រាជធានីភ្នំពេញ ៖ អ្នកលក់ខ្យងរស់នៅចំណុចស្ពាន៧មករា ស្ថិតនៅតាមបណ្ដោយផ្លូវជាតិលេខ៣ ក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ បានរអ៊ូរទាំថា ពួកគាត់លក់មិនសូវដាច់ដូចជាពេលមុនៗសោះ និងចេះតែស្ងាត់ទៅៗ…
រាជធានីភ្នំពេញ ៖ អ្នកលក់ខ្យងរស់នៅចំណុចស្ពាន៧មករា ស្ថិតនៅតាមបណ្ដោយផ្លូវជាតិលេខ៣ ក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ បានរអ៊ូរទាំថា ពួកគាត់លក់មិនសូវដាច់ដូចជាពេលមុនៗសោះ និងចេះតែស្ងាត់ទៅៗ ដោយពុំដឹងពីមូលហេតុ ធ្វើឲ្យអ្នកលក់ខ្យងមួយចំនួនបានបោះបង់របរនេះចោល ។
អ្នកស្រីស្រស់ ហៅម៉ាក់ស្រីឌី បានរៀបរាប់ថា រយៈពេល២០ឆ្នាំហើយដែលអ្នកស្រីលក់តែខ្យងធម្មជាតិ ហើយនៅទីនេះពុំមានអ្នកចំណូលថ្មីចូលទៅលក់ប្រណាំងប្រជែងជាមួយពួកគាត់ទេ ប៉ុន្តែមិនដឹងមូលហេតុអ្វីបានជាលក់មិនសូវដាច់ ហើយនេះមិនមែនមានន័យថា ពួកគាត់លក់ថ្លៃ កាប់ឆៅ មានអ្នកលក់ច្រើន ឬក៏លក់ខ្យងមិនល្អនោះទេ ។
អ្នកស្រីបន្ដថា ការប្រកបរមុខរបរនេះ ថ្វីដ្បិតតែមិនធំដុំ តែជាមុខរបរសុចរិតមួយដែលអាចរកប្រាក់កម្រៃសម្រាប់ផ្គត់ផ្គង់ជីវភាពគ្រួសារបានស្រួល ប៉ុន្ដែបច្ចុប្បន្ន ការលក់បានធ្លាក់ចុះគួរឲ្យកត់សម្គាល់ ។ អ្នកស្រីថា ៖«ជាធម្មតា ក្នុង១ថ្ងៃ ខ្ញុំអាចលក់ខ្យងបាន១០០គីឡូក្រាម ហើយបើចំថ្ងៃបុណ្យ ឬថ្ងៃឈប់សម្រាកវិញ អាចលក់អស់១៥០គីឡូក្រាម ឬអាចលើសពីនេះ ។ ប៉ុន្តែមកសព្វថ្ងៃនេះ បើថ្ងៃធម្មតា អាចលក់អស់ត្រឹមតែ៣០ទៅ៥០គីឡូក្រាមប៉ុណ្ណោះ ប៉ុន្តែបើថ្ងៃបុណ្យ ឬថ្ងៃឈប់សម្រាក អាចដល់ជិត១០០គីឡូក្រាមដែរ» ។
អ្នកស្រីបន្ដថា ខ្យងដែលយកមកលក់នេះ គឺទទួលទិញពីឈ្មួញកណ្ដាលដែលបានដើរប្រមូលទិញពីអ្នកនេសាទតាមបណ្ដាភូមិនានា ដោយទិញចូលក្នុង១គីឡូក្រាម ថ្លៃ៤.០០០ទៅ៥.០០០រៀល តាមតូច ឬធំ និងប្រភេទលេខ១ លេខ២ និងលេខ៣ ហើយលក់ចេញវិញតម្លៃចាប់ពី៦.០០០ទៅ៨.០០០រៀលក្នុង១គីឡូក្រាម ។
អ្នកស្រីបញ្ជាក់ថា ខ្យងស្រែ និងខ្យងបឹងមានលក្ខណៈខុសគ្នា ហើយការទិញចូល និងលក់ចេញ ក៏មានតម្លៃខុសគ្នាដែរ ។
បើទោះបីជាពេលនេះមានអ្នកលក់មួយចំនួនបានបោះបង់ចោល តែសម្រាប់អ្នកស្រីនៅតែបន្ដលក់ ព្រោះថា ក្រោយពីកាត់ចំណាយរួច វានៅតែអាចផ្គត់ផ្គង់ជីវភាពគ្រួសារបាន៕
ចែករំលែកព័តមាននេះ