ប្រទេសអង់គ្លេស ៖ នាយករដ្ឋមន្ត្រីអង់គ្លេស លោកស្រី THERESA MAY កាលពីថ្ងៃទី១២ មីនា បានចោទប្រកាន់លើរុស្ស៊ីក្នុងរឿងវាយប្រហារដោយសារធាតុពុលលើអតីតចារបុរសរុស្ស៊ីមួយរូបនៅអង់គ្លេស ។…
ប្រទេសអង់គ្លេស ៖ នាយករដ្ឋមន្ត្រីអង់គ្លេស លោកស្រី THERESA MAY កាលពីថ្ងៃទី១២ មីនា បានចោទប្រកាន់លើរុស្ស៊ីក្នុងរឿងវាយប្រហារដោយសារធាតុពុលលើអតីតចារបុរសរុស្ស៊ីមួយរូបនៅអង់គ្លេស ។
យោងតាមលោកស្រី MAY ថា ក្រុងឡុងដ៍សន្និដ្ឋានពីលទ្ធភាពខ្ពស់បំផុតដែលក្រុងមូស្គូជាអ្នកទទួលខុសត្រូវលើការវាយប្រហារនេះ ។ ការវាយប្រហារសំដៅលើអតីតចារបុរសរុស្ស៊ីម្នាក់ និងកូនស្រីរបស់គេកាលពីថ្ងៃទី៤ មីនា ប្រើសារធាតុពុលយោធាមួយប្រភេទផលិតដោយរុស្ស៊ី ។
កាលពីថ្ងៃទី១២ មីនា នៅមុខសភាអង់គ្លេសលោកស្រី MAY យល់ថា វាមានលទ្ធភាពខ្ពស់បំផុតដែលរុស្ស៊ីជាអ្នកទទួលខុសត្រូវលើការបំពុលលោក SERGUEI SKRIPAL និងកូនស្រីនាង YOULIA ដែលនេះជាសញ្ញានៃការបង្កើនភាពតានតឹងរវាងប្រទេសទាំង២។
ក្រុងមូស្គូបានបញ្ចេញប្រតិកម្មតបភ្លាមៗ ដោយបរិហារថា នេះជាការបង្កហេតុមួយ ហើយជាការលេងល្បិចស្ពិនភ្នែកដ៏ប្រសប់មួយ ។ តាម FACEBOOK ក្រសួងការបរទេសរុស្ស៊ីអះអាងថា ការចោទប្រកាន់ទាំងឡាយ គឺដើម្បីបង្កាច់បង្ខូចរុស្ស៊ី ខណៈជិតដល់ពេលប្រកួតបាល់ទាត់ពិភពលោកដែលរុស្ស៊ីជាម្ចាស់ផ្ទះ ខណៈរុស្ស៊ីដណ្តើមបានការទទួលរៀបចំដែលអង់គ្លេសស្នើដែរតែពុំសម្រេច ។
លោកស្រី MAY គូសបញ្ជាក់ថា សារធាតុពុលប្រើប្រឆាំងអតីតចារបុរសនេះ និងកូនស្រីរបស់គេជាសារធាតុមានគុណភាពយោធាស្ថិតក្នុងក្រុមសារធាតុ NOVICHOK ផលិតដោយរុស្ស៊ី ។ លោកស្រីទុកពេលដល់យប់ថ្ងៃទី១៣ មីនា ដល់ក្រុងមូស្គូឱ្យធ្វើការពន្យល់នានាដល់អង្គការ ដើម្បីហាមឃាត់អាវុធគីមី OIAC ។
រដ្ឋមន្ត្រីការបរទេសអាមេរិក លោក REX TILLERSON ថ្លែងថា ក្រុងវ៉ាស៊ីនតោនមានទំនុកចិត្តលើការស៊ើបអង្កេតរបស់អង់គ្លេសដែលថារុស្ស៊ីអាចជាអ្នកទទួលខុសត្រូវលើការវាយប្រហារបែបនេះ ៕
ចែករំលែកព័តមាននេះ