ប្រទេសកូរ៉េខាងជើង-ប្រទេសចិន ៖ ២ថ្ងៃក្រោយពាក្យចចាមអារ៉ាមនានាចិនទើបអះអាងនាថ្ងៃទី២៨ មីនា ពីទស្សនកិច្ចជាប្រវត្តិសាស្ត្រនៅទីក្រុងប៉េកាំងរបស់មេដឹកនាំកូរ៉េខាងជើង លោកគីម ជុងអ៊ុន ដែលនាឱកាសនោះអះអាងថា លោកត្រៀមសម្រាប់ការជួបគ្នាកំពូលជាមួយសហរដ្ឋអាេមរិក ហើយនឹងខិតខំរកដំណោះស្រាយដែលឈានទៅរកការរំសាយនុយក្លេអ៊ែរនៅឧបទ្វីបកូរ៉េ…
ប្រទេសកូរ៉េខាងជើង-ប្រទេសចិន ៖ ២ថ្ងៃក្រោយពាក្យចចាមអារ៉ាមនានាចិនទើបអះអាងនាថ្ងៃទី២៨ មីនា ពីទស្សនកិច្ចជាប្រវត្តិសាស្ត្រនៅទីក្រុងប៉េកាំងរបស់មេដឹកនាំកូរ៉េខាងជើង លោកគីម ជុងអ៊ុន ដែលនាឱកាសនោះអះអាងថា លោកត្រៀមសម្រាប់ការជួបគ្នាកំពូលជាមួយសហរដ្ឋអាេមរិក ហើយនឹងខិតខំរកដំណោះស្រាយដែលឈានទៅរកការរំសាយនុយក្លេអ៊ែរនៅឧបទ្វីបកូរ៉េ ។
វិទ្យុជាតិកូរ៉េខាងជើង KCBS អះអាងនាថ្ងៃទី២៨ មីនា នោះដែរថា មេដឹកនាំកូរ៉េខាងជើងលោកគីម ជុងអ៊ុន មកកាន់ប្រទេសចិនតាមការអញ្ជើញរបស់ប្រធានាធិបតីចិន លោកស៊ី ជីនពីង ។ ជនលេខមួយកូរ៉េខាងជើងមកបំពេញទស្សនកិច្ចក្រៅផ្លូវការនោះរយៈពេល៤ថ្ងៃនៅចិន គឺពីថ្ងៃទី២៥ ដល់២៨ មីនា រួមជាមួយភរិយាលោកស្រី RI SOLJU និងលោក CHOE RYONG HAE មន្ត្រីជាន់ខ្ពស់នៃបក្សពលករកូរ៉េ ។
នេះជាដំណើរចេញក្រៅប្រទេសលើកដំបូងរបស់លោកគីម ជុងអ៊ុន ចាប់តាំងពីលោកឡើងកាន់អំណាចពីដំណាច់ឆ្នាំ២០១១មក ។ ទំនាក់ទំនងរវាងកូរ៉េខាងជើង និងចិនមានភាពល្អក់កកររយៈពេលប៉ុន្មានឆ្នាំចុងក្រោយនេះ ដោយសារការបន្តរបស់ក្រុងព្យុងយ៉ាងកម្មវិធីនុយក្លេអ៊ែរ និងបាលីស្ទិករបស់ខ្លួន ។
ដោយមានកិច្ចការពារសន្តិសុខយ៉ាងតឹងរឹងរថភ្លើងពិសេសពាសដែកកូរ៉េខាងជើងបានមកដល់ប្រទេសចិននាថ្ងៃទី២៥ មីនា នាំឱ្យមានពាក្យចចាមអារ៉ាមនានាពីលទ្ធភាពនៃទស្សនកិច្ចរបស់មេដឹកនាំកូរ៉េខាងជើងនៅចិន ។
