រាជធានីភ្នំពេញ ៖ សិល្បករចម្រៀងអាយ៉ៃជើងចាស់លោកតាផ្លុង មឿក អាការជំងឺរើឡើងវិញក្នុងរយៈពេលចុងក្រោយនេះ ហើយត្រូវក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យ ។ ជំងឺលោកតាផ្លុង មឿក ចាប់ផ្តើមមានអាការមិនស្រួល៣ទៅ៤ថ្ងៃមកហើយជាមួយនឹងភាពចាស់ជរាផងនោះបានធ្វើឱ្យគាត់ហេវហត់អស់កម្លាំង…
រាជធានីភ្នំពេញ ៖ សិល្បករចម្រៀងអាយ៉ៃជើងចាស់លោកតាផ្លុង មឿក អាការជំងឺរើឡើងវិញក្នុងរយៈពេលចុងក្រោយនេះ ហើយត្រូវក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យ ។
ជំងឺលោកតាផ្លុង មឿក ចាប់ផ្តើមមានអាការមិនស្រួល៣ទៅ៤ថ្ងៃមកហើយជាមួយនឹងភាពចាស់ជរាផងនោះបានធ្វើឱ្យគាត់ហេវហត់អស់កម្លាំង និងមិនអាចហូបអ្វីបានឡើយ។ ដោយសារតែជីវភាពខ្វះខាតក្រុមគ្រួសាររបស់លោកតាផ្លុង មឿក មិនមានលទ្ធភាពយកគាត់ទៅព្យាបាលនៅមន្ទីរពេទ្យទេដោយត្រូវរង់ចាំប្រធានសមាគមសិល្បករអ្នកនាងចន ច័ន្ទលក្ខិណា វិលពីសម្តែងនៅក្នុងប្រទេសកូរ៉េវិញ ។
បន្ទាប់ពីបញ្ចប់ការសម្តែងភ្លាមអ្នកនាងចន ច័ន្ទលក្ខិណា បានទៅសួរសុខទុក្ខលោកតាផ្លុង មឿក ដល់គេហដ្ឋាន និងប្រញាប់ប្រញាល់យកគាត់ទៅកាន់មន្ទីរពេទ្យព្រះកុសុមៈដើម្បីពិនិត្យ និងព្យាបាល ។ តាមរយៈហ្វេសប៊ុករបស់អ្នកនាងចន ច័ន្ទលក្ខិណា បញ្ជាក់ថា«លោកឪ(ផ្លុង មឿក)ឈឺរើឡើងវិញ៣-៤ថ្ងៃហើយ តែកូនចៅអត់ហ៊ានយកគាត់ទៅមន្ទីរពេទ្យទេ ព្រោះពួកគាត់មើលថែ និងព្យាបាលជំងឺរបស់លោកឪយូរឆ្នាំហើយរហូតអស់លុយរលីង តែពេលនេះគឺគាត់រំពឹងតែសមាគមសិល្បករខ្មែរទេ គឺរង់ចាំខ្ញុំត្រឡប់មកពីកូរ៉េវិញ ហើយចាំយកគាត់មកពេទ្យឮសំដីនេះគឺពិតជាស្លុតចិត្តណាស់» ។
បើតាមការអះអាងពីកូនស្រីរបស់លោកតាផ្លុង មឿក ថា រហូតមកដល់ពេលនេះជំងឺរបស់លោកតាមឿកគ្រាន់បើបន្តិចហើយ ក្រោយពីចេញពីបន្ទប់សង្គ្រោះបន្ទាន់មក ។ គាត់អាចក្រោកហូបបបរបានខ្លះ ហើយការដកដង្ហើមមិនសូវជាពិបាកដូចមុន ពេលដាក់អុកស៊ីហ្ស៊ែនជាប្រចាំ ។
ដោយឡែកសម្រាប់ការស្នាក់នៅព្យាបាលវិញគឺខាងសមាគមសិល្បករខ្មែរជួយចេញក្នុងការហូបចុក ចំណែកថ្លៃព្យាបាលគឺជាការរ៉ាប់រងទាំងស្រុងពីក្រុមគ្រូពេទ្យស្ម័គ្រចិត្តរបស់លោកហ៊ុន ម៉ាណែត ។
វ័យចាស់ជរារួមទាំងជំងឺរ៉ាំរ៉ៃរួមរឹតអស់ពេលជាច្រើនឆ្នាំបានធ្វើឱ្យអ្នកចម្រៀងអាយ៉ៃល្បីឈ្មោះលោកតាផ្លុង មឿក ស្ថិតក្នុងសភាពទ្រុឌទ្រោមធ្វើអ្វីលែងកើត ។
លោកតាផ្លុង មឿក មានវ័យ៨៣ឆ្នាំ ជាអ្នកអាយ៉ៃជើងចាស់ ហើយស្នាដៃដែលគាត់សម្តែងល្បីជាងគេជាមួយលោកតាសាឡាត់ អ្នកចម្រៀងអាយ៉ៃជើងចាស់ដូចគ្នាដែរនោះ គឺរឿងកំប្លែង«តាភោគ» ។ គាត់ក៏ជាអតីតអ្នកបង្ហាត់បង្រៀនសិល្បៈអាយ៉ៃនៅក្រសួងវប្បធម៌និងវិចិត្រសិល្បៈ និងជាអតីតសមាជិកក្រុមប្រឹក្សាសង្កាត់ទន្លេបាសាក់ផងដែរ ៕
ចែករំលែកព័តមាននេះ