ទីក្រុងហាណូយ ៖ ក្រសួងហិរញ្ញវត្ថុវៀតណាមបានស្នើឲ្យបង្កើនពន្ធការពារបរិស្ថានលើផលិតផលប្រេង និងប្រេងឥន្ធនៈ ចាប់ពីប្រមាណ១៣សេន ទៅ១៧សេនក្នុង១លីត្រ ចាប់ពីថ្ងៃទី១ ខែកក្កដា ឆ្នាំ២០១៨នេះតទៅ ។
ជាមួយគ្នានេះ ពន្ធការពារបរិស្ថានត្រូវបានស្នើឲ្យបង្កើនលើប្រេងម៉ាស៊ូត និងផលិតផលប្រេងផ្សេងៗមកស្មើជិត១០សេនផងដែរ ។
ថង់ផ្លាស្ទិកក៏នឹងត្រូវបង់ពន្ធបរិស្ថានបន្ថែមដែរ ដែលកើនពីប្រមាណ១,៣២ដុល្លារ ដល់២,២ដុល្លារក្នុង១គីឡូក្រាម ។
កាលពីឆ្នាំមុន ក្រសួងនេះចង់ធ្វើសេចក្តីព្រាងច្បាប់ថ្មីៗលើការបង្កើនពន្ធការពារបរិស្ថានដល់ប្រមាណ៣៥សេនក្នុង១លីត្រ ប៉ុន្តែសំណើនេះមានការប្រឆាំងយ៉ាងខ្លាំងក្លាពីសាធារណជន និងសេដ្ឋវិទូ ។
នៅឆ្នាំ២០១៤ ពន្ធនេះបានកើនដល់១៣សេន ដែលក្រសួងហិរញ្ញវត្ថុនិយាយថា វាជាវិធីល្អសម្រាប់ធ្វើឲ្យថវិការដ្ឋមានលំនឹង ។ ការបង្កើនពន្ធពិតជាចាំបាច់ណាស់ ព្រោះពន្ធនាំចូលលើប្រេង និងប្រេងឥន្ធនៈកំពុងតែធ្លាក់ចុះយ៉ាងខ្លាំង ។
ពន្ធនាំចូលបច្ចុប្បន្នលើផលិតផលប្រេងឥន្ធនៈគឺស្មើ២០% ហើយ៧%សម្រាប់ផលិតផលប្រេងផ្សេងៗ ប៉ុន្តែអត្រានេះនឹងធ្លាក់ចុះ ។
ហេតុនេះ ប្រាក់ចំណូលពីពន្ធប្រេងបានធ្លាក់ចុះជាបន្តបន្ទាប់ក្នុងរយៈពេលប៉ុន្មានឆ្នាំថ្មីៗនេះ។ លើសពីនេះ ក្រសួងកត់សម្គាល់ថា តម្លៃប្រេងលក់រាយនៅវៀតណាមមានកម្រិតទាបជាងប្រទេសជិតខាង និងប្រទេសក្នុងតំបន់អាស៊ីអាគ្នេយ៍ផងដែរ ។
ក្រសួងហិរញ្ញវត្ថុបានគណនាថា ប្រទេសវៀតណាមអាចប្រមូលបានប្រាក់ប្រមាណ២,៥២លានដុល្លារក្នុង១ឆ្នាំពីពន្ធទាំងនេះ ច្រើនជាងពេលបច្ចុប្បន្នដែលប្រមូលបានតែ៧២ម៉ឺនដុល្លារប៉ុណ្ណោះក្នុង១ឆ្នាំ ។ តាមការិយាល័យស្ថិតិទូទៅ នៅខែមករា ប្រទេសវៀតណាមបាននាំចូលផលិតផលប្រេង និងប្រេងឥន្ធនៈប្រមាណ៩០ម៉ឺនតោន ស្មើទឹកប្រាក់សរុប៥៥២លានដុល្លារ។ ច្បាប់ពន្ធការពារបរិស្ថានបច្ចុប្បន្នចែងថា ផលិតផលដូចជា ប្រេង ឧស្ម័ន ខ្លាញ់ ធ្យូងថ្ម និងថង់ផ្លាស្ទិក ត្រូវតែបង់ពន្ធទាំងនេះ ៕
ចែករំលែកព័តមាននេះ