រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ កាលពីព្រឹកថ្ងៃទី១៩ ខែកុម្ភៈ ឆ្នាំ២០១៨ បានបញ្ជូនអ្នកបើកបររថយន្តបំបុកសមត្ថកិច្ច បណ្តាលឱ្យនគរបាលចរាចរណ៍ម្នាក់របួសធ្ងន់ ទៅកាន់សាលាដំបូងរាជធានីភ្នំពេញ ក្រោមការចោទពីបទ…
រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ កាលពីព្រឹកថ្ងៃទី១៩ ខែកុម្ភៈ ឆ្នាំ២០១៨ បានបញ្ជូនអ្នកបើកបររថយន្តបំបុកសមត្ថកិច្ច បណ្តាលឱ្យនគរបាលចរាចរណ៍ម្នាក់របួសធ្ងន់ ទៅកាន់សាលាដំបូងរាជធានីភ្នំពេញ ក្រោមការចោទពីបទ «ប៉ុនប៉ងឃាតកម្ម» ។
ជនសង្ស័យកំពុងស្ថិតក្រោមការសាកសួរពីសំណាក់លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។ អ្នកបើកបររូបនេះឈ្មោះ សា សារី ហៅសារី អាយុ៤៤ឆ្នាំ មុខរបរលក់ដូរ ។
គួរបញ្ជាក់ថា បុរសម្នាក់ត្រូវបានសមត្ថកិច្ចដេញឃាត់ខ្លួនភ្លាមៗ បន្ទាប់ពីបើករថយន្តបំបុកនគរបាលចរាចរណ៍ដែលកំពុងអនុវត្តច្បាប់ចរាចរណ៍ផ្លូវគោក កាលពីយប់ថ្ងៃទី១៦ ខែកុម្ភៈ ឆ្នាំ២០១៨ នៅខណ្ឌឫស្សីកែវ ។
អ្នកច្បាប់មួយរូបអះអាងថា បុរសរូបនេះ អាចជាប់បទល្មើស «ប៉ុនប៉ងឃាតកម្ម» តាមមាត្រា២៧ និងមាត្រា១៩៩ នៃក្រមព្រហ្មទណ្ឌ ដែលអាចប្រឈមមុខនឹងការជាប់ពន្ធនាគារពី១០ទៅ១៥ឆ្នាំ ។
នៅយប់ថ្ងៃទី១៦ ខែកុម្ភៈ ឆ្នាំ២០១៨ ចំណុចផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ នគរបាលចរាចរណ៍បានដាក់ប៉ុស្តិ៍ត្រួតពិនិត្យច្បាប់ចរាចរណ៍ផ្លូវគោក ហើយរថយន្តមួយគ្រឿងបើកចូលមកនគរបាលបានសួរនាំដើម្បីត្រួតពិនិត្យ ស្រាប់តែបុរសរូបនេះ បើកបំបុកធ្វើឱ្យនគរបាលម្នាក់ឈ្មោះ ហ៊ុល ចាន់រាសី របួសធ្ងន់បញ្ជូនមកមន្ទីរពេទ្យកាល់ម៉ែត ។ ជនរងគ្រោះកំពុងស្ថិតក្រោមការព្យាបាលនៅឡើយ ដោយពុំទាន់បានធូរស្រាលឡើយ ៕
ចែករំលែកព័តមាននេះ