រាជធានីភ្នំពេញ ៖ ប្រទេសឥណ្ឌូណេស៊ីមានបំណងពង្រឹងកិច្ចសហប្រតិបត្តិការជាមួយកម្ពុជាបន្ថែមទៀតទៅលើវិស័យយោធា សេដ្ឋកិច្ច ពាណិជ្ជកម្ម កសិកម្ម និងទេសចរណ៍ ។ ក្នុងនោះថ្នាក់ដឹកនាំនៃប្រទេសនេះ នឹងពិភាក្សាជាមួយក្រុមហ៊ុន…
រាជធានីភ្នំពេញ ៖ ប្រទេសឥណ្ឌូណេស៊ីមានបំណងពង្រឹងកិច្ចសហប្រតិបត្តិការជាមួយកម្ពុជាបន្ថែមទៀតទៅលើវិស័យយោធា សេដ្ឋកិច្ច ពាណិជ្ជកម្ម កសិកម្ម និងទេសចរណ៍ ។ ក្នុងនោះថ្នាក់ដឹកនាំនៃប្រទេសនេះ នឹងពិភាក្សាជាមួយក្រុមហ៊ុន ដែលជាក្រុមហ៊ុនអាកាសចរណ៍ក្នុងស្រុករបស់ឥណ្ឌូណេស៊ី ក្នុងការបើកការហោះហើរត្រង់ពីឥណ្ឌូណេស៊ី មកកម្ពុជានាពេលខាងមុខ ។
ក្នុងជំនួបពិភាក្សាជាមួយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីព្រឹកថ្ងៃទី២៧ មីនា ម្សិលមិញ លោក Luhut Binsar Pandjaitan រដ្ឋមន្ត្រីសម្របសម្រួលកិច្ចការសមុទ្រនៃប្រទេសឥណ្ឌូណេស៊ី បានបញ្ជាក់ពីជំហរថា រដ្ឋាភិបាលឥណ្ឌូណេស៊ី នឹងពិភាក្សាជាមួយក្រុមហ៊ុនអាកាសចរណ៍របស់ឥណ្ឌូណេស៊ី ដើម្បីជំរុញឲ្យមានការហោះហើរត្រង់មកកាន់កម្ពុជា ។
លោករដ្ឋមន្ត្រីបន្ដថា កម្ពុជាកាលពី៣០ឆ្នាំមុន គឺជាប្រទេសពុំមានសេដ្ឋកិច្ចលូតលាស់ទេ ក៏ប៉ុន្តែពេលនេះ សេដ្ឋកិច្ចកម្ពុជាបានកើនឡើងជាង៧% និងបានក្លាយទៅជាប្រទេសមួយដែលជាប់ចំណាត់ថ្នាក់លេខ៦នៅលើពិភពលោក ហើយការរីកចម្រើននេះ គឺជាមោទនភាពមួយដែលប្រទេសក្នុងតំបន់ និងអន្តរជាតិទាំងមូលបានដឹងពីការរីកចម្រើនរបស់កម្ពុជា ។
ពាក់ព័ន្ធនឹងកាហោះហើរត្រង់នេះ សម្តេចតេជោ ហ៊ុន សែន បានគាំទ្រយ៉ាងខ្លាំង ហើយបើអាចធ្វើបានកាន់តែលឿន គឺកាន់តែល្អ ព្រោះវាអាចលើកស្ទួយកិច្ចសហប្រតិបត្តិការរវាងប្រទេសទាំងពីរផង និងដើម្បីផ្សារភ្ជាប់រវាងប្រជាជន និងប្រជាជនផង ។
សម្តេចតេជោថ្លែងថា ៖« វាជាការល្អណាស់សម្រាប់ការហោះហើរត្រង់នេះ ហើយបើអាចធ្វើបានកាន់តែលឿន គឺកាន់តែល្អ ព្រោះវាអាចលើកស្ទួយកិច្ចសហប្រតិបត្តិការរវាងប្រទេសទាំងពីរផង និងដើម្បីផ្សារភ្ជាប់រវាងប្រជាជន និងប្រជាជនផង » ។
សម្តេចតេជោក៏បានលើកឡើងពីកិច្ចសហប្រតិបត្តិការរវាងកម្ពុជា និងឥណ្ឌូណេស៊ីផងដែរដោយបច្ចុប្បន្ននេះ កិច្ចសហប្រតិបត្តិការរវាងប្រទេសទាំងពីរ គឺមានភាពល្អប្រសើរទាំងវិស័យយោធា និងវិស័យផ្សេងៗទៀត ក៏ប៉ុន្តែកិច្ចសហប្រតិបត្តិការនេះនឹងមានសក្តានុពលត្រូវពង្រីកបន្ថែមទៀត ។
សម្តេចតេជោក៏បានផ្តល់អនុសាសន៍ឲ្យពិនិត្យមើលបន្ថែមទៀតលើសក្តានុពលដែលប្រទេសទាំងពីរមាន ជាពិសេសលើវិស័យសេដ្ឋកិច្ច ពាណិជ្ជកម្ម ការវិនិយោគទេសចរណ៍ និងកសិកម្ម ជាដើម ។
ទាក់ទងនឹងកសិកម្ម សម្តេចតេជោប្រមុខរាជរដ្ឋាភិបាលកម្ពុជា បានស្នើសុំឲ្យភាគីខាងឥណ្ឌូណេស៊ីមកពិនិត្យមើលពីការវិនិយោគក្នុងប្រទេសកម្ពុជា បើឥណ្ឌូណេស៊ីមកបណ្តាក់ទុនលើវិស័យកសិកម្មនៅប្រទេសកម្ពុជា ជាពិសេសលើវិស័យស្រូវអង្ករ គឺអាចធ្វើឲ្យតម្លៃអង្ករនាំចេញទៅប្រទេសឥណ្ឌូណេស៊ី នឹងចុះថោក ។
ជញ្ជីងពាណិជ្ជកម្មឥណ្ឌូណេស៊ី និងកម្ពុជាកាលពីឆ្នាំ២០១៦ មានទឹកប្រាក់សរុប៤៥០លានដុល្លារ ក្នុងនោះឥណ្ឌូណេស៊ីនាំចូលមកកម្ពុជា ស្មើទឹកប្រាក់ជាង៤០០លានដុល្លារ ហើយនៅ៤ខែដើមឆ្នាំ២០១៧ មានកំណើន១៥% បើធៀបនឹងឆ្នាំ២០១៦ ។
បើតាមអ្នកនាំពាក្យក្រសួងពាណិជ្ជកម្ម បានឲ្យដឹងកន្លងមកថា ការនាំចេញពីប្រទេសកម្ពុជាទៅកាន់ឥណ្ឌូណេស៊ី កន្លងមកភាគច្រើន គឺសម្លៀកបំពាក់, ស្បែកជើង, កំប៉ុងអាលុយមីញ៉ូម (Aluminum can), ថ្នាំជក់, ម៉ាស៊ីនដេរ, អង្ករ និងផលិតផលប្លាស្ទិកជាដើម ។ សម្រាប់ការនាំចូលពីប្រទេសឥណ្ឌូណេស៊ីមកកាន់កម្ពុជាវិញ រួមមាន ថ្នាំជក់, ធ្យូងថ្ម, គ្រឿងបន្លាស់កង់ ម៉ូតូ និងរថយន្ត, ឱសថវេចខ្ចប់, ក្រណាត់, ក្រដាសធម្មតា, ទូទឹកកក, កញ្ចក់, សម្បកកង់កៅស៊ូ និងគ្រឿងស្បែក ជាដើម ៕
ចែករំលែកព័តមាននេះ