ខេត្តព្រះសីហនុ ៖ ឆ្នាំនេះ ទីផ្សារដូងក្រអូបមានតម្រូវការខ្ពស់ ខណៈឈ្មួញកណ្ដាលជាច្រើនបានដើរប្រមូលទិញដល់ចម្ការខុសប្លែកពីឆ្នាំកន្លងទៅ ។ នេះបើយោងតាមការបញ្ជាក់ពីម្ចាស់ចម្ការដូងក្រអូបមួយកន្លែងដែលមានទីតាំងនៅក្នុងភូមិស្មាច់ដែង ឃុំរាម ស្រុកព្រៃនប់ ។…
ខេត្តព្រះសីហនុ ៖ ឆ្នាំនេះ ទីផ្សារដូងក្រអូបមានតម្រូវការខ្ពស់ ខណៈឈ្មួញកណ្ដាលជាច្រើនបានដើរប្រមូលទិញដល់ចម្ការខុសប្លែកពីឆ្នាំកន្លងទៅ ។ នេះបើយោងតាមការបញ្ជាក់ពីម្ចាស់ចម្ការដូងក្រអូបមួយកន្លែងដែលមានទីតាំងនៅក្នុងភូមិស្មាច់ដែង ឃុំរាម ស្រុកព្រៃនប់ ។
លោក សុខ រំដួល ម្ចាស់ចម្ការដូងរូបនេះបានឲ្យដឹងកាលពីថ្ងៃទី២១ កុម្ភៈថា ទីផ្សារដូងក្រអូបពេលនេះកំពុងពេញនិយមយ៉ាងខ្លាំងពីសំណាក់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលមកលេងកម្សាន្ដនៅខេត្តព្រះសីហនុ ធ្វើឲ្យឈ្មួញកណ្ដាលចុះមកទិញដល់ចម្ការតែម្ដង ខុសប្លែកពីពេលកន្លងទៅ ។
លោកបន្ដថា ៖« ឥឡូវនេះ ឈ្មួញកណ្តាលមកប្រមូលទិញដល់ក្នុងចម្ការតែម្ដង ដោយមិនចាំបាច់ដើររកទីផ្សារដូចមុនទេ ហើយបងប្អូនកសិករមួយចំនួនក៏ចាប់អារម្មណ៍មកទិញកូនដូងយកទៅដាំដែរ ដែលខុសពីឆ្នាំមុនៗ ពុំមានអ្នកចាប់អារម្មណ៍ដាំដំណាំនេះទេ» ។
ចំពោះទីផ្សារវិញ លោកថា ៖« ឈ្មួញដែលមកប្រមូលទិញនេះ ក្នុង១ផ្លែតម្លៃ២.០០០រៀល ហើយកូនដូង១ដើម តម្លៃ១,២ម៉ឺនរៀល ប៉ុន្ដែសម្រាប់បងប្អូនក្រីក្រខ្វះលទ្ធភាព ខ្ញុំបានបញ្ចុះតម្លៃ ឬឧបត្ថម្ភដល់ពួកគាត់ដោយឥតគិតថ្លៃសម្រាប់ដាំដុះជាលក្ខណៈគ្រួសារ» ។
តាមការបញ្ជាក់ពីម្ចាស់ចម្ការរូបនេះថា លោកបានដាំដូងក្រអូបនៅក្នុងឆ្នាំ២០០១ ដែលកាលណោះ ពុំមានអ្នកចាំអារម្មណ៍ដាំដុះទេ ។ គិតរហូតមកដល់ពេលនេះ លោកមានដូងក្រអូបចំនួន១,៣ម៉ឺនដើម ដាំដុះលើផ្ទៃដីទំហំជាង១០០ហិកតា ដែលបានហុចផលរយៈពេល១៥ឆ្នាំហើយ ហើយលោកបានកែច្នៃផលិតផលជាច្រើនមុខចេញពីដូងក្រអូបនេះ រួមមាន ចាហ៊ួយដូង ការ៉ែមដូង ទឹកក្រឡុកដូង កាហ្វេដូង និងសល់ពីនោះ លោកបានបណ្តុះកូនលក់នៅលើទីផ្សារថែមទៀតផង រីឯមួយចំនួនទៀតបានលក់នៅលើទីផ្សារទូទាំងប្រទេស ។
