ខេត្តកំពង់ស្ពឺ ៖ សមត្ថកិច្ចនគរបាលខេត្តបានបំបែកករណីមនុស្សឃាតដោយចេតនា ដែលកើតឡើងកាលពីថៃ្ងទី៤ មីនា បង្កឡើងដោយជនមិនស្គាល់អត្ដសញ្ញាណម្នាក់ ដែលបានយកពូថៅកាប់ជនរងគ្រោះឱ្យរងរបួសជាច្រើនកន្លែងជាទម្ងន់ និងត្រូវបានសាច់ញាតិបញ្ជូនទៅសង្គ្រោះភា្លមៗនៅមន្ទីរពេទ្យ ។ ការឃាត់ខ្លួននេះ…
ខេត្តកំពង់ស្ពឺ ៖ សមត្ថកិច្ចនគរបាលខេត្តបានបំបែកករណីមនុស្សឃាតដោយចេតនា ដែលកើតឡើងកាលពីថៃ្ងទី៤ មីនា បង្កឡើងដោយជនមិនស្គាល់អត្ដសញ្ញាណម្នាក់ ដែលបានយកពូថៅកាប់ជនរងគ្រោះឱ្យរងរបួសជាច្រើនកន្លែងជាទម្ងន់ និងត្រូវបានសាច់ញាតិបញ្ជូនទៅសង្គ្រោះភា្លមៗនៅមន្ទីរពេទ្យ ។ ការឃាត់ខ្លួននេះ ធ្វើឡើង២ថ្ងៃក្រោយពីកើតហេតុកាលពីថ្ងៃទី៦ ខែមីនា នៅភូមិព្រះខែ ឃុំដំបូករូង ស្រុកភ្នំស្រួច ដែលជនសង្ស័យឈ្មោះសៀង ឈឺន ភេទប្រុស អាយុ៥៣ឆ្នាំ ។
ក្រោយការឃាត់ខ្លួនជនសង្ស័យបានឆ្លើយសារភាពថា មូលហេតុដែលឈានទៅដល់ការលបកាប់ប៉ុនប៉ងសម្លាប់នេះ គឺផ្ដើមចេញពីគំនុំផ្ទាល់ខ្លួនជាមួយជនរងគ្រោះ ដែលកើតមានយូរថៃ្ងមកហើយ ។ ទោះជាយ៉ាងណា ជនសង្ស័យមិនបានប្រាប់ពីមូលហេតុនៃការគុំកួននេះទេ ។ បន្ទាប់ពីសាកសួររួច នៅរសៀលថ្ងៃទី៦ ខែមីនាដដែលនោះ សមត្ថកិច្ចបាននាំខ្លួនជនសង្ស័យទៅចង្អុលបង្ហាញវត្ថុតាង គឺពូថៅដៃដែលលាក់ទុកនៅក្នុងកេសក្រដាសដាក់ទឹកបរិសុទ្ធ នៅតូបលក់ដូរផ្ទះជនសង្ស័យតែម្ដង ។
សូមរំលឹកថា កាលពីថ្ងៃទី៤ ខែមីនា វេលាម៉ោង៦និង១០នាទីល្ងាច បុរសម្នាក់ឈ្មោះ ឃួនចាន់ អាយុ៦៣ឆ្នាំ ជាកសិករ រស់នៅភូមិព្រះខែ ឃុំដំបូករូង ស្រុកភ្នំស្រួច បានត្រូវជនម្នាក់ដែលពាក់ម៉ាស់និងរុំក្រមាមិនឱ្យស្គាល់ ស្ទាក់កាប់នៅចំណុចថ្លុកកក់ ខាងជើងភូមិព្រះខែ បណ្តាលឲ្យរងរបួសដៃឆ្វេង និងផ្ទៃមុខជាទម្ងន់ ។
ភ្លាមៗ ជនរងគ្រោះត្រូវបានលោកមេឃុំ និងនគរបាលប៉ុស្តិ៍ដំបូករូង ព្រមទាំងសាច់ញាតិក្រុមគ្រួសារ បញ្ជូនទៅព្យាបាលនៅមន្ទីពេទ្យបង្អែកខេត្ត ។
ហេតុការណ៍នេះ កើតឡើងខណ:ជនរងគ្រោះជិះម៉ូតូនៅតាមផ្លូវលំក្រាលក្រួសក្រហម ត្រឡប់មកពីយកអាគុយបញ្ចូលភ្លើង នៅភូមិកូនត្រុំ ឃុំត្រែងត្រយឹង ស្រុកភ្នំស្រួច ។ សមត្ថកិច្ចនគរបាលបានប្រាប់នៅព្រឹកថ្ងៃទី
៧ ខែមីនាថា ការវែកមុខជនដៃដល់បានជោគជ័យនេះ គឺមានការបញ្ជាផ្ទាល់ពីលោកស្នងការនគរបាលខេត្ត លោកស្នងការរង និងអធិការស្រុក បានធ្វើការស្រាវជ្រាវបន្ទាន់មួយតាមចាប់មុខសញ្ញាសង្ស័យខាងលើ ខណៈជននេះនៅផ្ទះរបស់ខ្លួនធ្វើហាក់ដូចជាមិនដឹងរឿង ។ ក្រោយពីកសាងសំណុំរឿង និងស្តាប់ចម្លើយសារភាពរបស់ជនសង្ស័យរួចមក សមត្ថកិច្ចនគរបាលស្រុកបានបញ្ជូនជនសង្ស័យទៅការិយាល័យព្រហ្មទណ្ឌខេត្ត ដើម្បីចាត់ការបន្ត ៕
ចែករំលែកព័តមាននេះ