ខេត្តកោះកុង ៖ ករណីលួចបូមខ្សាច់ចាក់លុបយកដីព្រៃកោងកាង ក្នុងតំបន់ដែនជម្រកសត្វព្រៃពាមក្រសោប ក្នុងខេត្តកោះកុង ត្រូវបានដកហូតមកជាសម្បត្តិរដ្ឋវិញហើយ នេះបើយោងតាមលិខិត.សជណ របស់ទីស្តីការគណៈរដ្ឋមន្ត្រី ចុះថ្ងៃទី៩ ខែមីនា ឆ្នាំ២០១៨ បន្ទាប់ពីសម្តេចតេជោ មានប្រតិកម្មខ្លាំងៗ ជាបន្ទាន់ ចំពោះលោកជំទាវអភិបាលខេត្តកោះកុង មិថុនា ភូថង ក្រសួងរៀបចំដែនដីនគរូបនីយ៍កម្ម និងក្រសួងបរិស្ថាន កាលពីថ្ងៃទី២២ ខែកុម្ភៈ កន្លងទៅ ។
ប៉ុន្តែទោះជាយ៉ាងណា ចំណាត់ការនេះនៅមិនទាន់ទទួលបានយុត្តិធម៌នៅឡើយទេ ព្រោះជនល្មើសបានលក់ដីទាំងនេះ ប្រមូលលុយទៅបាត់ រួមទាំងប្រធានភូមិ និងចៅសង្កាត់ផងដែរ នៅមិនទាន់បានវែកមុខ។ ចំណែកអ្នកទិញបានក្លាយជាជនរងគ្រោះទៅវិញ ។
សូមរំលឹកថា ដីខាងលើនេះជាដីក្នុងតំបន់ដែនជំរកសត្វព្រៃពាមក្រសោប ស្ថិតក្នុងសង្កាត់ស្ទឹងវែង ក្រុងខេមរៈភូមិន្ទខេត្តកោះកុង ។ នៅថ្ងៃទី៩ ខែមីនា ឆ្នាំ២០១៧ ឈ្មោះសុខ គឹមហុង ជាមន្ត្រីកងរាជអាវុធហត្ថខេត្ត និង ប្រពន្ធបានលក់ដីខាងលើនេះ ចំនួន១៣ .៣៩ហិតាឲ្យឧកញ៉ាជា លាងហុង ជាអ្នកមានខ្នងក្រាស់ម្នាក់ នៅឯរាជធានីភ្នំពេញ ដោយប្រើលិខិតលក់ទិញត្រឹមសង្កាត់ និងមានឯកសារយោងមិនប្រក្រតីចំនួន៣ ប័ណ្ណ សំគាល់ថា សុខ គឹមហុង បានទិញពីម្ចាស់ដើម ។ តែដោយឯកសារទាំងនេះមិនប្រក្រតី ហើយអ្នកទិញដែលលោភលន់ចាប់ផ្តើមបូមខ្សាច់លុបព្រៃកោងកាងទៀត ធ្វើឲ្យមានរឿងអាស្រូវផ្ទុះឡើងតែម្តង ។
លោកអន ភារះ អភិបាលរងខេត្តបានប្រាប់កោះសន្តិភាពតាមទូរស័ព្ទនៅព្រឹកថ្ងៃទី១៣ មីនានេះថា បន្ទាប់ពីទទួលបានប្រតិកម្មរបស់សម្តេចតេជោភ្លាម អាជ្ញាធរខេត្តបានរៀបចំកម្លាំងចម្រុះចុះ ទៅពិនិត្យដល់កន្លែងកើតហេតុ ហើយក៏បានរាយការណ៍ទៅក្រសួងបរិស្ថានភា្លមៗដែរ ។
អំពីសកម្មភាពល្មើសទាំងនេះ បានសម្គាល់ថា មិនបានរុះរើរឹបអូសយកសម្ភារដូចជា ទុយោបូមខ្សាច់ និងម៉ាស៊ីនបូមយកមករក្សាទុក ឬក៏កោះហៅជនប្រព្រឹត្តិបទល្មើសមកទទួលទោស នៅចំពោះមុខច្បាប់ឡើយ ទោះបីសមត្ថកិច្ចបានស្គាល់មុខសញ្ញាល្មើសយ៉ាងច្បាស់ហើយក៏ដោយ ដែលគេសង្ស័យថា បានប្រព្រឹត្តបទល្មើសជាប្រព័ន្ធដូចសម្លកំពឹស ៕
ចែករំលែកព័តមាននេះ