រាជធានីភ្នំពេញ ៖ តុលាការសាលាកំពូលនៅព្រឹកថ្ងៃទី១៦ ខែមីនា ឆ្នាំ២០១៨នេះ បានសម្រេចបដិសេធឱ្យអតីតអ្នកយកព័ត៌មានរបស់វិទ្យុអាស៊ីសេរីនៅក្រៅឃុំ ។ នេះបើតាមប្រសាសន៍លោក កែវ វ៉ានី…
រាជធានីភ្នំពេញ ៖ តុលាការសាលាកំពូលនៅព្រឹកថ្ងៃទី១៦ ខែមីនា ឆ្នាំ២០១៨នេះ បានសម្រេចបដិសេធឱ្យអតីតអ្នកយកព័ត៌មានរបស់វិទ្យុអាស៊ីសេរីនៅក្រៅឃុំ ។ នេះបើតាមប្រសាសន៍លោក កែវ វ៉ានី មេធាវីការពារក្តីឲ្យអតីតអ្នកសារព័ត៌មានវិទ្យុអាស៊ីសេរី២នាក់។
លោកមេធាវីរូបនេះបានបញ្ជាក់ថា នៅព្រឹកថ្ងៃទី១៦ ខែមីនា ឆ្នាំ២០១៨នេះ តុលាការកំពូលបានលើកយកសំណុំរឿងបណ្តឹងសុំនៅក្រៅឃុំបណ្តោះអាសន្នរបស់ជនជាប់ចោទ តែក្រោយពីសវនាការចប់ «ចៅក្រមសម្រេចបន្តឃុំខ្លួនកូនក្តីរបស់លោកទាំងពីរនាក់ក្នុងពន្ធនាគារដដែល ពោលគឺមិនព្រមដោះលែងឱ្យនៅក្រៅឃុំតាមការសុំទេ»។
លោកមេធាវី កែវ វ៉ានី បានថ្លែងប្រាប់កោះសន្តិភាពតាមទូរស័ព្ទក្រោយពីសវនាការថាកូនក្តីរបស់លោកជាអតីតបុគ្គលិកអាស៊ីសេរី២រូប គឺលោក អ៊ួន ឈិន និងលោក យាង សុជាមេត្តា ត្រូវបានសមត្ថកិច្ចឃាត់ខ្លួនកាលពីយប់ថ្ងៃទី១៤ ខែវិច្ឆិកា ឆ្នាំ២០១៧ នៅផ្ទះសំណាក់មួយឈ្មោះម៉ារ៉ាឌី ស្ថិតនៅក្នុងសង្កាត់ស្ទឹងមានជ័យ រាជធានីភ្នំពេញ។ លោកមេធាវីបានលើកឡើងថា កូនក្តីរបស់លោកទាំង២នាក់ត្រូវបានតុលាការសម្រេចឃុំខ្លួនរយៈពេលបួនខែនៅពន្ធនាគារ ទើបពួកគាត់បានដាក់ពាក្យប្តឹងប្រឆាំងការឃុំខ្លួនរបស់តុលាការក្រុងភ្នំពេញ ។ នៅសាលាឧទ្ធរណ៍បានបដិសេធ ក៏សម្រេចបន្តប្តឹងសារទុក្ខមកកាន់តុលាការកំពូលទៀត។
សូមបញ្ជាក់ថា តំណាងអយ្យការអមសាលាដំបូងរាធានីភ្នំពេញ លោក សេង ហៀង នាពេលកន្លងមក ក៏បានធ្វើការចោទប្រកាន់លោក អ៊ួន ឈិន និងលោក យាង សុជាមេត្តា ពីបទប្រគល់ឱ្យរដ្ឋបរទេសនូវព័ត៌មានជាអាទិ៍ដែលបង្កឱ្យមានការអន្តរាយដល់ការការពារជាតិ តាមបញ្ញត្តិមាត្រា ៤៤៥ នៃក្រមព្រហ្មទណ្ឌ ដែលបទល្មើសនេះ អាចប្រឈមនឹងការកំណត់ទោសពី៧ឆ្នាំ ទៅ១៥ឆ្នាំ បច្ចុប្បន្នអ្នកទាំងពីរត្រូវបានឃុំខ្លួននៅពន្ធនាគារព្រៃ.ស៕
ចែករំលែកព័តមាននេះ