រាជធានីភ្នំពេញ ៖ យុវជនម្នាក់ដែលស្រឡាញ់កូនស្រីរបស់អ្នកភូមិជាមួយគ្នាយ៉ាងខ្លាំង រហូតបំភ្លេចនាងមិនបាន ហើយឱ្យម្ដាយរបស់ខ្លួនស៊ើបសួរទៅក្រុមគ្រួសារខាងស្រី តើព្រមលើកឱ្យឬមិនព្រម ។ ប៉ុន្តែពេលនោះ ម្ដាយខាងស្រីបដិសេធមិនព្រមលើកឲ្យឡើយ ដោយប្រាប់ថា…
រាជធានីភ្នំពេញ ៖ យុវជនម្នាក់ដែលស្រឡាញ់កូនស្រីរបស់អ្នកភូមិជាមួយគ្នាយ៉ាងខ្លាំង រហូតបំភ្លេចនាងមិនបាន ហើយឱ្យម្ដាយរបស់ខ្លួនស៊ើបសួរទៅក្រុមគ្រួសារខាងស្រី តើព្រមលើកឱ្យឬមិនព្រម ។ ប៉ុន្តែពេលនោះ ម្ដាយខាងស្រីបដិសេធមិនព្រមលើកឲ្យឡើយ ដោយប្រាប់ថា កូនស្រីរបស់គាត់កំពុងជាប់រៀននៅឡើយ មិនទាន់គិតគូរឱ្យមានគូស្រករទេ ។
បន្ទាប់ពីទទួលដំណឹងខាងលើពីម្ដាយរបស់ខ្លួនតាមទូរស័ព្ទ ធ្វើឱ្យយុវជនរូបនេះខកបំណងយ៉ាងខ្លាំង ព្រមទាំងគិតខ្លីហើយសរសេរលិខិតមួយសុំទោសម្ដាយ បន្ទាប់មកក៏បានសម្រេចចិត្តធ្វើអត្តឃាតដោយចង.កនៅក្នុងបន្ទប់បង្គន់ បង្កឱ្យមានការភ្ញាក់ផ្អើលទាំងថ្ងៃ ។ ហេតុការណ៍នេះ បង្កឱ្យមានការភ្ញាក់ផ្អើលឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៨ ខែកុម្ភៈ នៅបង្គន់ក្នុងក្រុមហ៊ុនបុកគ្រឹះលក់និងជួលគ្រឿងចក្រគ្រប់ប្រភេទយីហោ «ជេ អាយ ធី ឬអុី ស៊ី អឹម» ដែលមានតាំងស្ថិតនៅជិតខ្លោងទ្វារវត្តអង្គត្រគៀត តាមផ្លូវជាតិលេខ៣ ក្នុងភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ ។
តាមប្រភពព័ត៌មានបានឱ្យដឹងថា យុវជនម្នាក់នេះឈ្មោះ ឡន ស៊ីម អាយុ១៨ឆ្នាំ ស្នាក់នៅក្នុងក្រុមហ៊ុនខាងលើ និងមានស្រុកកំណើតនៅភូមិតាញ៉ោក ឃុំប្រាសាទ ស្រុកសន្ទុក ខេត្តកំពង់ធំ បានយកខ្សែលួសទៅចងកជាប់ជាមួយដំបូលបង្គន់ បណ្ដាលឱ្យស្លាប់តាមបំណងហើយភ្លាមៗនោះនគរបាលប៉ុស្ដិ៍កន្ទោកបានចុះទៅកាន់កន្លែងកើតហេតុ ។ បន្ទាប់មក បានរាយការណ៍ទៅនគរបាលបច្ចេកទេសខណ្ឌពោធិ៍សែនជ័យ
ដើម្បីរាយការណ៍បន្តទៅនគរបាលបច្ចេកទេសនៃស្នងការដ្ឋានរាជធានីភ្នំពេញចុះទៅធ្វើកោសល្យវិច័យ ។
មន្ត្រីនគរបាលនិយាយថា នៅជាប់ខ្លួនសពមានលិខិត១ច្បាប់ដែលយុវជនរូបនេះសរសេរនៅមុនពេលចងកសម្លាប់ខ្លួនទុកឱ្យម្ដាយមើលដែលខ្លឹមសារបានរៀបរាប់ថា «ជាដំបូង ខ្ញុំសុំទោសអ្នកម៉ែ ដែលកូនធ្វើឱ្យអ្នកម៉ែពិបាកចិត្តគ្រាកន្លងមក កូនមិនចង់ធ្វើអុីចឹងទេ តែកូនពិបាកនឹងទ្រាំនៅ ជីវិតកូនវាចេះតែធ្វើឱ្យកូនរញ៉េរញ៉ៃ ។កូនសំណាងណាស់ ដែលបានកើតជាកូនម៉ែ ទោះបីគ្រួសារយើងមិនសូវធូរធារដូចគេ ក៏ម៉ែបានផ្ដល់ឱ្យកូននូវរបស់ដែលកូនចង់បាន ។ កូនលាហើយ បើមានជាតិក្រោយមែនកូនសុំធ្វើជាកូនម៉ែទៀត ។ ពីកូនអកតញ្ញូ កូនសុំទោស» ។ស្ត្រីម្នាក់ដែលត្រូវជាម្ដាយមីងរបស់យុវជនរូបនេះនិយាយថា ក្មួយប្រុសគាត់ម្នាក់នេះមានវិបត្តិស្នេហា ទើបបានជាគិតខ្លីចងកសម្លាប់ខ្លួនបែបនេះ ។ ការដែលគាត់ហ៊ានអះអាងបែបនេះ គឺព្រោះកាលពីថ្ងៃទី១៧ ខែកុម្ភៈ ក្មួយប្រុសគាត់ម្នាក់នេះបាននិយាយទូរស័ព្ទជាមួយម្ដាយរបស់គេ ហើយគាត់ស្ដាប់ឮថា រូបគេបានស្រឡាញ់កូនស្រីអ្នកភូមិជាមួយគ្នាម្នាក់ខ្លាំងណាស់ និងបានបង្ខំឱ្យម្ដាយចូលស្ដីដណ្ដឹងនាងធ្វើជាប្រពន្ធ ។ ប៉ុន្តែម្ដាយបានប្រាប់ថា គាត់ស៊ើបសួររួចហើយម្ដាយខាងស្រីអត់ឱ្យទេ ព្រោះកូនគេជាប់រៀន ។
ប្រភពដដែលបន្តថា ក្រោយមកគាត់មិនបានដឹងថាមានរឿងអ្វីផ្សេងទៀតឡើយ ប៉ុន្តែក្រោយពេលនិយាយទូរស័ព្ទជាមួយម្ដាយចប់ក្មួយប្រុសគាត់ម្នាក់នេះមានទឹកមុខក្រៀមក្រំខ្លាំងណាស់ ។ លុះនៅវេលាថ្ងៃត្រង់ថ្ងៃនោះ ស្រាប់តែរូបគេដើរចូលទៅក្នុងបង្គន់ រួចចងកសម្លាប់ខ្លួនបែបនេះតែម្ដង ហើយគាត់ក៏មិននឹកស្មានថា គ្រាន់តែរឿងស្នេហាធ្វើឱ្យក្មួយគាត់ម្នាក់នេះស្លាប់បែបនេះសោះ ។ កន្លងមក ក្មួយប្រុសគាត់បានស្នាក់នៅក្នុងក្រុមហ៊ុនឯកោះពេជ្រ ព្រោះនៅបុកគ្រឹះទីនោះ លុះមុនថ្ងៃចូលឆ្នាំចិនបានមកយាមនៅទីតាំងខាងលើ ដោយសារតែអ្នកយាមនៅទីនេះបានទៅលេងស្រុក ស្រាប់តែចងកសម្លាប់ខ្លួនបែបនេះតែម្ដង ។
ដោយឡែក ក្មេងប្រុសម្នាក់និយាយថា រូបគេបានប្រទះឃើញសពនេះមុនគេ ហើយមុនពេលកើតហេតុ ខណៈរូបគេកំពុងហូបបាយបានឃើញបង ឡន ស៊ីម ដើរកាត់មុខក៏បានហៅឱ្យហូបបាយជាមួយទៀតផង ។ ពេលនោះបងស៊ីមបានចូលហូបបាយ និងហូបចានតែមួយជាមួយគ្នាថែមទៀត។មិនតែប៉ុណ្ណោះ បងស៊ីមហូបបាយបណ្ដើរយំបណ្ដើរគួរឱ្យអាណិត តែមិនបានប្រាប់ពីមូលហេតុដែលគាត់យំនោះឡើយ ។ លុះក្រោយពេលហូបបាយរួច គាត់ក៏ក្រោកដើរចេញ និងបានសុំក្រដាសសៀវភៅពីរូបគេ១សន្លឹកទៀតផង ។ បន្ទាប់មក បានដើរទៅកាន់បង្គន់ខាងលើរួចក៏បាត់រហូតមិនឃើញចេញមកវិញឡើយ ។
ក្មេងប្រុសដដែលរៀបរាប់ទៀតថា ពេលនោះរូបគេបានសង្ស័យយ៉ាងខ្លាំងនិងបាននឹកក្នុងចិត្តថា តិចបងស៊ីមចងកសម្លាប់ខ្លួនទៅ រួចហើយក៏ដើរតាមរកមើល ។ លុះពេលទៅដល់បង្គន់ខាងលើ ក៏បានប្រទះឃើញបងស៊ីមចងកស្លាប់បាត់ទៅហើយ ទើបស្រែកប្រាប់គេឯងបង្កឱ្យមានការភ្ញាក់ផ្អើលនាំគ្នារត់ទៅមើលគ្រប់ៗគ្នា ព្រមទាំងរាយការណ៍ជូននគរបាលឱ្យចុះទៅពិនិត្យមើលតែម្ដង ៕
ចែករំលែកព័តមាននេះ