ខេត្តព្រះសីហនុ ៖ បើទោះជាមានការខ្វះខាតផ្ទះសំណាក់ និងសណ្ឋាគារយ៉ាងណាក៏ដោយចំនួនភ្ញៀវទេសចរណ៍នៅតែបន្តកើនឡើងជាបន្តបន្ទាប់ ។ លោកតាំង សុចិត្តគ្រឹះស្នា ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា នៅក្នុងពេលបុណ្យចូលឆ្នាំប្រពៃណីចិន-វៀតណាម ក្នុងរយៈពេលបីថ្ងៃចាប់ពីថ្ងៃទី១៥ដល់ថ្ងៃទី១៧ ខែកុម្ភៈ ឆ្នាំ២០១៨ ។
ចំនួនភ្ញៀវទេសចរណ៍ធ្វើដំណើរមកលេងកម្សាន្តនៅតាមតំបន់រមណីយដ្ឋានកន្លែងកម្សាន្តនានានៅក្នុងខេត្តព្រះសីហនុទទួលបានភ្ញៀវទេសចរណ៍ជាតិ អន្តរជាតិសរុបចំនួន៨៨០០០នាក់ មានការកើនឡើង៨,៥០% ដែលជាតួលេខបញ្ជាក់ឲ្យឃើញថា ចំនួនភ្ញៀវទេសចរណ៍ជាតិ អន្តរជាតិនៅតែបន្តការកើនឡើងច្រើនជាងនៅក្នុងពិធីបុណ្យចូលឆ្នាំប្រពៃណីជនជាតិចិន-វៀតណាមនៅឆ្នាំ២០១៧ កន្លងមក ។
លោកប្រធានមន្ទីរទេសចរណ៍បានបញ្ជាក់ឲ្យដឹងទៀតថាចំនួនភ្ញៀវទេសចរណ៍នៅតែបន្តធ្វើដំណើរចូលមកកម្សាន្តនៅខេត្តព្រះសីហនុជាបន្តបន្ទាប់ ដោយសារតែរដូវនេះ ជារដូវក្តៅហើយគាប់ជួនបុណ្យចូលឆ្នាំប្រពៃណីជនជាតិចិន-វៀតណាមឈានចូលមកដល់បង្កលក្ខណៈងាយស្រួលសម្រាប់ភ្ញៀវទេសចរណ៍ជាតិ អន្តរជាតិធ្វើដំណើរជាលក្ខណៈគ្រួសារមកមុជទឹកសមុទ្រ និងធ្វើដំណើរមកកម្សាន្តលេងនៅតាមតំបន់រមណីដ្ឋានជាច្រើនកន្លែងនៅក្នុងខេត្តព្រះសីហនុ ។ ជាងនេះទៅទៀតភ្ញៀវទេសចរណ៍ជាតិ អន្តរជាតិបានមកទទួលទានមុខម្ហូបសមុទ្រស្រស់ៗប្រកបដោយរសជាតិឆ្ងាញ់ពិសារ បើទោះជាមានតម្លៃខ្ពស់បន្តិចក្តី ។
ម្យ៉ាងវិញទៀតខេត្តព្រះសីហនុ គឺជាខេត្តដែលមានសក្តានុពលនៃតំបន់ទេសចរណ៍បែបធម្មជាតិ មានឆ្នេរសមុទ្រដែលមានឆ្នេរខ្សាច់ដ៏សរក្បុសទឹកសមុទ្រថ្លាខៀវ នៅក្រុងព្រះសីហនុយើងមានតំបន់ទឹកធ្លាក់ក្បាលឆាយ នៅស្រុកកំពង់សិលា យើងមានតំបន់ទឹកធ្លាក់ថ្មរូង ។ អ្វីដែលវិសេសវិសាលនោះ នៅកននុងលម្ហសមុទ្រនៃខេត្តព្រះសីហនុយើង មានប្រជុំកោះចំនួន៣២កោះដែលកំពុងតែអភិវឌ្ឍន៍ជាតំបន់ទេសចរណ៍សម្រាប់ទទួលភ្ញៀវទេសចរណ៍ជាតិ អន្តរជាតិទៅសម្រាកកម្សាន្តស្រូបយកខ្យល់អាកាសបរិសុទ្ធ នៅក្នុងឱកាសថ្ងៃបុណ្យឈប់សម្រាក ឬវិស្សមកាលផងដែរ ។
លោកតាំង សុចិត្តគ្រឹះស្នា បានបញ្ជាក់ឲ្យដឹងទៀតថា នៅក្នុងរយៈកាលចុងក្រោយថ្មីៗនេះផ្ទះសំណាក់ និងសណ្ឋារគារមានតម្លៃកើនឡើងខ្ពស់ ដោយសារតែកំណើនអ្នកវិនិយោគ ជនជាតិបរទេស ជនជាតិចិនបានជួលផ្ទះសំណាក់ និងសណ្ឋាគារឲ្យបុគ្គលិកស្នាក់នៅមានចំនួនច្រើនតែមិនបានប៉ះពាល់ដល់កំណើនភ្ញៀវទេសចរណ៍ជាតិ អន្តរជាតិឡើយ ព្រោះនៅតែបន្តកើនឡើងជាបន្តបន្ទាប់ពីមួយឆ្នាំទៅមួយឆ្នាំ ។
មន្ត្រីមន្ទីរសាធារណការដឹកជញ្ជូនដែលប្រចាំការនៅកំពង់ផែរថ្ម ជលយានស្ថិតនៅឆ្នេរអូរឈើទាលក្នុងសង្កាត់លេខ០៤ បានឲ្យដឹងថា នៅក្នុងឱកាសបុណ្យខាងលើចំនួនភ្ញៀវទេសចរណ៍ជាតិ អន្តរជាតិដែលធ្វើដំណើរតាមនាវាទៅកម្សាន្តដែនកោះមានចំនួន៤០០០ ទៅដល់៤៥០០នាក់ ក្នុងមួយថ្ងៃៗ ដោយសារ តែការធ្វើដំណើរតាមនាវាមានលក្ខណៈងាយស្រួលប្រកបដោយសុវត្ថិភាព និងនៅលើដែនកោះមានទេសភាពបែបធម្មជាតិបៃតងខ្យល់ជុំនោ នៅលើដែនកោះត្រជាក់បរិសុទ្ធលាយឡំ និងក្លិនផ្ការព្រៃក្រអូបប្រហើរផងដែរ ៕
ចែករំលែកព័តមាននេះ