រាជធានីភ្នំពេញ ៖ នៅឆ្នាំ២០១៨នេះ គម្រោងអភិវឌ្ឍន៍លំនៅឋានតម្លៃសមរម្យត្រូវបានរំពឹងថា នឹងលេចរូបរាងច្រើនជាងឆ្នាំកន្លងទៅ ដោយសារមានក្រុមហ៊ុនជាច្រើនបាននិងកំពុងចាប់អារម្មណ៍ ហើយគ្រោងបង្ហាញពីគម្រោងរបស់គេ ។ នេះបើយោងតាមអគ្គនាយករងលំនៅឋាននៃក្រសួងរៀបចំដែនដី នគរូបនីយកម្ម…
រាជធានីភ្នំពេញ ៖ នៅឆ្នាំ២០១៨នេះ គម្រោងអភិវឌ្ឍន៍លំនៅឋានតម្លៃសមរម្យត្រូវបានរំពឹងថា នឹងលេចរូបរាងច្រើនជាងឆ្នាំកន្លងទៅ ដោយសារមានក្រុមហ៊ុនជាច្រើនបាននិងកំពុងចាប់អារម្មណ៍ ហើយគ្រោងបង្ហាញពីគម្រោងរបស់គេ ។ នេះបើយោងតាមអគ្គនាយករងលំនៅឋាននៃក្រសួងរៀបចំដែនដី នគរូបនីយកម្ម និងសំណង់ ។
លោក ហ៊ី ចិន្តា អគ្គនាយករងរូបនេះ បានថ្លែងកាលពីថ្ងៃទី៩ កុម្ភៈ ថា ៖« សព្វថ្ងៃនេះ មានក្រុមហ៊ុនមួយចំនួនទៀតកំពុងពិចារណា និងទាក់ទងមកក្រសួង ដោយពួកគេមានបំណងចង់ចូលរួមសាងសង់អគារតម្លៃសមរម្យ អីចឹង យើងរំពឹងថា អាចនឹងមានច្រើនជាងឆ្នាំ២០១៧ » ។
ជាមួយគ្នានេះ ក្រសួងកំពុងផ្សព្វផ្សាយដល់អ្នកអភិវឌ្ឍន៍ក្នុងវិស័យលំនៅឋាននេះ ពិសេសក្រុមហ៊ុនតូចៗដែលធ្លាប់សាងសង់ផ្ទះលក់ក្នុងតម្លៃសមរម្យ មកពិភាក្សាជាមួយក្រសួង ដើម្បីស្នើសុំគម្រោងលើកទឹកចិត្តពីរាជរដ្ឋាភិបាល ។
លោ ហ៊ី ចិន្តា បញ្ជាក់ថា ៖« បើសិនជាក្រុមហ៊ុនចាប់អារម្មណ៍ចូលរួមជាមួយរាជរដ្ឋាភិបាល ក្នុងការអភិវឌ្ឍលំនៅឋានតម្លៃសមរម្យនេះ គឺក្រុមហ៊ុននោះនឹងទទួលបានផលចំណេញច្រើន ព្រោះរាជរដ្ឋាភិបាលបានផ្តល់ការលើកទឹកចិត្តច្រើនទៅលើគម្រោងលំនៅឋានតម្លៃសមរម្យនេះ » ។
ក្នុងឆ្នាំ២០១៧កន្លងទៅ មានក្រុមហ៊ុនចំនួន៣ បានបោះទុនវិនិយោគ ក្នុងនោះគម្រោងទី១ មានទីតាំងស្ថិតនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្តាល អភិវឌ្ឍន៍ដោយក្រុមហ៊ុនវើលប្រីដ៍ឡិន សាងសង់អគារចំនួន២.២៩៧ខ្នង លើផ្ទៃដី២៤ហិកតា ។ គម្រោងទី២ មានទីតាំងស្ថិតនៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល សាងសង់ដោយក្រុមហ៊ុន B& BM Development លើផ្ទៃដីទំហំ៨០ហិកតា ដែលមានអគារចំនួន៥.