ខេត្តបាត់ដំបង ៖ ប្រតិភូកងកំលាំងការពារព្រំដែនខេត្តច័ន្ទបូរី-ត្រាតប្រទេសថៃ បានចូលជួបសំណេះសំណាលជាមួយយោធភូមិភាគទី៥ ក្នុងទឹកដីខេត្តបាត់ដំបង កាលពីរសៀលថ្ងៃទី០៥ មីនា ដើម្បីពង្រឹងសម្ព័ន្ធមេត្រីភាព និងរួមកិច្ចសហប្រតិបត្តការរវាងកងកម្លាំងនៃប្រទេសទាំងពីរ ដែលឈរជើងនៅតាមព្រំដែនជាមួយគ្នា…
ខេត្តបាត់ដំបង ៖ ប្រតិភូកងកំលាំងការពារព្រំដែនខេត្តច័ន្ទបូរី-ត្រាតប្រទេសថៃ បានចូលជួបសំណេះសំណាលជាមួយយោធភូមិភាគទី៥ ក្នុងទឹកដីខេត្តបាត់ដំបង កាលពីរសៀលថ្ងៃទី០៥ មីនា ដើម្បីពង្រឹងសម្ព័ន្ធមេត្រីភាព និងរួមកិច្ចសហប្រតិបត្តការរវាងកងកម្លាំងនៃប្រទេសទាំងពីរ ដែលឈរជើងនៅតាមព្រំដែនជាមួយគ្នា ។
ភាគីថៃមានចំនួន៣០នាក់ ដែលដឹកនាំដោយលោកឧត្តមសេនីយ៍ទោ រតនះ វង្សារោធ និងលោកជំទាវ ភរិយាមេទ័ពចំនួន២០នាក់ បានមកចូលរួមផងដែរ ដោយមានកិច្ចទទួលស្វាគមន៍ពីលោកឧត្តមសេនីយ៍ឯកប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ និងមេបញ្ជាការរង នាយ-នាយរងសេនាធិការ មេបញ្ជាការតំបន់ប្រតិបត្តការសឹករងទាំង៤ និង៣កងពល ចំណុះយោធភូមិភាគទី៥ ព្រមទាំងលោកជំទាវខាងកម្ពុជាទទួលស្វាគមន៍ផងដែរ។
លោកឧត្តមសេនីយ៍ឯក ប៊ុន សេង ភាគីកម្ពុជាបានបញ្ជាក់ថា កាលពីឆ្នាំ២០១៧ យើងបានជួបប្រាស្រ័យពង្រឹងសម្ព័ន្ឋមេត្រីភាពជាមួយគ្នាបានចំនួន២លើករួចមកហើយ ដោយឡែកនេះជាលើកទី៣ក្នុងឆ្នាំ២០១៨នេះ យើងបន្តរួមគ្នាតាមគោលនយោបាយនៃប្រទេសយើងទាំងពីរ បានដាក់មកឲ្យពង្រឹងរួមកិច្ចសហប្រតិបត្តិការរួមគ្នាដើម្បីអភិវឌ្ឍន៍លើគ្រប់វិស័យដែលមានដូចជា វិស័យពាណិជ្ជកម្ម កសិកម្ម វប្បធម៌ ទេសចរណ៍ អប់រំ-កីឡា សុខាភិបាល បណ្តុះបណ្តាលវិជ្ជាជីវះ និងសង្គមកិច្ចជាដើម។
លោកឧត្តមសេនីយ៍ឯកបានបន្តថា ចុងឆ្នាំ២០១៧កន្លងមកនេះសម្តេចពិជ័យសេនាទៀ បាញ់ ឧបនាយក រដ្ឋមន្ត្រី រដ្ឋមន្ត្រីក្រសួងការពារជាតិ បានជួបប្រជុំជាមួយលោកឧត្តមសេនីយ៍ឯក វិជិត យ៉ាធិប ប្រធានសមាគមមិត្តភាពថៃ-កម្ពុជានៅវិមានសន្តិភាពក្រុងភ្នំពេញ បានជំរុញឲ្យមានការរឹតចំណងមិត្តភាព សាមគ្គីភាពកិច្ចសហប្រតិបត្តការរួមគ្នាបន្ថែមទៀត ព្រោះលទ្ឋផលកន្លងមក ឃើញបងប្អូនដែលរស់នៅតាមព្រំដែនកំពុងទទួលបានក្តីសុខរួមគ្នា សំខាន់ជីវភាពនៃការរស់នៅផ្លាស់ប្តូរពីគ្នាទៅវិញទៅមកឃើញថាមានការស្រឡាញ់គ្នាដូចបងប្អូន និងការរីកចំរើនលើសពីពេលមុន នេះអ្វីដែលប្រជាជនរស់នៅទាំងសងខាងដែលចង់បានកន្លងមក។
លោកឧត្តមសេនីយ៍ទោ រតនះ វង្សារោធ ភាគីថៃបានថ្លែងថា វាជាលទ្ឋផលល្អដែលយើងបានរួមសហប្រតិបត្តការជាមួយគ្នាដោយផ្តោតលើសុខសន្តិភាពនិងការអភិវឌ្ឍជាមួយគ្នា ដោយបានគិតផលប្រយោជន៍ទៅលើជីវភាពប្រជាពលរដ្ឋរស់នៅរកស៊ីជាមួយគ្នានៅតាមព្រំដែន ហើយមានក្តីសុខ នេះជាគោលជំហរដែលយើងចង់បានដូចគ្នា ហើយសូមបន្តពង្រឹងទំនាក់ទំនងល្អជាមួយគ្នាបន្តទៀត ដោយផ្លាស់ប្តូរសិក្សាស្រាវជ្រាវ ចែករំលែកបទពិសោធន៍ពីគ្នាទៅវិញទៅមក និងផ្តល់ផ្លាស់ប្តូរព័ត៌មានឲ្យកាន់តែទូលំទូលាយបន្ថែមទៀត ដើម្បីរួមគ្នាទប់ស្កាត់រាល់បទល្មើសដែលកើតមានឡើងតាមព្រំដែន បន្តរួមសហប្រតិបត្តការបន្តយោគយល់គ្រប់សមត្ថកិច្ច ជំនាញទាំងអស់កាត់បន្ថយរាល់បញ្ហាដែលតែងតែកើតមានឡើងកន្លងមកនោះ។
ចែករំលែកព័តមាននេះ