រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីកម្ពុជាដឹកនាំគណៈប្រតិភូកម្ពុជាចាកចេញពីប្រទេសកម្ពុជានៅព្រឹកថ្ងៃទី៣០ ខែមីនា ឆ្នាំ២០១៨ ដើម្បីទៅចូលរួមកិច្ចប្រជុំកំពូលមហាអនុតំបន់មេគង្គ លើកទី៦ ស្របជាមួយកិច្ចប្រជុំកំពូលជាមួយប្រទេស៣ គឺកម្ពុជា , ឡាវ, និងវៀតណាមលើកទី១០ ស្តីពីតំបន់ត្រីកោណអភិវឌ្ឍន៍ដែលនឹងប្រព្រឹត្តទៅពីថ្ងៃទី៣០ – ៣១ ខែមីនា ឆ្នាំ២០១៨ នៅទីក្រុងហាណូយ ប្រទេសវៀតណាម ។
យោងតាមហ្វេសប៊ុកសម្តេចតេជោបានបញ្ជាក់ថា ៖ «ខ្ញុំសប្បាយរីករាយក្នុងការទៅចូលរួមក្នុងកិច្ចប្រជុំកំពូលទាំង២នេះ ជាពិសេស គឺដើម្បីកម្ពុជាកាន់តែមានឱកាសរឹតចំណងមិត្តភាព និងសហប្រតិបត្តិការកាន់តែល្អរឹងមាំជាមួយប្រទេស និងថ្នាក់ដឹកនាំនៃប្រទេសតំបន់ត្រីកោណ។
តាមរយៈកិច្ចប្រជុំកំពូលនេះ នឹងឆ្លុះបញ្ចាំងនូវការប្តេជ្ញារបស់កម្ពុជាក្នុងការលើកកម្ពស់មិត្តភាព និងកិច្ចសហប្រតិបត្តិការនៅក្នុងមហាអនុតំបន់មេគង្គ និងក្នុងក្របខ័ណ្ឌកម្ពុជា,ឡាវ, វៀតណាម ដើម្បីធានាឲ្យបាននូវសន្តិភាព ស្ថិរភាព និងការអភិវឌ្ឍប្រកបដោយចីរភាពនៅក្នុងតំបន់»។ សម្តេចក៏បានជូនពរបងប្អូនជនរួមជាតិទាំងក្នុង និងក្រៅប្រទេសជួបតែសេចក្តីសុខ និងសំណាងល្អគ្រប់ៗគ្នា ៕
ចែករំលែកព័តមាននេះ