រាជធានីភ្នំពេញ ៖ បុរសរត់ម៉ូតូឌុបម្នាក់ ត្រូវបានបុគ្គលិកផ្ទះសំណាក់កាប់១កាំបិតបុ័ងតោ រងរបួសដេរ៣០ថ្នេរ ដោយសារខឹងសួរនាំរឿងបបួលទៅផឹកស៊ី ហើយត្រឡប់មកវិញមុន កាលពីវេលាម៉ោង០៦ និង២០នាទីព្រលប់ថ្ងៃទី២១ មីនា នៅមុខផ្ទះសំណាក់វិមានមាស ដែលស្ថិតនៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។ ជនរងគ្រោះឈ្មោះ សុខ វុធាន ភេទប្រុស អាយុ៣២ឆ្នាំ ប្រកបរបររត់ម៉ូតូឌុប ស្នាក់នៅផ្ទះជួលភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅសង្កាត់ស្រះចក ខណ្ឌដូនពេញ ។ ជនបង្កឈ្មោះ អាណែត ភេទប្រុស ជាបុគ្គលិកផ្ទះសំណាក់ ស្នាក់នៅក្នុងផ្ទះសំណាក់ខាងលើ មានស្រុកកំណើតនៅខេត្តតាកែវ ។
តាមសម្តីជនរងគ្រោះបាននិយាយថា មុនពេលកើតហេតុនៅវេលាម៉ោង៤រសៀល ជនបង្កបាននាំរូបគាត់ ទៅផឹកស៊ីនៅម្ដុំផ្លូវ២០០៤ ដោយនិយាយគ្នាថា ឱ្យចេញលុយចំនួន២ម៉ឺនរៀល ។ រីឯជនបង្កចេញចំនួន៥ដុល្លារ បន្ទាប់មកអ្នកទាំង២បានផឹកស្រាជាងមួយម៉ោង ស្រាប់តែជនបង្កជាបុគ្គលិកផ្ទះសំណាក់សុំចេញទៅមុនប្រាប់ថា មានរវល់ ហើយជនរងគ្រោះក៏បានផឹកជាមួយអ្នកផ្សេងបន្ត រហូតដល់ពេលល្ងាច ទើបចេញថ្លៃផឹកស៊ីអស់ចំនួនជាង១០ម៉ឺនរៀល ក៏បានត្រឡប់ទៅផ្ទះវិញ ។
ប្រភពដដែលបានបន្តទៀតថា លុះជនរងគ្រោះត្រឡប់មកដល់ផ្ទះសំណាក់ខាងលើ ពេលឃើញជនបង្កហើយបាននិយាយថា៖ «ហ្អែងបបួលអញទៅផឹក ម៉េចក៏ហ្អែងមកចោលអញបាត់ មិនចាំមកជាមួយគ្នា»។ នៅពេលនោះជនរងគ្រោះបានច្រានជនបង្កលេង ហើយជនបង្កខាងលើ បាននិយាយថា ម៉េចហ្អែងរកវាយអញមែនទេ ពេលនោះជនរងគ្រោះឆ្លើយថា «អញច្រានលេងតើហ៍» ។ នៅពេលនោះ ជនបង្កស្ទុះទៅក្នុងផ្ទះសំណាក់ ហើយយកកាំបិតប័ងតោមកកាប់ទៅលើជនរងគ្រោះគេចរហូត ក៏ត្រូវជនបង្កកាប់មួយកាំបិតបុ័ងតោទៀត ចំខាងក្រោមក្លៀក ផ្នែកខាងឆ្វេងយ៉ាងធ្ងន់ធ្ងរ ហូរឈាមស្រោចខ្លួន ។
បន្ទាប់ពីកាប់ឱ្យរងរបួសហើយ ជនបង្កបានរត់ចូលក្នុងផ្ទះសំណាក់បាត់ ភ្លាមៗកម្លាំងនគរបាលប៉ុស្តិ៍ចោមចៅ៣បានមកជួយអន្តរាគមន៍ ប៉ុន្តែអ្នកមើលការខុសត្រូវមិនឱ្យចូលរង់ចាំម្ចាស់ផ្ទះសំណាក់អនុញ្ញាតសិន ជាហេតុឱ្យជនបង្កគេចខ្លួនបាត់ ។ ចំណែកជនរងគ្រោះត្រូវបានបងប្អូនដឹកតាមរឺុម៉កយកទៅសង្គ្រោះនៅមន្ទីរពេទ្យបង្អែកពោធិ៍ចិនតុងដេរជាង៣០ថ្នេរ ៕
ចែករំលែកព័តមាននេះ