រាជធានីភ្នំពេញ ៖ សភាយុវពាណិជ្ជករកម្ពុជា សាខាចតុមុខ បានបង្កើតកម្មវីធីមួយមានឈ្មោះថា« រាត្រីជួបជុំសហគ្រិន» ក្នុងគោលបំណងផ្សារភ្ជាប់ទំនាក់ទំនង និងបង្កើនឱកាសអាជីវកម្មរវាងសហគ្រិន និង សហគ្រិន ។ កម្មវិធីនេះ បានប្រារព្ធធ្វើឡើង កាលពីថ្ងៃ០៩ មីនា នៅសណ្ឋាគារ Le Grand Palais ។ ពិធីនេះ មានការអញ្ជើញចូលរួមពីសំណាក់សហគ្រិនចំនួនប្រមាណ១០០នាក់ និងអ្នកជំនួញដែលជោគជ័យ ដែលពួកគាត់ត្រូវបានអញ្ជើញជាគណៈកម្មាធិការប្រឹក្សាយោបល់ និងផ្តល់ដំបូន្មានទៅលើ MSME ដែលចុះឈ្មោះចូលរួម ដែលក្នុងនោះរួមមាន លោកជី សិលា ស្ថាបនិកនៃក្រុមហ៊ុន Sabay Corp.; , លោកឧកញ៉ាកែវ មុំ ស្ថាបនិកក្រុមហ៊ុនលីលី, លោកឧកញ៉ាស្រ៊ាត មុំសុភា ស្ថាបនិក និងជានាយិកានៃ SOPHIYA Corp និងលោកវា វីរៈ ស្ថាបនិកក្រុមហ៊ុនអចលនទ្រព្យ Century 21 Fortuna Investment, Dr. អេង លីគង់ CEO of Master Care Dental Clinic, បណ្ឌិត តាន់ មុនីវណ្ណ អគ្គនាយករងនៃក្រុមហ៊ុន ម៉ុង ឬទ្ធី គ្រុប។
គួរបញ្ជាក់ផងដែរថា កម្មវិធី «រាត្រីជួបជុំសហគ្រិន» នេះ ជាផ្នែកមួយនៃគម្រោង JCI Business-Aspirant នឹងដើរតួជាអ្នកតភ្ជាប់រវាងសហគ្រាសខ្នាតតូច និងមធ្យមទៅកាន់អ្នកផ្តល់សេវាកម្មដូចជាក្រុមហ៊ុនជំនាញច្បាប់, គ្រឹះហិរញ្ញវត្ថុ, ក្រុមហ៊ុនដំណោះស្រាយផ្នែកបច្ចេកវិទ្យាជាដើម ដើម្បីជួយអោយសហគ្រាសទាំងនោះប្រែក្លាយខ្លួនអោយកាន់តែមានស្ដង់ដា ។
កញ្ញា ឡាយ ហ៊ុយហួយ ប្រធានគម្រោង ក៏មានយោបល់ផងដែរថា «កម្មវិធី Business Aspirant នឹងដើរតួនាទីជាស្ពានដែលតភ្ជាបគ្រប់សហគ្រាសខ្នាតតូចនិងមធ្យមទាំងអស់ ជាមួយនឹងដៃគូរកស៊ីនិងធនធាន ដែលអាចជឿទុកចិត្តបាន» ។ លើសពីនេះទៀត គម្រោងនេះ មិនត្រឹមតែភ្ជាប់ពួកគេទៅនឹងធនធានដែលជឿទុកចិត្តនោះទេ ប៉ុន្តែថែមទាំងផ្តល់នូវការបណ្តុះបណ្តាលជំនាញដែលមានសារសំខានសម្រាប់ការធ្វើអាជីវកម្ម ដល់សហគ្រិនមួយកំរិតទៀត ។
បន្ថែមពីលើនេះទៅទៀត លោកជី សិលាស្ថាបនិកនៃក្រុមហ៊ុន Sabay ក៏មានប្រសាសន៍ផងដែរថា «ការផ្លាស់ប្តូរ ឬប្រែក្លាយអាជីវកម្មទៅអោយមាននិរន្តរភាព មិនមែនជាការងាយស្រួលនោះទេ, ការអភិវឌ្ឍន៍អាជីវកម្មនេះ ទាមទារអោយមានការត្រួតពិនិត្យឥតឈប់ឈរ និងការណែនាំ ហើយវាកាន់តែប្រសើរ បើសិនពួកគាត់បានទទួលការណែនាំពីសហគ្រិន ដែលមានបទពិសោធន៍ ឬជោគជ័យដែលមានជំនាញក្នុងវិស័យរបស់ពួកគេ» ។
កម្មវិធីនេះ នឹងដើតួជាវេទិកា សម្រាប់សហគ្រាសធុនតូច និងមធ្យម (MSMEs) ដើម្បីភ្ជាប់ជាមួយអ្នកផ្តល់សេវាកម្ម ផលិតផល ។ ហើយសំខាន់ជាងនេះទៀត ត្រូវជំរុញឱ្យសហគ្រាសខ្នាតតូច និងមធ្យមនៅកម្ពុជាអភិវឌ្ឍអោយមានស្តង់ដារប្រសើរជាងមុន តាមរយៈការប្រឹក្សាយោបល់ ការបង្ហាត់បង្រៀនព្រមទាំងណែនាំ ។
គូសបញ្ចាក់ផងដែរថា កម្មវិធី Business Aspirant នឹងចាប់ផ្ដើមបើកទទួលពាក្យ ចាប់ពីថ្ងៃទី០៥ កុម្ភៈនេះ ដល់ថ្ងៃទី០៧ មីនា ឆ្នាំ២០១៨ ។
ចែករំលែកព័តមាននេះ