ទីក្រុងហាណូយ ៖ តម្លៃជ័រកៅស៊ូធម្មជាតិរបស់វៀតណាមបានធ្លាក់ចុះតាំងពីឆមាសទី២ឆ្នាំមុន ដែលធ្វើឲ្យក្រុមហ៊ុនក្នុងវិស័យនេះពិចារណាមុននឹងធ្វើគម្រោងអាជីវកម្មសម្រាប់ឆ្នាំ២០១៨ ។
បច្ចុប្បន្ន តម្លៃជ័រកៅស៊ូស្មើប្រមាណ១.៦០០ដុល្លារប៉ុណ្ណោះក្នុង១តោន ឬតិចជាងឆ្នាំមុនដល់ទៅ១០% ។ ក្រុមហ៊ុនផលិតជ័រកៅស៊ូមួយចំនួនក៏ដំណើរការមិនបានល្អដែរ ក្នុងរយៈពេល២ខែកន្លងមកនេះ ។
ក្រុមហ៊ុន Dong Phu Rubber មានគម្រោងលក់ជ័រកៅស៊ូក្នុងតម្លៃប្រមាណ១.៦០០ដុល្លារក្នុង១តោន ឬតិចជាងតម្លៃក្នុងឆ្នាំ២០១៧ ដល់ទៅ៨,៤% ។
ជាមួយគ្នានេះ នៅឆ្នាំ២០១៨ ក្រុមហ៊ុន Phuoc Hoa Rubber Co មានគម្រោងលក់ជ័រកៅស៊ូរបស់ពួកគេក្នុងតម្លៃប្រមាណ១.៦០០ដុល្លារដែរក្នុង១តោន គឺទាបជាងតម្លៃក្នុងឆ្នាំ២០១៧ ដែលស្មើប្រមាណ១.៨០០ដុល្លារក្នុង១តោន ។
ចំណែកក្រុមហ៊ុន Tay Ninh Rubber JSC ក៏មានគម្រោងលក់ជ័រកៅស៊ូក្នុងតម្លៃនេះដែរ ។ លើសពីនេះ ក្រុមហ៊ុននេះបានកាត់បន្ថយគោលដៅទិន្នផលរបស់ពួកគេ ចាប់ពី៩.៨០០តោន មក៨.៧០០តោន, ផ្នែកកែច្នៃពី១៤.៨០០តោន មក១២.៧០០តោន និងផលិតកម្មពី២,១៤តោនក្នុង១ហិកតាក្នុង១ឆ្នាំ មកស្មើ១,៩៦តោនក្នុង១ហិកតាក្នុង១ឆ្នាំផងដែរ ។
ជាមួយគ្នានេះ MayBank KimEng Securities Corp បានព្យាករថា តម្លៃជ័រកៅស៊ូប្រហែលជាអាចល្អប្រសើរឡើងវិញបន្តិច ព្រោះតែកត្តាមួយចំនួនដូចជា រដ្ឋាភិបាលប្រទេសថៃប្រកាសពីកម្មវិធីឧបត្ថម្ភធនតម្លៃប្រមាណ៦០ម៉ឺនដុល្លារកាលពីខែធ្នូ ឆ្នាំ២០១៤ ខណៈក្រុមហ៊ុនធំៗមកពីប្រទេសថៃ ម៉ាឡេស៊ី និងឥណ្ឌូណេស៊ី យល់ស្របថា នឹងកាត់បន្ថយផលិតកម្មរបស់ពួកគេ ។
នាពេលថ្មីៗនេះ រដ្ឋាភិបាលថៃមានគម្រោងចេញប័ណ្ណបំណុលប្រមាណ១ប៊ីលានដុល្លារដើម្បីកាត់បន្ថយជ័រកៅស៊ូលើសលប់ និងធ្វើឲ្យតម្លៃកើនឡើងវិញ ។
រដ្ឋមន្ត្រីកសិកម្មថៃ លោក Grisada Boonrach មានគម្រោងកាត់បន្ថយជ័រកៅស៊ូប្រមាណពី១ ទៅ៣,៣លានតោនឯណោះនៅចុងឆ្នាំនេះ ៕
ចែករំលែកព័តមាននេះ