វឌ្ឍនភាពនៃវិស័យការងារបានជួយជំរុញកំណើនសេដ្ឋកិច្ចយ៉ាងខ្លាំងក្លា
- ភ្នំពេញ
រាជធានីភ្នំពេញ ៖ មន្ត្រីសម្របសម្រួលនៃអង្គការសហប្រជាជាតិប្រចាំកម្ពុជា លោកស្រី ក្លែ វ៉ាន់ដឺ វែរ៉ែន (Claire Vander Vaeren)…
រាជធានីភ្នំពេញ ៖ មន្ត្រីសម្របសម្រួលនៃអង្គការសហប្រជាជាតិប្រចាំកម្ពុជា លោកស្រី ក្លែ វ៉ាន់ដឺ វែរ៉ែន (Claire Vander Vaeren)…
រាជធានីភ្នំពេញ ៖ មន្ត្រីសម្របសម្រួលនៃអង្គការសហប្រជាជាតិប្រចាំកម្ពុជា លោកស្រី ក្លែ វ៉ាន់ដឺ វែរ៉ែន (Claire Vander Vaeren) បានកោតសរសើរពីវឌ្ឍនភាពនៃវិស័យការងារ និងបណ្ដុះបណ្ដាលវិជ្ជាជីវៈនៅកម្ពុជា ដែលបានជំរុញកំណើនសេដ្ឋកិច្ចឲ្យមានការរីកចម្រើនយ៉ាងឆាប់រហ័សក្នុងរយៈពេល៥ឆ្នាំចុងក្រោយនេះ ។
លោកស្រីបានថ្លែងបែបនេះនៅក្នុងជំនួបពិភាក្សាការងារជាមួយលោកបណ្ឌិត អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅសណ្ឋាគាររ៉ាហ្វ៊ល ឡឺរ៉ូយ៉ាល់ភ្នំពេញ នាព្រឹកថ្ងៃទី១៩ កុម្ភៈ ។
ក្នុងឱកាសនោះ លោករដ្ឋមន្ត្រីបានលើកឡើងថា តាមរយៈបេសកកម្មរយៈពេល៥ឆ្នាំរបស់លោកស្រីតំណាងអង្គការសហប្រជាជាតិប្រចាំកម្ពុជា កិច្ចសហប្រតិបត្តិការរវាងរាជរដ្ឋាភិបាលកម្ពុជា ជាមួយអង្គការសហប្រជាជាតិ ពិតជាមានលក្ខណៈល្អប្រសើរ និងមានវឌ្ឍនភាពខ្ពស់។ វឌ្ឍនភាពជោគជ័យទាំងឡាយដែលកម្ពុជាទទួលបាននេះ គឺមិនអាចកាត់ផ្ដាច់ពីភាពជាដៃគូរវាងរាជរដ្ឋាភិបាលកម្ពុជា និងអង្គការសហប្រជាជាតិប្រចាំនៅកម្ពុជាបានឡើយ ហើយក៏រឹតតែមិនអាចកាត់ផ្ដាច់បានពីតួនាទីរបស់លោកស្រី ដែលជាអ្នកសម្របសម្រួលតំណាងអង្គការសហប្រជាជាតិផងដែរ ។
លោករដ្ឋមន្ត្រីថ្លែងថា ៖« រាជរដ្ឋាភិបាលកម្ពុជាមានក្ដីសោមនស្សរីករាយខ្លាំងណាស់ ដែលទទួលបាននូវគម្រោងល្អៗជាច្រើន ក្នុងភាពជាដៃគូជាមួយអង្គការសហប្រជាជាតិ និងគោលនយោបាយការងារដែលកម្ពុជាទទួលបានក្នុងរយៈពេលប៉ុន្មានឆ្នាំនេះ ជាពិសេសគោលនយោបាយជាតិ ស្តីពីការអប់រំ បណ្ដុះបណ្ដាល បច្ចេកទេស និងវិជ្ជាជីវៈ និងភាពជាដៃគូជាមួយអង្គការ ILO ដែលបានរួមគ្នាដោះស្រាយបញ្ហាផ្សេងៗក្នុងក្របខ័ណ្ឌនៃកិច្ចសហប្រតិបត្តិការ »។
លោកស្រី ក្លែ វ៉ាន់ដឺ វែរ៉ែន បានលើកឡើងថា ក្នុងអាណត្តិការងាររយៈពេល៥ឆ្នាំរបស់លោកស្រី លោកស្រីបានមើលឃើញថា វិស័យការងារ និងបណ្ដុះបណ្ដាលវិជ្ជាជីវៈនៅកម្ពុជា ពិតជាមានវឌ្ឍនភាពរីកចម្រើនយ៉ាងឆាប់រហ័សគួរឲ្យកត់សម្គាល់ ។
លោកស្រីបានថ្លែងយ៉ាងដូច្នេះថា ៖« ៥ឆ្នាំចុងក្រោយនេះ វិស័យការងារកម្ពុជាមានវឌ្ឍនភាពយ៉ាងខ្លាំង ។ អង្គការសហប្រជាជាតិមានមោទនភាពក្នុងការធ្វើការងារជាមួយកម្ពុជា ជាមួយនឹងសមិទ្ធផលដែលសម្រេចបានជាមួយលោករដ្ឋមន្ត្រី ។ យើងបានធ្វើការងារច្រើនជាមួយគ្នាលើវិស័យការងារ ពិសេសវិស័យគាំពារសង្គម, ការលើកកម្ពស់ប្រាក់ឈ្នួលអប្បបរមា ការប្រយុទ្ធប្រឆាំងការជួញដូរមនុស្ស, ការទប់ស្កាត់បញ្ហាដែលកើតមានពីការធ្វើចំណាកស្រុក ការផ្ដល់អំណាចដល់ស្ដ្រីក្នុងវិស័យការងារ ហើយចុងក្រោយនេះ យើងនឹងពិភាក្សាលើគម្រោងថ្មីទៀតផងដែរ ស្ដីពីមុខរបរ និងការងារយុវជន ដែលមានការជួយសម្របសម្រួលពីអង្គការ ILO ដែលជាអង្គការមួយដ៏សកម្មក្នុងការងារសហការជាមួយរាជរដ្ឋាភិបាល លើវិស័យការងារ និងបណ្ដុះបណ្ដាលវិជ្ជាជីវៈ » ។
លោកស្រីបានលើកទឹកចិត្ត និងជំរុញឲ្យរាជរដ្ឋាភិបាលកម្ពុជា បន្តកិច្ចសហប្រតិបត្តិការជាមួយមន្ត្រីសម្របសម្រួលថ្មីរបស់អង្គការសហប្រជាជាតិ ដែលនឹងមកដល់កម្ពុជានាពេលខាងមុខនេះ ដើម្បីបន្តវឌ្ឍនភាពការងារទៅមុខទៀត។ ជាមួយគ្នានេះដែរ លោករដ្ឋមន្ត្រីក្រសួងការងារ ក៏បានប្ដេជ្ញាបន្តកិច្ចសហប្រតិបត្តិការជាមួយអង្គការសហប្រជាជាតិផងដែរ ៕
ចែករំលែកព័តមាននេះ