រាជធានីភ្នំពេញ ៖ ការចរចាឡើងវិញនូវកិច្ចព្រមព្រៀងពាណិជ្ជកម្មសេរីអឺរ៉ុប-អាស៊ាន បានក្លាយជាប្រធានបទដ៏សំខាន់នៃកិច្ចប្រជុំពិគ្រោះយោបល់ពាណិជ្ជកម្មរវាងរដ្ឋមន្ត្រីសេដ្ឋកិច្ចអាស៊ាន-អឺរ៉ុប លើកទី១៦ (16th AEM-EU) ដែលបានរៀបចំឡើងកាលពីថ្ងៃទី២ មីនា កន្លងមកនេះ ។
យោងតាមសារព័ត៌មាន Straits Times របស់សាធារណរដ្ឋសិង្ហបុរី ដែលដកស្រង់ដោយគេហទំព័រហ្វេសប៊ុកផ្លូវការរបស់ក្រសួងពាណិជ្ជកម្ម សហភាពអឺរ៉ុបនិងអាស៊ាន បានសន្យានឹងពន្លឿនការចរចាកិច្ចព្រមព្រៀងពាណិជ្ជកម្មសេរីនេះឡើងវិញ ដើម្បីគាំទ្រការធ្វើពិពិធកម្មទីផ្សារ ទប់ទល់នឹងការកើនឡើងនៃរបបគាំពារនិយមរបស់សហរដ្ឋអាមេរិក ដឹកនាំដោយលោកប្រធានាធិបតី Donald Trump ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជារដ្ឋមន្ត្រីសេដ្ឋកិច្ចអាស៊ានរបស់កម្ពុជា បានបង្ហាញទស្សនៈវិជ្ជមានចំពោះកិច្ចព្រមព្រៀងនេះថា នឹងអាចនាំមកនូវអត្ថប្រយោជន៍យ៉ាងច្រើនសម្រាប់គ្រប់ភាគីពាក់ព័ន្ធ ជាពិសេសប្រទេសកម្ពុជា ។
លោករដ្ឋមន្ត្រីបញ្ជាក់ថា ៖« ខ្ញុំជឿថា ការចរចា (កិច្ចព្រមព្រៀងពាណិជ្ជកម្មសេរី) នេះ នឹងចាប់ផ្តើមសាជាថ្មី នៅក្នុងពេលឆាប់ៗខាងមុខ»។
ទន្ទឹមគ្នានេះ ស្នងការពាណិជ្ជកម្មសហភាពអឺរ៉ុប លោកស្រី Anna Cecilia Malmstrom ក៏បានយល់ស្របថា កិច្ចព្រមព្រៀងនេះមានសារសំខាន់ និងជាផ្នែកមួយនៃរូបភាពសហប្រតិបត្តិការដ៏ធំ ។
លោកស្រីថា ៖« កិច្ចព្រមព្រៀងក្នុងតំបន់របស់យើង គឺជាសញ្ញាដ៏រឹងមាំមួយទៅកាន់ពិភពលោកថា សហភាពអឺរ៉ុប និងអាស៊ាននឹងឈរកៀកស្មាគ្នា ដើម្បីគាំទ្រការបើកចំហពាណិជ្ជកម្ម » ។
លោកស្រីបញ្ជាក់ថា សហភាពអឺរ៉ុបសម្លឹងឃើញថា ជាដំណើរការបង្កើតប្លុកមួយឆ្ពោះទៅរកការធ្វើសមាហរណកម្មទូលំទូលាយ ។
គួររំឭកថា សហភាពអឺរ៉ុបតំណាងឲ្យប្រទេសចំនួន២៨ និងសមាគមប្រជាជាតិអាស៊ីអាគ្នេយ៍ តំណាងឲ្យប្រទេសចំនួន១០ បានធ្វើការពិភាក្សាគ្នា អំពីការបង្កើតកិច្ចព្រមព្រៀងពាណិជ្ជកម្មសេរីជាច្រើនឆ្នាំមកហើយ ដែលការចរចាលើកដំបូង បានធ្វើឡើងនៅក្នុងឆ្នាំ២០០៧ ប៉ុន្តែភាគីទាំងពីរបានលុបចោលកិច្ចព្រមព្រៀងនេះ ក្នុងរយៈពេល២ឆ្នាំក្រោយមក ។ បន្ទាប់មក កាលពីឆ្នាំ២០១៧ អាស៊ាននិងអឺរ៉ុប បានឯកភាពគ្នាក្នុងការដាក់កិច្ចព្រមព្រៀងនេះចូលទៅក្នុងរបៀបវារៈប្រជុំ ប៉ុន្តែត្រូវបានដកចេញ មុនកិច្ចប្រជុំជាផ្លូវការចាប់ផ្តើម ៕
ចែករំលែកព័តមាននេះ