រាជធានីភ្នំពេញ ៖ ក្នុងឱកាសបុណ្យចូលឆ្នាំប្រពៃណីជនជាតិចិនជារៀងរាល់ឆ្នាំ ប្រជាពល រដ្ឋខ្មែរដែលជាប់សែស្រឡាយចិន ឬវៀតណាម និងជនជាតិចិនកំពុងរកស៊ីនៅកម្ពុជា តែងប្រារព្ធពិធីតាមប្រពៃណីរបស់ខ្លួន ដោយបានរៀបចំតុបតែងលំនៅឋាន ឬក្រុមហ៊ុនទៅតាមលទ្ធភាព…
រាជធានីភ្នំពេញ ៖ ក្នុងឱកាសបុណ្យចូលឆ្នាំប្រពៃណីជនជាតិចិនជារៀងរាល់ឆ្នាំ ប្រជាពល រដ្ឋខ្មែរដែលជាប់សែស្រឡាយចិន ឬវៀតណាម និងជនជាតិចិនកំពុងរកស៊ីនៅកម្ពុជា តែងប្រារព្ធពិធីតាមប្រពៃណីរបស់ខ្លួន ដោយបានរៀបចំតុបតែងលំនៅឋាន ឬក្រុមហ៊ុនទៅតាមលទ្ធភាព និងធនធាន ។ ជាការកត់សម្គាល់ បន្ទាប់ពីថ្ងៃសែនចូលឆ្នាំរួច បណ្ដាអាជីវករ ពាណិជ្ជករ និងធុរជនដែលជាប់សែស្រឡាយចិន តែងជួលម៉ុងសាយមកលោត និងសម្ដែងនៅតាមផ្ទះ ឬក្រុមហ៊ុន ដើម្បីដេញឧបទ្រពចង្រៃនៅឆ្នាំចាស់ និងសុំសេចក្តីសុខសប្បាយនៅឆ្នាំថ្មី ។
ជាមួយគ្នានេះដែរ ក្រុមអ្នកលោតម៉ុងសាយក៏ចាប់ផ្ដើមមមាញឹក ដោយត្រូវត្រៀមខ្លួនបំពេញការងារក្នុងរយៈពេលនេះ ដើម្បីលោតម៉ុងសាយតាមផ្ទះ ក្រុមហ៊ុន ឬទីសក្ការនានា ដែលមានការកក់រួចជាស្រេច ។
បើតាម លោក ប៊ុន ឃាង សមាជិកក្រុមម៉ុងសាយនៅរាជធានីភ្នំពេញ បានឲ្យដឹងកាលពីថ្ងៃទី១៣ កុម្ភៈ ថា ពេលនេះ ក្រុមរបស់លោកមានគេកក់រួចរាល់ហើយ ដើម្បីត្រៀមលោតបន្ទាប់ពីសែនចូលឆ្នាំមួយថ្ងៃ ។ លោកថា ៖« ការងារនេះតែងតែមមាញឹកនៅរដូវកាលបុណ្យចូលឆ្នាំចិន ព្រោះវាជារដូវដែលប្រជាជនខ្មែរកាត់ចិន និងមានអបិយជំនឿលើម៉ុងសាយនេះ ហៅពួកយើងឲ្យលោតនៅមុខផ្ទះ ឬមុខក្រុមហ៊ុនរបស់ពួកគេ ដើម្បីសុំសិរីសួស្ដី »។
លោកបន្តថា ការសម្ដែង និងលោតម៉ុងសាយក្នុងក្រុមរបស់លោក មិនមានកំណត់តម្លៃ ឬទីផ្សារណាមួយនោះទេ ពោលគឺអាស្រ័យទៅតាមសទ្ធារបស់អ្នកដែលអញ្ជើញឲ្យទៅលោតនោះ ។
លោកថា ៖« បច្ចុប្បន្ននេះ ក្រុមម៉ុងសាយនៅរាជធានីភ្នំពេញមានប្រមាណ១០ក្រុម ។ ចំពោះក្រុមម៉ុងសាយយើងមិនកំណត់តម្លៃទេ យើងលោតសម្ដែងនៅតាមផ្ទះអ្នកដែលបានមកអញ្ជើញ ហើយចំពោះទឹកប្រាក់វិញ គឺជាទឹកចិត្តរបស់ពួកគាត់ទេ » ។
