះមុខតំណាងរាស្ត្រ ៕
ចែករំលែកព័តមាននេះ