ទីភ្នាក់ងារព័ត៌មានចិនស៊ីនហួរាយការណ៍ថា លោកស៊ី ជីនពីង បានរៀបចំការទទួលយ៉ាងកក់ក្តៅបំផុតចំពោះលោកគីម ជុងអ៊ុន ដោយធ្វើការកត់សម្គាល់ថា ទំនាក់ទំនងរវាងក្រុងប៉េកាំង និងក្រុងព្យុងយ៉ាងមានសារសំខាន់បំផុតសម្រាប់ភាគីទាំង២ ។
លោកគីម ជុងអ៊ុន បានជួបពិភាក្សាជាមួយលោកស៊ី ជីនពីង ដោយមេដឹកនាំកូរ៉េខាងជើងអះអាងនាឱកាសនោះថា លោកត្រៀមជួបជាមួយប្រធានាធិបតីអាមេរិក លោកដូណាល់ ត្រាំ ក្រោយរយៈពេលច្រើនខែនៃការគំរាមកំហែងពីសង្គ្រាមរវាងប្រទេសទាំង២ជុំវិញកម្មវិធីនុយក្លេអ៊ែរកូរ៉េខាងជើង ។ លោកគីម ជុងអ៊ុនគូសបញ្ជាក់ថា ជំហររបស់យើងនៅដដែលគឺសន្យាពីការរំសាយនុយក្លេអ៊ែរនៅឧបទ្វីបកូរ៉េយោងតាមឆន្ទៈរបស់អតីតប្រធានាធិបតី លោកគីម អ៊ីលស៊ុង និងអតីតអគ្គលេខាបក្សពលករកូរ៉េ លោកគីម ជុងអ៊ីល ជាអ្នកកាន់អំណាច២រូបមុនលោកគីម ជុងអ៊ុន ។
ទូរទស្សន៍រដ្ឋចិន CCTV បានផ្សាយរូបភាពនានារបស់លោកគីម ជុងអ៊ុន និងលោកស៊ី ជីនពីង ហើយមេដឹកនាំទាំង២ចាប់ដៃគ្នានៅមុខទង់ជាតិរបស់ប្រទេសទាំង២ ។
ទស្សនកិច្ចនេះរបស់លោកគីម ជុងអ៊ុន ត្រូវបានលាតត្រដាងតាំងពីយប់ថ្ងៃទី២៦ មីនា ដោយបណ្តាសារព័ត៌មានជប៉ុនដែលអះអាងថា មេដឹកនាំជាន់ខ្ពស់កូរ៉េខាងជើងមកកាន់ក្រុងប៉េកាំងតាមរថភ្លើងពិសេស ប៉ុន្តែពុំអាចបញ្ជាក់ថា នោះពិតជាលោកគីម ជុងអ៊ុន នៅឡើយ ។
បណ្តាសារព័ត៌មានចិននៅសម្ងំស្ងៀមពុំទាន់អះអាងពីទស្សនកិច្ចនេះទេ ចាំរហូតដល់លោកគីម ជុងអ៊ុន វិលត្រឡប់ទៅប្រទេសលោកវិញ ។
យោងតាមស៊ីនហួថា ក្នុងពិធីជប់លៀងមួយរបស់លោកស៊ី ជីនពីង ជូនជាកិត្តិយសដល់រូបលោក មេដឹកនាំកូរ៉េខាងជើងថ្លែងថា ខ្ញុំបានពិភាក្សាគ្នាប្រកបដោយផ្លែផ្កាជាមួយលោកស៊ី ជីនពីង ពីការពង្រីកទំនាក់ទំនងរវាងបក្សទាំង២ និងរវាងប្រទេសទាំង២ ពីសភាពការណ៍ផ្ទៃក្នុងប្រទេសនីមួយៗ ពីការថែរក្សាសន្តិភាព និងស្ថេរភាពនៅឧបទ្វីបកូរ៉េ ព្រមទាំងពីបញ្ហាឯទៀតៗ ៕
ចែករំលែកព័តមាននេះ