៣៤០ខ្នង និងគម្រោងទី៣ ស្ថិតនៅភូមិផ្សារទឹកថ្លា សង្កាត់ទឹកថ្លា អភិវឌ្ឍន៍ដោយក្រុមហ៊ុនជប៉ុន ARAKAWA ក្នុងជំហានទី១ មាន២.០០០បន្ទប់ (អាផាតមិន រស់នៅបែបសហកម្មសិទ្ធិ) ចែកចេញជា៥អគារ ដែលសាងសង់លើផ្ទៃដីទំហំ១៣.៦៨០ម៉ែត្រក្រឡា ។
សម្រាប់គម្រោងអភិវឌ្ឍន៍លំនៅឋានតម្លៃសមរម្យទាំង៣ខាងលើនេះ លោក ហ៊ី ចិន្តា លើកឡើងថា ៖« មកដល់សព្វថ្ងៃនេះ គម្រោងអភិវឌ្ឍន៍ទី១របស់ក្រុមហ៊ុនវើល
ប្រីដ៍ឡិន បានដំណើរការសាងសង់ប្រហែល២០% និងដាក់លក់បានប្រហែល៤០% ។ គម្រោងទី២ កំពុងចាក់ដី និងរៀបចំហេដ្ឋារចនាសម្ព័ន្ធជិតរួច១០០%ហើយ ដោយឡែក សម្រាប់គម្រោងទី៣ មកដល់សព្វថ្ងៃនេះ គាត់កំពុងតែបុកគ្រឹះសាងសង់អគារទាំង មូល» ។
លោក បេងហុង សុជាតិខេមរ៉ូ អគ្គនាយកនៃអគ្គនាយកដ្ឋានលំនៅឋាន នៃក្រសួងរៀបចំដែនដី នគរូបនីយកម្ម និងសំណង់ ធ្លាប់មានប្រសាសន៍ថា ឆ្នាំ២០១៧ គឺជាឆ្នាំប្រវត្តិសាស្ត្រដែលគម្រោងលំនៅឋានសាធារណៈតម្លៃសមរម្យដំបូងបំផុតចំនួន៣ បានបើកសម្ពោធការដ្ឋានសាងសង់ក្រោមអធិបតីភាពលោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។
អភិបាលរងរាជធានីភ្នំពេញ លោក អៀង អូនី ធ្លាប់បានមានប្រសាសន៍ថា លោកចង់ ឲ្យមានការវិនិយោគបន្ថែមទៀតទៅលើគម្រោងលំនៅឋានតម្លៃសមរម្យ ដើម្បីលក់ជូនពលរដ្ឋដែលគ្មានលទ្ធភាពទិញលំនៅឋានតម្លៃខ្ពស់ស្នាក់នៅបាន ។ ការវិនិយោគលើគម្រោងលំនៅឋានតម្លៃសមរម្យ គឺជាការចូលរួមជាមួយរាជរដ្ឋាភិបាល ក្នុងការដោះស្រាយបញ្ហាលំនៅឋានប្រជាពលរដ្ឋក្នុងរាជធានីភ្នំពេញ ក៏ដូចជាប្រជាពលរដ្ឋនៅតំបន់ជិតៗ ។
លោកបន្តថា តម្រូវការលំនៅឋានក្នុងរាជធានីភ្នំពេញ នឹងកើនឡើងជាបន្តបន្ទាប់យោងទៅតាមកំណើនប្រជាពលរដ្ឋ ។ ជាក់ស្ដែងមានប្រជាពលរដ្ឋមកពីបណ្ដាខេត្តនានាផ្លាស់មកស្នាក់នៅ និងប្រកបអាជីវកម្មនៅរាជធានីភ្នំពេញ ព្រមទាំងកំណើនសិស្ស-និស្សិតបន្តការសិក្សានៅរាជធានីភ្នំពេញ ជាដើម ៕
ចែករំលែកព័តមាននេះ