ប្រទេសរុស្ស៊ី ៖ មនុស្សយ៉ាងតិច៥៣នាក់ស្លាប់កាលពីថ្ងៃទី២៥ មីនា ដោយសារភ្លើងឆាបឆេះមជ្ឈមណ្ឌលពាណិជ្ជកម្មក្រុង KEMEROVO នៅតំបន់ស៊ីបេរីខាងលិច ។
តុល្យការអាចមានខ្ពស់ជាងនេះទៀត ខណៈមនុស្សច្រើននាក់នៅបាត់ខ្លួនដល់យប់ថ្ងៃទី២៥ មីនា ។ ដោយដកស្រង់សម្តីបណ្តាអ្នកស៊ើបអង្កេតទីភ្នាក់ងារព័ត៌មានរុស្ស៊ី TASS មុននេះ គូសបញ្ជាក់ថា មនុស្សយ៉ាងតិច៣៧នាក់ស្លាប់ក្នុងគ្រោះអគ្គិភ័យឆេះមជ្ឈមណ្ឌលពាណិជ្ជកម្មមួយនៅក្រុង KEMEROVO ជាទីក្រុងឧស្សាហកម្មមួយនៅស៊ីបេរីខាងលិច។ ក្នុងចំណោមអ្នកស្លាប់មានកុមារយ៉ាងតិច៩នាក់ ហើយមនុស្សជាង៤០នាក់រងរបួស ។
ដកស្រង់ប្រភពមួយក្នុងផ្ទៃភ្នាក់ងារជួយសង្គ្រោះមូលដ្ឋានទីភ្នាក់ងារព័ត៌មាន RIA NOVOSTI រៀបរាប់ពីមនុស្ស៦៩នាក់បាត់ខ្លួន ក្នុងនោះមានកុមារ៤០នាក់ ។ ចំណែកគណៈកម្មាធិការស៊ើបអង្កេតគូសបញ្ជាក់ថា បានត្រួតពិនិត្យព័ត៌មាននានាស្តីពីមនុស្ស៣៥នាក់ដែលអាចបាត់ខ្លួន ។
អគ្គិភ័យកើតមាននាវេលាម៉ោង១១ម៉ោងសាកលនៅជាន់ទី៣ និងជាន់ចុងក្រោយនៃមជ្ឈមណ្ឌលពាណិជ្ជ កម្មនេះស្ថិតនៅកណ្តាលក្រុងដែលមានកន្លែងសូណា សាលបញ្ចាំងខ្សែភាពយន្តជាច្រើន ភោជនីយដ្ឋាននានា ព្រមទាំងកន្លែងលេង BOWLING មួយផង ។ មជ្ឈមណ្ឌលនេះមានមនុស្សច្រើនកុះករបំផុតនាថ្ងៃអាទិត្យ ទី២៥ មីនា នោះ។
ក្នុងសេចក្តីប្រកាសមួយ លោក ALEXANDRE EREMEIV អ្នកទទួលខុសត្រូវមូលដ្ឋាននៃក្រសួងសភាពការណ៍បន្ទាន់រុស្ស៊ីថ្លែងថា មជ្ឈមណ្ឌលពាណិជ្ជកម្មច្រើនជាន់នេះមានមនុស្សពេញ ។ គេពុំដឹងច្បាស់ឡើយថាតើមានមនុស្សប៉ុន្មាននាក់នៅទីនោះពេលមានភ្លើងឆាបឆេះយ៉ាងខ្លាំង ។
យោងតាមលទ្ធផលដំបូងៗនៃការស៊ើបអង្កេតថា ភ្លើងចាប់ផ្តើមឆាបឆេះនៅក្នុងសាលបញ្ចាំងខ្សែភាពយន្តមួយ ។ មនុស្សប្រមាណជា១២០នាក់អាចជម្លៀសចេញ ។ យោងតាមព័ត៌មានដំបូងនានាថា ដំបូលបានបាក់ក្នុងសាលបញ្ចាំងខ្សែភាពយន្ត២ ។ បណ្តាទូរទស្សន៍ក្នុងស្រុកបានបង្ហាញរូបភាពមនុស្សទាំងឡាយលោតទម្លាក់់ខ្លួនតាមបង្អួចនៃមជ្ឈមណ្ឌលពាណិជ្ជកម្ម ដើម្បីគេចចេញពីអណ្តាតភ្លើង ។
ភ្លើងឆាបឆេះមជ្ឈមណ្ឌលពាណិជ្ជកម្មនេះអាចពន្លត់ឈ្នះនាវេលាម៉ោង១៧និង៣០នាទី
ម៉ោងសាកល ។ អ្នកជួយសង្គ្រោះ និងអ្នកពន្លត់ភ្លើងចំនួន៣០០នាក់ត្រូវបានបញ្ជូនមក។ រដ្ឋមន្ត្រីក្រសួងសភាពការណ៍បន្ទាន់រុស្ស៊ីលោកវ្ល៉ាឌីមៀរ ពូតឆ្កូវ បានមកកាន់ទីក្រុង KEMEROVO ។
សរុបភ្លើងដែលចាប់ឆាបឆេះពីរសៀលថ្ងៃទី២៥ មីនា មក បានបំផ្លាញអគារមជ្ឈមណ្ឌលពាណិជ្ជកម្មនេះអស់ទំហំសរុប១.៥០០ម៉ែត្រក្រឡា ។ ពេលភ្លើងឆេះរាលដាលខ្លាំងដំបូលអគារទំហំ១.២០០ម៉ែត្រក្រឡាបានបាក់ ។
ប្រធានាធិបតីរុស្ស៊ី លោកវ្ល៉ាឌីមៀរ ពូទីន បានបញ្ជាឱ្យលោកពូតឆ្កូវ មកកាន់ទីក្រុងនៅតំបន់ស៊ីបេរីនេះ ហើយចាត់រាល់វិធានការចាំបាច់ ដើម្បីជួយដល់បណ្តាគ្រួសារជនរង
គ្រោះ ។ ប្រធានាធិបតីបានសម្តែងនូវការចូលរួមមរណទុុក្ខយ៉ាងក្រៀមក្រំចំពោះសាច់ញាតិគ្រួសារជនរងគ្រោះ ហើយជូនពរឱ្យបណ្តាអ្នករបួសឆាប់បានជាសះស្បើយវិញ ៕
ចែករំលែកព័តមាននេះ