ខេត្តព្រៃវែង ៖ រថយន្តយីឌុបភ្លៅ៥មួយគ្រឿង បានប្រះខ្លួនដេកនៅនិងចិញ្ចើមថ្នល់ និងចាក់ចោលស្រូវរាប់សិបតោនទៅលើដី ដោយសារតែបើកធ្លាក់ចូលគន្លងផ្លូវដែលគេកំពុងឈូសឆាយ ។
គ្រោះថ្នាក់ចរាចរនេះ បានកើតឡើងកាលពីវេលាម៉ោង០៥ទាបភ្លឺ ថ្ងៃទី០២ ខែមីនា ឆ្នាំ២០១៨ នៅចំណុចគល់ស្ពានប៉ូស្តិ៍អំពិលក្រៅ ចន្លោះគីឡូម៉ែត្រលេខ៦៧ ក្នុងឃុំអំពិលក្រៅ ស្រុកស៊ីធរកណ្តាល ខេត្តព្រៃវែង ។ រថយន្តដែលក្រឡាប់បះជើងមួយចំហៀងនេះ ម៉ាកហ៊ីយ៉ាន់ដាយភ្លៅ៥ ពណ៌ស ពាក់ស្លាកលេខ កំពង់ចាម ៣A-២២២៣ បើកបរដោយឈ្មោះ អ៊ូ ចន្ថន ភេទប្រុស អាយុ៣៣ឆ្នាំ បានរងរបួសបាក់ជើងស្តាំ និងមានទីលំនៅក្នុងស្រុកពាមរក៌ ខេត្តព្រៃវែង ។
ប្រភពព័ត៌មានពីសាក្សីនៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេឃើញរថយន្តខាងលើដែលមានដឹកស្រូវពេញរថយន្ត បានធ្វើដំណើរមកក្នុងទិសដៅពីជើងទៅត្បូង លុះពេលបើកមកដល់គល់ស្ពានកន្លែងកើតហេតុ ស្រាប់តែរថយន្តធ្លាក់កង់មុខចូលទៅក្នុងគន្លងផ្លូវ ដែលគេកំពុងឈូសឆាយធ្វើផ្លូវ ទើបធ្វើឲ្យរថយន្តផ្អៀងក្រឡាប់ទៅឆ្វេង ចាក់ស្រូវចោលទៅក្រោមថ្នល់ ឯក្បាលរថយន្តបានសង្កត់ទៅលើបង្កាន់ដៃស្ពាន បណ្តាលឲ្យបាក់បង្កាន់ដៃស្ពានអស់៥ម៉ែត្រ ចំណែកអ្នកបើកបរត្រូវកាប៊ីនរថយន្តកៀបជាប់ជើងស្តាំ បណ្តាលឲ្យបាក់ជើង ហើយត្រូវបានអ្នកស្រុកជួយគាស់យកចេញពីរថយន្ត និងដឹកយកទៅព្យាបាលនៅមន្ទីរពេទ្យភ្លាមៗផងដែរ ។
ករណីនេះ សមត្ថកិច្ចបានសន្និដ្ឋានថា បណ្តាលមកពីអ្នកបើកបររថយន្តខ្លួនឯង បើកបរដោយខ្វះការប្រុងប្រយ័ត្ន នេះសំណាងហើយ ពេលដែលកើតហេតុគ្មានអ្នកដំណើរណាផ្សេងនៅក្បែរ កុំអីបង្កគ្រោះថ្នាក់ដល់អ្នកដទៃថែមទៀត ៕
ចែករំលែកព័តមាននេះ