រាជធានីភ្នំពេញ ៖ ដោយមើលឃើញទីផ្សារអាហារប្រណីតនៅកម្ពុជាកំពុងទទួលបានការពេញនិយមខ្លាំង ពាណិជ្ជករខ្មែរ និងជនជាតិបារាំងបានសហការគ្នានាំចូលពងត្រីម្យ៉ាងដែលមានឈ្មោះ កាវីយ៉ា (Caviar) ដែលជាប្រភេទពងត្រីសម្បូរទៅដោយវីតាមីនសម្បូរបែប មកច្នៃជាអាហារប្រណីតលំដាប់ខ្ពស់សម្រាប់អតិថិជននៅក្នុងប្រទេសកម្ពុជា។ លោក…
រាជធានីភ្នំពេញ ៖ ដោយមើលឃើញទីផ្សារអាហារប្រណីតនៅកម្ពុជាកំពុងទទួលបានការពេញនិយមខ្លាំង ពាណិជ្ជករខ្មែរ និងជនជាតិបារាំងបានសហការគ្នានាំចូលពងត្រីម្យ៉ាងដែលមានឈ្មោះ កាវីយ៉ា (Caviar) ដែលជាប្រភេទពងត្រីសម្បូរទៅដោយវីតាមីនសម្បូរបែប មកច្នៃជាអាហារប្រណីតលំដាប់ខ្ពស់សម្រាប់អតិថិជននៅក្នុងប្រទេសកម្ពុជា។
លោក Bernard Matter និងលោក Etienne Chenevier បានសហការជាមួយព្រះអង្គម្ចាស់ ភានុរ័ត្ន ស៊ីសុវត្ថិ បង្កើតជាហាងមួយដែលមានឈ្មោះថា Caviar &Traditions នៅលើអនឡាញ នាំចូលពងត្រីកាវីយ៉ា ដែលមានប្រភពនៅសមុទ្រកាស្ពាន និងសមុទ្រខ្មៅ និងស្ថិតនៅក្នុងប្រទេសរុស្សី អ៊ីរ៉ង់ អាហ្សែបៃហ្សង់ កាហ្សាក់ស្ថាន ប៉ូឡូញ ទួកមេនីស្ថាន ប៊ុលហ្គារី ហ្សកហ្ស៊ី រ៉ូម៉ានី តួកគី និងអ៊ុយក្រែនជាដើម មកផ្គត់ផ្គង់នៅក្នុងទីផ្សារកម្ពុជា។
លោក ហែម វិចិត្រ នាយកផ្នែកលក់ប្រចាំប្រទេសកម្ពុជារបស់ក្រុមហ៊ុន Caviar &Traditions បានមានប្រសាសន៍ថា៖ ពងត្រីកាវីយ៉ាជាអាហារប្រណីតលំដាប់ខ្ពស់ និងមានតម្លៃថ្លៃ ដែលតម្លៃមានចាប់ពី ៣០០០ ដល់៧០០០ ដុល្លារក្នុងមួយគីឡូក្រាម ។
លោកបានបន្តទៀតថា ពងត្រីកាវីយ៉ាជាអំបូរពងត្រីសមុទ្រឈ្មោះ ស្ទឺជិន និងជាអាហារមានតម្លៃខ្ពស់ ព្រោះគេត្រូវចិញ្ចឹមត្រីកាវីយ៉ារហូតដល់ទៅ១៥ឆ្នាំ ទម្រាំវាចម្រើនគ្រប់វ័យអាចផ្តល់ជាពងបាន ។
លោក ហែម វិចិត្រ បានឱ្យដឹងទៀតថា ពងត្រីកាវីយ៉ា គឺចែកចេញជា៣ប្រភេទ ៖ លេខ១ គឺមានឈ្មោះកាវីយ៉ា បេលូហ្គា ដែលមានតម្លៃប្រមាណជាង៣៨០០ដុល្លារអាមេរិកសម្រាប់កន្លះគីឡូក្រាម, ចំណែកប្រភេទលេខ២ គឺមានឈ្មោះថា កាវីយ៉ា អូស៊ីត្រេ ដែលត្រឹមតែកន្លះគីឡូក្រាមមានតម្លៃជាង ១០០០ ដុល្លារអាមរិក រីឯលេខ៣ គឺប្រភេទពងត្រី កាវីយ៉ា បារ៊ី (Caviar Baerii) ដោយក្នុងកន្លះគីឡូមានតម្លៃជាង៦៨០ដុល្លារសហរដ្ឋអាមេរិក។
លោក Etienne Chenevier ប្រធានក្រុមហ៊ុន Caviar & Traditions មានប្រសាសន៍ក្នុងពិធីសម្ពោធជាផ្លូវការនៃការនាំចូលពងត្រីកាវីយ៉ាមកកាន់កម្ពុជាកាលថ្ងៃទី២៧ ខែកុម្ភៈ នៅសណ្ឋាគារសូហ្វីតែលភ្នំពេញភូគីត្រាថា ប្រភេទពងត្រីកាវីយ៉ាសម្បូរដោយវីតាមីនខ្ពស់បំផុត ជាពិសេសមានផ្ទុកជាតិដែកច្រើនមុខសម្រាប់ទ្រទ្រង់សារពាង្គកាយ និងមានជាតិផូស្វ័រ កាល់ស្យូម ផ្លរីន ម៉ាញ៉េស្យូម និងសូដ្យូមជាដើម ដែលសារធាតុទាំងនេះ គឺពិតជាមានសារសំខាន់ធ្វើឱ្យរាងកាយរបស់មនុស្សយើងមានសុខភាពល្អ ជាពិសេសជួយដល់ស្បែកនិងសក់ឱ្យកាន់តែស្រស់ស្អាត។
លើសពីនេះ លោកនាយកប្រតិបត្តិក្រុមហ៊ុន Caviar & Traditions បានបញ្ជាក់ថា ពងត្រីកាវីយ៉ា អាចពិសារជាមួយគ្រឿងផ្សំមួយចំនួនដូចជា ដំឡូងបារាំង នំប៉័ង ស្លឹកខ្ទឹម គ្រីម ស្កាឡុប អយស្ទ័រ ព្រមទាំងស្រាសម្ប៉ាញ (C h a m p a g n e B O L L I N G E R) និង ស្រាវ៉ូដកាជាដើម។
សម្រាប់ព័ត៌មានលម្អិត លោកអ្នកអាចទំនាក់ទំនងទៅកាន់លេខ ៖ 012 336-251/081 336-251 ឬលោកអ្នកអាចចូលទៅកាន់គេហទំព័រ ៖ www.caviar-tradition.com
ចែករំលែកព័តមាននេះ