រាជធានីភ្នំពេញ ៖ អតីតប្រធានគណបក្សសង្គ្រោះជាតិប្រចាំនៅទីក្រុងឡុងប៊ិចរដ្ឋកាលីហ្វ័រញ្ញាបានប្រកាសមិនគាំទ្រចំពោះការប្រជុំធ្វើវេទិការរបស់កញ្ញា កឹម មនោវិទ្យា កូនស្រីលោក កឹម សុខា នោះទេ ។ ការប្រកាសមិនគាំទ្ររបស់អតីតប្រធានបក្សប្រឆាំងចំពោះកញ្ញា កឹម មនោវិទ្យា នេះបានរងនូវភាពអាម៉ាស់ជាថ្មីម្តងទៀតបន្ទាប់ពីខ្លួនមិនទទួលបានការគាំទ្រទាល់តែសោះពីលោក ចាន់ វាសនា អតីតប្រធានគណបក្សសង្គ្រោះជាតិប្រចាំនៅទីក្រុងឡុងប៊ិច ។
យោងតាមលោក Brady N Yong សកម្មជនម្នាក់របស់អតីតគណបក្សសង្គ្រោះជាតិនៅសហរដ្ឋអាមេរិកបានប្រកាសនៅលើទំព័រ Facebook ថា «វេទិកាសាធារណៈជួបជាមួយកញ្ញា មនោវិទ្យា នៅក្រុងឡុងប៊ិចជាសញ្ញាថ្មីមួយទៀតដែលធ្វើឱ្យគណបក្សសង្គ្រោះទាំងមូលមានការបែកបាក់ផ្ទៃក្នុងដោយលោក ចាន់ វាសនា ប្រធាននៅឡុងប៊ិចប្រកាសមិនគាំទ្រ» ។
បើតាមការអះអាងរបស់សកម្មជនផ្សេងៗបានឱ្យដឹងថា មូលហេតុដែលធ្វើឱ្យលោក ចាន់ វាសនា ប្រកាសមិនគាំទ្រកម្មវិធីរបស់កញ្ញា កឹម មនោវិទ្យា ព្រោះវិន័យក្នុងរចនាសម្ព័ន្ធអតីតបក្សសង្គ្រោះជាតិបើសមាជិកណាមួយចេញទៅធ្វើទស្សនកិច្ចនៅទីណាក៏ដោយត្រូវទៅដោយមានអតីតតំណាងរាស្ត្រ អមជាមួយហោចណាស់ម្នាក់ ហើយថា កូនស្រីលោក កឹម សុខា មិនអាចធ្វើអ្វីតែម្នាក់ឯងបានទេ ។ ក្រុមអតីតសកម្មជន CNRP ចាត់ទុកថា សកម្មភាពរបស់កញ្ញា កឹម មនោវិទ្យា ពេលនេះកំពុងធ្វើឱ្យដួងព្រលឹងរបស់អតីតគណបក្សសង្គ្រោះជាតិបែកបាក់ថែមទៀត ។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាបានលើកឡើងថា ទឹក និង ប្រេង មិនអាចរលាយចូលគ្នាបានទេ ។ យ៉ាងណាមិញនៅក្នុងរបស់ដែលហៅថា ចលនាសាងគ្រោះជាតិដែលទណ្ឌិត សម រង្ស៊ី និងបក្សពួកបានបង្កើតនាពេលថ្មីៗកន្លងមកនេះមានការបែកបាក់គ្នាយ៉ាងខ្លាំងរវាងភាគី កឹម សុខានិយម និងភាគីសម រង្ស៊ី និយម ។
លោកបញ្ជាក់ថា «ជាក់ស្តែងតាំងពីកើតមកភាគីទាំងមិនឯកភាពគ្នាទេ ហើយវា យប្រហារគ្នាទៅវិញទៅមករហូត ។ នាថ្ងៃទី១៨ ខែកុម្ភៈ កញ្ញា កឹម មនោវិទ្យា កូនស្រី កឹម សុខា មានគម្រោងប្រជុំវេទិកាសាធារណៈមួយនៅទីក្រុងឡុងប៊ិច រដ្ឋកាលីហ្វ័រញ៉ា ។ ប៉ុន្តែនៅមុនថ្ងៃប្រជុំនេះមានប្រតិកម្មពីពលរដ្ឋនៅទីនោះជាច្រើន ជាពិសេសប្រធានអតីតបក្សប្រឆាំងប្រចាំទីក្រុងឡុងប៊ិចមិនឯកភាពឲ្យកញ្ញាធ្វើទេដោយបានប្រកាសមិនស្វាគមន៏កញ្ញាឡើយ ។ ដូច្នេះគេថាបែកបាក់គឺបែកបាក់មែនមិនអាចលាក់បាំងបានជាដាច់ខាតបើឃើញច្បាស់ទែងនឹងភ្នែកហើយហ្នឹង » ។
សូមជម្រាបការបង្កើតចលនាសង្គ្រោះជាតិបានធ្វើឲ្យមានការខ្វែងគំនិតគ្នារវាងអ្នកគាំទ្រលោក កឹម សុខានិងលោក សម រង្ស៊ី ដែលបង្ហាញថាផ្ទៃក្នុងរបស់អតីតគណបក្សប្រឆាំងដែលត្រូវតុលាការកំពូលកាលពីចុងឆ្នាំ២០១៧ កន្លង ៕
ចែករំលែកព័តមាននេះ