ខេត្តមណ្ឌលគិរី ៖ សកម្មភាពដឹកជញ្ជូនឈើឆ្លងដែនខុសច្បាប់ តាមច្រករបៀងក្នុងខេត្តមណ្ឌលគិរីត្រូវបានគេមើលឃើញថា កំពុងកើតមានជាប់ជាប្រចាំថ្ងៃ បើទោះជាមានការដាក់បទបញ្ជាពីសំណាក់ប្រមុខរដ្ឋាភិបាលឲ្យបញ្ឈប់ការចរាចរឈើចេញក្រៅប្រទេសនាពេលកន្លងមក ។
ជាក់ស្តែងឈើពេញមួយរថយន្តត្រូវបាននគរបាលចាប់បង្ក្រាបបាន ខណៈកំពុងលួចដឹកជញ្ជូនឈើបម្រុងឆ្លងដែនតាមច្រករបៀង ង៉ាំដី ក្នុងភូមិឆ្នែង ឃុំស្រែខ្ទុម ស្រុកកែវសីមា កាលពីល្ងាចថ្ងៃទី១៨ ខែមីនា ឆ្នាំ២០១៨ ។
សមត្ថកិច្ចបានឲ្យដឹងថា រថយន្តដឹកឈើខុសច្បាប់បម្រុងលោតឆត្រយកទៅលក់ឱ្យឈ្មួញវៀតណាមតាមច្រករបៀងដែលកម្លាំនគរបាលចាប់បង្ក្រាបបានម៉ាកឡង់គ្រីស័រ ពណ៌ខ្មៅ ពុំមានពាក់ផ្លាកលេខ បានផ្ទុកឈើប្រភេទកកោះចំនួន១៨ដុំ មានប្រវែង២ម៉ែត្រ និងមានមុខកាត់ចាប់ពីមុខ៣០សង់ទីម៉ែត្រ ចំណែកអ្នកបើកបររត់គេចខ្លួនបាត់ ។ បច្ចុប្បន្នរថយន្ត និងវត្ថុតាងខាងលើត្រូវបានកម្លាំងនគរបាលសេដ្ឋកិច្ចប្រគល់ឱ្យទៅជំនាញរដ្ឋបាលព្រៃឈើចាត់ការទៅតាមនីតិវិធីនៃច្បាប់ ៕
ចែករំលែកព័តមាននេះ