លោក គួច ណាវ ពាណិជ្ជករខ្មែរកាត់ចិន ដែលតែងតែអញ្ជើញក្រុមម៉ុងសាយរបស់សមាគមចិន-ខ្មែរ មកលោតនៅមុខផ្ទះ ដើម្បីសុំសេចក្តីសុខសួស្តីដល់ក្រុមគ្រួសារ និងអាជីវកម្មរបស់ខ្លួនជារៀងរាល់ឆ្នាំ បានលើកឡើងថា ប្រពៃណីចិន គេយកម៉ុងសាយមកលោតនៅផ្ទះ និងតុបតែងពណ៌ក្រហម ព្រោះបើតាមជំនឿរបស់ជនជាតិចិន ក្រហមជាពណ៌ដែលពពួកខ្មោច និងភាពអាក្រក់ៗទាំងឡាយខ្លាចរអា ដូចនេះហើយទើបគេយកម៉ុងសាយពណ៌ក្រហមមកលោតនៅតាមផ្ទះ និងតាមក្រុមហ៊ុន ឬអាជីវកម្មនានា ។
លោកបន្តថា ៖« រាល់ឆ្នាំ ខ្ញុំតែងតែហៅក្រុមលោតម៉ុងសាយមកលោត បើមិនអីចឹង ក៏ក្រុមម៉ុងសាយទាំងនោះមកសួរខ្ញុំថា យកក្រុមម៉ុងសាយមកលោតឬអត់ ហើយការចំណាយក៏គេមិនទាមទារពីម្ចាស់ផ្ទះ ឬម្ចាស់ក្រុមហ៊ុនដែរ ពោលគឺដាក់ទៅតាមសទ្ធាជ្រះថ្លា » ។
បើទោះបីជាមានការលើកឡើងបែបនេះក្ដី តែកន្លងមក បើតាមប្រធានសមាគមម៉ុងសាយខ្មែទាជីវ បានលើកឡើងថា ចំពោះតម្លៃក្នុងការសម្តែងម្តងៗ វាអាស្រ័យទៅលើការចង់បានរបស់អតិថិជនថាតើគេចង់បានវង់ធំ ឬវង់តូច ក្នុងនោះមានតម្លៃចាប់ពី៣៨៨ដុល្លារ រហូតដល់ជិត២.០០០ដុល្លារ ។ តម្លៃនោះទៀតសោតគឺមានកន្ទុយ៨៨ដោយសារគេគិតថា នេះជាលេខហុងស៊ុយដូចជា៣៨៨ដុល្លារ ឬ១.៦៨៨ដុល្លារជាដើម ។
លោកគួច ណាវ ក៏បានបន្ថែមដែរថា ៖« ការលោតម៉ុងសាយនេះ វាមិនខុសអីពីការសម្ដែងរបាំត្រុដនៅក្នុងពិធីបុណ្យចូលឆ្នាំខ្មែរនោះទេ ។ ពេលរដូវបុណ្យចូលឆ្នាំខ្មែរ គេក៏ហៅក្រុមរបាំត្រុដមកសម្ដែង និងរាំនៅតាមផ្ទះ ឬតាមស្ថាប័ននានា ដើម្បីដេញភាពចង្រៃចេញ និងប្រោះព្រំសុំសេចក្តីសុខនៅឆ្នាំថ្មី ដូច្នេះម៉ុងសាយក៏វាមានបែបផែនដូចនេះដែរ»។
លោកបញ្ជាក់ថា ឆ្នាំនេះ លោកនឹងរៀបចំឲ្យក្រុមម៉ុងសាយមកលោតនៅមុខផ្ទះ និងមុខហាងរបស់លោកនៅក្រោយចូលឆ្នាំចិន ពោលគឺនៅថ្ងៃទី២០ កុម្ភៈ ខាងមុខ ហើយលោកក៏ត្រៀមរួចរាល់សម្រាប់ឲ្យក្រុមម៉ុងសាយមកសម្ដែង និងឡកជូនទស្សនាដល់ពលរដ្ឋជិតខាង ក៏ដូចជាជូនពរជ័យផងដែរ ៕
ចែករំលែកព័តមាននេះ