រដ្ឋធានីវ៉ាស៊ីនតោន ៖ លោកប្រធានាធិបតី ដូណាល់ ត្រាំ បាននិយាយកាលពីថ្ងៃចន្ទ អំពីលទ្ធភាពនៃការដកពន្ធលើផលិតផលដែកថែប និងអាលុយមីញ៉ូមនាំចូល ប្រសិនបើកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA)…
រដ្ឋធានីវ៉ាស៊ីនតោន ៖ លោកប្រធានាធិបតី ដូណាល់ ត្រាំ បាននិយាយកាលពីថ្ងៃចន្ទ អំពីលទ្ធភាពនៃការដកពន្ធលើផលិតផលដែកថែប និងអាលុយមីញ៉ូមនាំចូល ប្រសិនបើកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) សម្រេចជាថ្មីជាមួយលក្ខខណ្ឌដែលអាមេរិកចង់បាន ។
លោកបាននិយាយនៅលើ Twitter កាលពីព្រឹកថ្ងៃចន្ទថា ៖« ពួកយើងមានឱនភាពពាណិជ្ជកម្មយ៉ាងធំជាមួយប្រទេសម៉ិកស៊ិក និងកាណាដា ។ NAFTA កំពុងតែស្ថិតក្រោមការចរចាជាថ្មី វាជាកិច្ចព្រមព្រៀងមិនល្អសម្រាប់សហរដ្ឋអាមេរិក ដែលធ្វើឲ្យការងារ និងក្រុមហ៊ុនជាច្រើនបានផ្លាស់ប្តូរទីតាំង ។ ពន្ធលើដែកថែប និងអាលុយមីញ៉ូមនាំចូលនឹងដកចេញ ប្រសិនបើកិច្ចព្រមព្រៀង NAFTA ថ្មីនេះមានភាពយុត្តិធម៌សម្រាប់អាមេរិក » ។
លោកបន្ថែមថា ៖« ជាមួយគ្នានេះ ប្រទេសកាណាដាត្រូវតែធ្វើល្អដាក់កសិកររបស់យើងជាងមុន ។ ប្រទេសម៉ិកស៊ិកក៏ត្រូវចេញសកម្មភាពបន្ថែមដើម្បីទប់ស្កាត់គ្រឿងញៀនហូរចូលមកកាន់សហរដ្ឋអាមេរិក ប៉ុន្តែពួកគេមិនបានធ្វើអ្វីដែលត្រូវធ្វើទេ ។ មនុស្សរាប់លាននាក់កំពុងតែញៀនថ្នាំ និងស្លាប់ » ។
លោក Luis Videgaray Caso រដ្ឋមន្ត្រីការបរទេសរបស់ប្រទេសម៉ិកស៊ិកបានឆ្លើយតបថា បញ្ហាគ្រឿងញៀននេះ គឺជាទំនួលខុសត្រូវរបស់ប្រទេសទាំងពីរ ។
លោកត្រាំ ធ្លាប់បាននិយាយថា លោកនឹងដាក់ពន្ធ២៥%លើដែកថែប និងពន្ធ១០%លើអាលុយមីញ៉ូមនាំចូលផងដែរ ។
លោក Peter Navarro ទីប្រឹក្សាពាណិជ្ជកម្មរបស់ White House បានប្រាប់កាលពីថ្ងៃអាទិត្យថា គ្មានប្រទេសណាមួយអាចរួចខ្លួនពីពន្ធទាំងនេះឡើយ ។ លោកបាននិយាយកាលពីថ្ងៃអាទិត្យថា លោកប្រធានាធិបតីត្រាំ នឹងសម្រេចលើពន្ធទាំងនេះនាសប្តាហ៍នេះ ឬក្រោយ ។
ប៉ុន្តែលោករដ្ឋមន្ត្រីពាណិជ្ជកម្ម Wilbur Ross បានទុកពេលវេលាខ្លះដើម្បីឲ្យលោកត្រាំ ផ្លាស់ប្តូរគំនិតនេះ ៕
ចែករំលែកព័តមាននេះ