រាជធានីភ្នំពេញ ៖ ធ្លាប់តែដើរបង្ហាញរាងនៅលើវេទិកាប្រឡងបវរកញ្ញាធ្វើឱ្យមហាជនទូទាំងប្រទេសចាប់អារម្មណ៍កន្លងមក ពេលនេះកញ្ញាខ្លឹម ស្រីគា ក្លាយជាតួឯកក្នុងរឿងភាគរួមជាមួយឺលោកទ្រី តារាវុធ ។ គេមិននឹកស្មានថា ទាំងកញ្ញាខ្លឹម…
រាជធានីភ្នំពេញ ៖ ធ្លាប់តែដើរបង្ហាញរាងនៅលើវេទិកាប្រឡងបវរកញ្ញាធ្វើឱ្យមហាជនទូទាំងប្រទេសចាប់អារម្មណ៍កន្លងមក ពេលនេះកញ្ញាខ្លឹម ស្រីគា ក្លាយជាតួឯកក្នុងរឿងភាគរួមជាមួយឺលោកទ្រី តារាវុធ ។
គេមិននឹកស្មានថា ទាំងកញ្ញាខ្លឹម ស្រីគា និងលោកទ្រី តារាវុធ ងាកមកបង្កើតឈុតឆាកសម្តែងជាមួយគ្នាឡើយ ដោយខាងប្រុសធ្លាប់ស្និទ្ធស្នាលយ៉ាងខ្លាំងជាមួយតារាវ័យក្មេងសួង ស៊ីធឿន ។ មិនដឹងថាមានភាពប្លែកបែបណានោះទេដែល ម្នាក់ៗមិនធ្លាប់សាកល្បងសម្តែងជាមួយគ្នានោះ ។
កញ្ញាឯក Miss Grand Cambodia 2017 ខ្លឹម ស្រីគា លេចមុខសម្តែងភាពយន្តភាគថ្មីមួយរបស់ទូរទស្សន៍បាយ័ន ដោយសម្តែងរួមជាមួយ Freshie Boyលេខ១ លោកទ្រី តារាវុធ ។ ពួកគេបានបង្ហាញក្តីរំពឹងខ្ពស់បើទោះបីជាជំនួបសម្តែងរួមគ្នានេះជាលើកដំបូងក្តី ។
ខ្លឹម ស្រីគា ដែលមានវ័យ១៨ឆ្នាំទទួលបានការចាប់អារម្មណ៍ខ្លាំងពីមហាជនក្រោយពីនាងក្លាយជាម្ចាស់ជ័យលាភីលេខ១គ្រងមកុដ Miss Grand Cambodia 2017 និងបានតំណាងឲ្យកម្ពុជាចេញទៅប្រកួតមកុដ Miss Grand លើកទី៥របស់ពិភពលោកដែល ប្រទេសវៀតណាមជាម្ចាស់ផ្ទះកាលពីចុងឆ្នាំ២០១៧ ។ នាងនឹងបង្ហាញទេពកោសល្យក្នុងការសម្តែងភាពយន្តជាលើកដំបូង ក្នុងតំណែងតួឯករួមគ្នាជាមួយតារាសម្តែងស្រស់សង្ហាទ្រី តារាវុធ ក្នុងរឿងភាគ «ភូមិគ្រឹះជំពាក់ស្នេហ៍» របស់ទូរទស្សន៍បាយ័ន ។ ភាពយន្តនេះបានប្រកាសចេញថតលើកដំបូងចាប់ពីថ្ងៃទី២៦ខែកុម្ភៈ ។
លោកទ្រី តារាវុធ បានបង្ហាញក្តីរីករាយខ្លាំងដែលក្លាយជាតួឯកក្នុងភាពយន្តនេះ ហើយអ្វីដែលពិសេសគឺជំនួបសម្តែងរួមជាមួយតួឯកស្រីខ្លឹម ស្រីគា ដែលមហាជនចាប់អារម្មណ៍ច្រើន។ លោកនិយាយថា «អ្វីដែលកាន់តែធ្វើឲ្យខ្ញុំភ្ញាក់ផ្អើលគឺការសម្តែងក្នុងភូមិគ្រឹះបុរាណបន្សល់ទុកពីសម័យបុរាណ សម័យអាណានិគមនិយមបារាំងនៅតំបន់កៀនស្វាយ ហើយក៏ជាភូមិគ្រឹះដែលខ្ញុំធ្លាប់បានសម្តែងភាពយន្តខ្នាតធំរឿង«សសរកន្លោង» កាលពីកន្លងទៅដែរ ។ ភាពយន្តភាគនេះឆ្លុះបញ្ចាំងអំពីស្នេហាមួយដែលពោរពេញដោយភាពចាក់ស្រេះ កាច់កុង ដែលកើតមានក្នុងសម័យអាណានិគមនិយមបារាំង ហើយភាពយន្តនេះនឹងកាន់តែទាក់ទាញការចាប់អារម្មណ៍ច្រើនពីមហាជនព្រោះតែប្រមូលផ្តុំដោយសិល្បករល្បីឈ្មោះជាច្រើនចូលរួម» ៕
ចែករំលែកព័តមាននេះ