រាជធានីភ្នំពេញ ៖ ក្នុងសម្ដីប៉ុន្មានម៉ាត់ដែលលោកយូឌីស្កូ ថ្លែងទៅកាន់ដៃគូសម្តែងអ្នកនាង ទូច ស្រីលក្ខណ៍ បានឆក់ចិត្តនាងឱ្យរន្ធត់សង្វេគអាណិតពេកក្រៃ ដោយលោកយូឌីស្កូ ជាប់ហានិភ័យម្តងទៀត គឺរឿងចំណាយថ្លៃព្យាបាលជំងឺទឹកនោមប្រៃកាន់តែខ្ពស់ឡើងៗ រហូតរីងរៃខ្លួនចង់អស់អ្វីដែលជាទ្រព្យផ្ទាល់ខ្លួន។
មកទល់ពេលនេះ យោងតាមស្ថានភាពចុងក្រោយរបស់តារាសម្តែងលោកយូឌីស្កូ នៅមិនទាន់ប្រសើរឡើយ។ អាការៈជំងឺទឹកនោមប្រៃរបស់លោកនៅតែចំណាយខ្ពស់ជាប្រចាំ ហើយដោះដូរឈាមជាញឹកញាប់។ កាន់តែនឹកខ្លោចចិត្តលោកបានពោលពាក្យទៅកាន់ដៃគូសម្តែងអ្នកនាង ទូច ស្រីលក្ខណ៍ ឱ្យជួយលោកផង ព្រោះស្ថានភាពកាន់តែយ៉ាប់យឺនហើយក្នុងការខើចឡើងៗនៃប្រាក់ព្យាបាល។ ជាពិសេសលោកថែមទាំងប្រាប់អ្នកនាង ទូច ស្រីលក្ខណ៍ថា លោកចង់រស់ មិនចង់ស្លាប់ឡើយ។
អ្នកនាង ទូច ស្រីលក្ខណ៍ បានសរសេរលើបណ្តាញសង្គមរបស់នាងទាក់ទិនស្ថានភាពនឹកអាណិតលោកយូឌីស្កូថា «ពាក្យមួយម៉ាត់បងនិយាយមកកាន់ខ្ញុំថា បងចង់រស់ ចង់ឱ្យជីវិតបងដូចដើមវិញ ពេលលឺពាក្យនេះ ប្អូនខ្លោចផ្សាណាស់ ប្អូនមានតែកម្លាំងចិត្ត និងថវិកាបន្តិចបន្តួច ហើយក្នុងនាមខ្ញុំជាមិត្តរួមអាជីព សូមលើកដៃអំពានាវ សូមសំណូមពរដល់ឯកឧត្តម លោកឧកញ៉ា លោកជំទាវ លោកស្រី ប្រិយមិត្ត ព្រមទាំងបងប្អូនទាំងអស់សូមជួយថវិកាដល់គាត់ខ្លះផង តិចតួចក្តី ព្រោះគាត់គ្មានលទ្ធភាពទៀតទេ ពាក្យមួយម៉ាត់គាត់និយាយថា ចង់រស់នៅបន្ត បងប្អូនលឺហើយ ពិតជាខ្លោចផ្សាក្នុងចិត្តណាស់ បើបងប្អូនចង់ជួយថវិកាដល់គាត់អាចទាក់ទង់មកលេខខ្ញុំផ្ទាល់បាន 015 595 545 ឬក៏អាចទៅជូនថវិកាដល់គាត់ផ្ទាល់ជាមួយខ្ញុំក៏បានដែរ សូមអរគុណដោយក្តីគោរពអំពីខ្ញុំ ទូច ស្រីល័ក្ខ»។
កាលពីល្ងាចម្សិលមិញនេះ ទូច ស្រីលក្ខណ៍ និយាយប្រាប់អ្នកយកព័ត៌មានយើងទាំងអួតដើមករថា «បើអត់ពីលោកយូឌីស្កូទៅ ក្រុមគ្រួសារគាត់មានម្តាយបង្កើត ម្តាយមីង ប្អូន ក្មួយត្រូវលំបាកតែម្តង ។ នាងថា គ្រាន់តែគាត់ខលមកថា ជួយគាត់ផង នាងទន់ដៃជើងធ្វើអ្វីមិនកើតទេ អាណិតគាត់ណាស់។ នាងប្រឹងតាមលទ្ធភាពជួយគាត់ហើយ ក៏មានតែការអំពាវនាវដល់សប្បុរសជនមេត្តាជួយគាត់សារជាថ្មី ព្រោះគាត់ជិតអស់លុយព្យាបាលហើយ គ្រាន់តែដូរឈាម៣ថ្ងៃម្តង មួយខែចាយលើដូរឈាមជាង៦០០ដុល្លារទៅហើយ តើគាត់ទៅធ្វើអីកើត? មួយតួខ្លួនគាត់ម្ជុលចាក់ដោតឡើងសុសសាច់អស់ហើយ អាណិតណាស់លោកអើយ។ កាលគាត់នៅមានកម្លាំងគាត់ជួយគេច្រើនណាស់តាមនាងដឹង ហើយអ្វីដែលនាងខ្លោចផ្សាក្នុងចិត្តនោះ គឺអ្នកសិល្បៈមួយផ្នែកមិនសូវស្វះស្វែងជួយសោះ បើនិយាយពីរូបនាងវិញ ជួយគាត់ច្រើនដែរចេះតែប្រឹង។
ទោះជាយ៉ាងណាកន្លងមក លោកយូឌីស្កូ បានសប្បុរសជនជាច្រើនជួយលោកជាច្រើនដែរ មានដល់ថ្នាក់ធំ និងសិល្បករ។ ប៉ុន្តែស្ថានភាពជំងឺលោកត្រូវបានគេនិយាយថា ជាជំងឺអ្នកមានដែលត្រូវការចំណាយច្រើនហួសប្រមាណ។ សារជាថ្មីសូមបងប្អូនទាំងអស់ជួយជាកម្លាំងចិត្តឧបត្ថម្ភដល់លោកយូឌីស្កូម្តងទៀត ព្រោះលោកទាល់ច្រកមានតែការសាងបុណ្យទាំងអស់គ្នា។
ចែករំលែកព័តមាននេះ