រាជធានីភ្នំពេញ ៖ ដើម្បីរៀបចំសណ្តាប់ធ្នាប់អ្នកលក់ដូរក្នុងរមណីយដ្ឋានអង្គរឲ្យស័ក្តិសមនឹងតម្លៃរបស់អង្គរ ដែលជាសម្បត្តិបេតិកភណ្ឌពិភពលោក និងជាការឆ្លើយតបទៅនឹងសំណូមពររបស់អ្នករកស៊ីវិស័យទេសចរណ៍ ដែលតែងតែស្នើឲ្យអាជ្ញាធរថ្នាក់ក្រោម រៀបចំអនាម័យ និងសណ្ដាប់ធ្នាប់នៅតំបន់ទេសចរណ៍សំខាន់ៗ ដូចជារមណីយដ្ឋានអង្គរជាដើម អាជ្ញាធរជាតិអប្សរាបានសម្រេចបង្កើតគណៈកម្មការចម្រុះមួយ ដែលមានសមាសភាពពីអាជ្ញាធរជាតិអប្សរា អាជ្ញាធរខេត្តសៀមរាប កម្លាំងសមត្ថកិច្ច និងអាជ្ញាធរមូលដ្ឋានដែលស្ថិតនៅក្នុងរមណីយដ្ឋានអង្គរ ។
លោក សុខ សង្វារ អគ្គនាយករងនៃនាយកដ្ឋានគ្រប់គ្រងទេសចរណ៍អង្គរ បានឲ្យដឹងថា បេសកកម្មដ៏សំខាន់បំផុតនៃគណៈកម្មការនេះ គឺធ្វើយ៉ាងណា រក្សាសណ្តាប់ធ្នាប់ឲ្យបានល្អប្រសើរ ក្នុងន័យទាក់ទាញភ្ញៀវទេសចរមកកាន់អង្គរកាន់តែច្រើន ជាពិសេសនោះគឺរក្សានូវភាពថ្លៃថ្នូររបស់រមណីយដ្ឋានអង្គរ ។
លោកបន្តថា អាជ្ញាធរជាតិអប្សរាមិនហាមឃាត់ទេការលក់ដូរក្នុងរមណីយដ្ឋានអង្គរ មានតែជំរុញឲ្យអ្នកស្រុកអង្គរមានឱកាសបានលក់ដូរ ដើម្បីបង្កើនកម្រិតជីវភាពរបស់ពួកគាត់ឲ្យកាន់តែច្រើន តែពួកគាត់ក៏ត្រូវគិតគូរពីភាពថ្លៃថ្នូររបស់អង្គរដែរ តាមរយៈការរៀបចំពួកគាត់ឲ្យលក់ដូរតាមទីតាំងសមរម្យ មានសណ្តាប់ធ្នាប់ មានសុចរិតភាពក្នុងអាជីវកម្មរបស់គាត់ជាមួយភ្ញៀវជាតិ-អន្តរជាតិ ដែលមកទស្សនាអង្គរ ។
លោក សុខ ថុល នាយករងរដ្ឋបាលសាលាខេត្តសៀមរាប បានលើកឡើងថា សាលាខេត្តសៀមរាប រួមទាំងអាជ្ញាធរដែនដី គាំទ្រទាំងស្រុងនូវការបង្កើតគណៈកម្មការនេះឡើង។ លោកថា ៖« រដ្ឋបាលខេត្តសៀមរាប ក៏ដូចជាអាជ្ញាធរជាតិអប្សរាដែរ គឺផ្តោតលើសណ្តាប់ធ្នាប់របៀបរៀបរយ ធ្វើយ៉ាងណា ឲ្យខេត្តសៀមរាប ក៏ដូចជាតំបន់អង្គរស័ក្តិសមជាតំបន់បេតិកភណ្ឌ ដែលកំពុងតែទទួលបានការចាប់អារម្មណ៍ពីសំណាក់ភ្ញៀវទេសចរអន្តរជាតិ » ។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា បានលើកឡើងថា បញ្ហាសណ្ដាប់ធ្នាប់ និងសំរាម គឺជាសត្រូវរបស់ភ្ញៀវទេសចរ ហើយបើសណ្ដាប់ធ្នាប់យើងមិនល្អ សម្បូរសំរាមទេសចរមកតែម្ដង គេនឹងលែងមកទៀតហើយ។ ដូចនេះ ដើម្បីឲ្យភ្ញៀវទេសចរមកទស្សនាប្រទេសកម្ពុជាកាន់តែច្រើន អាជ្ញាធរថ្នាក់ក្រោម គួរតែពង្រឹងសណ្ដាប់ធ្នាប់ទាំងចរាចរណ៍ ការលក់ដូរ និងការថែទាំអនាម័យ ជាដើម ។
លោកបន្តថា វិស័យទេសចរណ៍បានរួមចំណែកដល់កំណើនសេដ្ឋកិច្ចកម្ពុជាយ៉ាងសំខាន់។ ជាក់ស្ដែង វាផ្ដល់ការងារយ៉ាងច្រើនដល់ប្រជាពលរដ្ឋទាំងផ្ទាល់ និងប្រយោល ។ មិនតែប៉ុណ្ណោះ វិស័យទេសចរណ៍នេះដែរ ក៏ជាផ្នែកមួយនៃការនាំចេញនៅនឹងកន្លែងផងដែរ តួយ៉ាងនៅពេលភ្ញៀវទេសចរមកទស្សនានៅក្នុងប្រទេសកម្ពុជា ពួកគេអាចនឹងទិញផលិតផលក្នុងស្រុក ដូចជា វត្ថុអនុស្សាវរីយ៍ និងផលិតផ្សេងៗទៀតត្រឡប់ទៅស្រុកគេវិញ ។
តាមរបាយការណ៍របស់គ្រឹះស្ថានអង្គរ ក្នុងរយៈពេល១ឆ្នាំពេញឆ្នាំ២០១៧កន្លងទៅ ភ្ញៀវទេសចរបរទេសទិញប័ណ្ណចូលទស្សនាតំបន់អង្គរមានចំនួនជាង២,៤លាននាក់ រកចំណូលបានចំនួនជាង១០៧លានដុល្លារអាមេរិក ។ ដោយឡែក ក្នុងរយៈពេល២ខែដើមឆ្នាំ២០១៨នេះ ចំនួនភ្ញៀវទេសចរអន្តរជាតិដែលទិញសំបុត្រចូលទស្សនាតំបន់អង្គរ មាន៥៩០.២០២នាក់ កើនឡើង៩,៥៤% បើធៀបនឹងរយៈពេលដូចគ្នាកាលពីឆ្នាំ២០១៧ និងរកចំណូលបានប្រមាណជាង២៧,៤លានដុល្លារអាមេរិក កើនឡើង៣៥,៤៣% បើធៀបនឹងរយៈពេលដូចគ្នាកាលពីឆ្នាំ២០១៧ ។
ទេសចរណ៍ត្រូវបានចាត់ទុកជាវិស័យអាទិភាពមួយក្នុងយុទ្ធសាស្ត្ររបស់រាជរដ្ឋាភិបាលកម្ពុជា ដែលវិស័យនេះបានរួមចំណែកដល់ការអភិវឌ្ឍសេដ្ឋកិច្ច និងផ្ដល់ការងារយ៉ាងច្រើនដល់ពលរដ្ឋ ដើម្បីទទួលបានប្រាក់ចំណូលសម្រាប់ផ្គត់ផ្គង់គ្រួសារ ។ វិស័យនេះបានរួមចំណែកប្រមាណ១២,៣% នៃផលិតផលក្នុងស្រុកសរុបរបស់កម្ពុជា និងតំណាងឲ្យប្រមាណ៣០% នៃវិស័យសេវាកម្មនៅ
កម្ពុជា ។
យោងតាមរបាយការណ៍ក្រសួងទេសចរណ៍ កាលពីឆ្នាំ២០១៧កន្លងទៅនេះ កម្ពុជាទទួលបានទេសចរអន្តរជាតិប្រមាណ៥,៦លាននាក់ កើនឡើង១១,៨% បើធៀបនឹងឆ្នាំ២០១៦ និងទទួលបានចំណូលប្រមាណ៣,៧ពាន់លានដុល្លារអាមេរិក កើនឡើង១៣,៣% ៕
ចែករំលែកព័តមាននេះ