លោកបន្ថែមថា នៅលើផ្ទៃដីជាង១០០ហិកតានេះទៀតសោត ក្រៅពីដំណាំដូងក្រអូប លោកក៏បានដាំដំណាំរួមផ្សំជាច្រើនទៀតដូចជា ព្រីង, ស្វាយ និងម្នាស់ ជាដើម ហើយនៅថ្ងៃខាងមុខ លោកគ្រោងពង្រីកការដាំដុះបន្ថែមទៀត ដើម្បីឲ្យកន្លែងនេះក្លាយជាតំបន់កសិ-ទេសចរណ៍ដ៏មានប្រជាប្រិយភាពនៅក្នុងខេត្តព្រះសីហនុ បន្ទាប់ពីខេត្តមានឆ្នេរខ្សាច់ដ៏ស្រស់ស្អាត និងមានកោះប្រកបដោយសក្ដានុពលទេសចរណ៍ជាច្រើន ដែលកំពុងល្បីល្បាញលើពិភពលោក ។
អ្នកជំនាញដំណាំដូងរូបនេះលើកឡើងថា ដំណាំដូងក្រអូប វាមិនពិបាកថែទាំដូចដំណាំផ្សេងទេ គឺវាត្រូវការតែទឹក និងជីបំប៉នគល់ប៉ុណ្ណោះ និងយូរៗម្ដង មានសត្វល្អិតតិចតួចមកយាយី ហើយត្រឹមតែរយៈពេល៣ឆ្នាំប៉ុណ្ណោះ វាអាចផ្តល់ទិន្នផលមកវិញ ដោយពុំប្រើពេលវេលាយូរទេ ។
លោកប្រាប់ឲ្យដឹងថា ៖« ក្នុងអាជីពធ្វើចម្ការដូងក្រអូបយូរជាងគេនៅខេត្តព្រះសីហនុ ខ្ញុំក៏ធ្លាប់បានទទួលចំណាត់ថ្នាក់លេខ១ និងលិខិតសរសើរពីក្រសួងកសិកម្ម និងសម្តេចតេជោ ហ៊ុន សែន នាយករដ្ឋមន្ត្រីផងដែរ »។
ឈ្មួញដែលបានទៅទិញដល់ចម្ការដូងក្រអូបនេះបាននិយាយថា តម្លៃដូងដែលលោកទិញពីម្ចាស់ចម្ការនេះ ក្នុង១ផ្លែ២.០០០រៀល និងលក់ចេញវិញក្នុងតម្លៃ៣.០០០ទៅ៤.០០០រៀល ហើយលក់ដាច់ណាស់ មានប៉ុន្មានក៏មិនសល់ដែរ ព្រោះវាមានក្លិនក្រអូប ទឹកមានរសជាតិផ្អែម ពិសាហើយមានកម្លាំងតែម្ដង។ ដូច្នេះហើយ បានជាពលរដ្ឋទូទៅ ក៏ដូចជាភ្ញៀវទេសចរបរទេសចូលចិត្តពិសា ។
លោកថា ៖« ប្រជាពលរដ្ឋដែលមានដីទំនេរ គួរតែងាកមកដាំប្រភេទដូងក្រអូបនេះវិញ ព្រោះវាមានរយៈពេលខ្លី មិនពិបាកថែទាំ និងមានតម្រូវការខ្ពស់លើទីផ្សារ » ។
អ្នកស្រាវជ្រាវខាងវិស័យកសិកម្មមើលឃើញថា ដូងជាដំណាំកសិ-ឧស្សាហកម្មសំខាន់មួយក្នុងចំណោមដំណាំហូបផ្លែជាច្រើនទៀតដែលគួរពង្រីកការដាំដុះនៅកម្ពុជា ។
លោក ខាន់ ចន្ធី អ្នកស្រាវជ្រាវរូបនេះបានប្រាប់កោះសន្ដិភាពកាលពីថ្ងៃទី១ មីនា ម្សិលមិញថា ៖« នៅបណ្ដាប្រទេសក្នុងសហភាពអឺរ៉ុបគេនាំចូលប្រេងដូងច្រើនណាស់យកទៅផលិតជាគ្រឿងសម្អាង ជាឱសថ និងផ្នែកវេជ្ជសាស្ត្រ ផ្សេងៗ ហើយបើពិនិត្យមើលនៅតំបន់អាស៊ានយើងហ្នឹង ប្រទេសហ្វីលីពីននាំចេញដូងច្រើនជាងគេ »។
លោកថា ៖« គ្រាន់តែចំណូលពីការនាំចេញដូងរបស់ហ្វីលីពីន លើសយើងនាំចេញស្រូវទូទាំងប្រទេសទៅទៀត ។ ដូច្នេះដំណាំដូងនេះវាសំខាន់ណាស់ ខណៈយើងមានប្រទេសបារាំងដែលជាដៃគូល្អ ងាយស្រួលក្នុងការចែកចាយផលិតផលរបស់យើងជ្រាចចូលទីផ្សារអឺរ៉ុប » ៕
ចែករំលែកព័តមាននេះ