ខេត្តកំពត ៖ បើតាមសេចក្តីរាយការណ៍ពីលោកវរសេនីយ៍ឯក សៅ សំអឿន ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តបានឲ្យដឹងថា មុខសញ្ញាក្រុមចោរឆក់កាបូបជនបរទេសបួននាក់ ដែលធ្លាប់តែធ្វើសកម្មភាពនៅក្នុងទឹកដីខេត្តកំពត និងទឹកដីខេត្តព្រះស៊ីហនុ នាពេលថ្មីៗកន្លងមកនេះ…
ខេត្តកំពត ៖ បើតាមសេចក្តីរាយការណ៍ពីលោកវរសេនីយ៍ឯក សៅ សំអឿន ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តបានឲ្យដឹងថា មុខសញ្ញាក្រុមចោរឆក់កាបូបជនបរទេសបួននាក់ ដែលធ្លាប់តែធ្វើសកម្មភាពនៅក្នុងទឹកដីខេត្តកំពត និងទឹកដីខេត្តព្រះស៊ីហនុ នាពេលថ្មីៗកន្លងមកនេះ នៅយប់ថ្ងៃទី០៩ ខែកុម្ភៈ ឆ្នាំ២០១៨ កម្លាំងសមត្ថកិច្ចអន្តរាគមន៍ពិសេសរបស់ស្នងការដ្ឋានខេត្តកំពត បានសហការណ៍ជាមួយកម្លាំងសមត្ថកិច្ចខេត្តព្រះស៊ីហនុ ។
បានចុះប្រតិបត្តិការណ៍បន្តស្រាវជ្រាវចាប់គូកនមុខសញ្ញាក្រុមចោរឆក់ជនបរទេសនៅខេត្តកំពត កាលពីយប់ថ្ងៃទី៣១ ខែមករា ឆ្នាំ២០១៨ ជាលទ្ធផលគឺចាប់បាន២នាក់ ១.ឈ្មោះ តេង ដារិទ្ឋ ហៅ ម៉េង ភេទប្រុស អាយុ១៩ឆ្នាំ លំនៅអចិន្ត្រៃយ៍ភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត ។ ២.ឈ្មោះ ហួន រិទ្ឋី ហៅ អឿន ភេទប្រុស អាយុ២០ឆ្នាំ មានស្រុកកំណើត ស្រុកកោះកុង ខេត្តកោះកុង ទីលំនៅអចិន្ត្រៃយ៍ភូមិសុវណ្ណសាគរ សង្កាត់កំពង់កណ្តាល ក្រុងកំពត ជាមុខសញ្ញាធ្លាប់ជាប់ពន្ធនាគារនៅកំពត ពីបទហឹង្សាដោយចេតនា ។
លោកបានថ្លែងឲ្យដឹងទៀតថា សរុបជនល្មើសដែលឆក់កាបូបជនបរទេសកាលពីយប់ថ្ងៃទី៣១ ខែមករា ឆ្នាំ២០១៨ នៅចំភូមិ១ឧសភា សង្កាត់កំពង់កណ្តាល ក្រុងកំពតរហូត មកដល់ថ្ងៃទី០៩ ខែកុម្ភៈ ឆ្នាំ២០១៨ នេះ កម្លាំងសហការណ៍រវាងសមត្ថកិច្ចខេត្តព្រះស៊ីហនុ និងខេត្តកំពត បង្ក្រាបបានចំនួន៤នាក់ ដែលមានឈ្មោះដូចខាងក្រោម ១.ឈ្មោះ សេង ហុង ភេទប្រុស អាយុ១៧ឆ្នាំ រស់នៅភូមិសុវណ្ណសាគរ សង្កាត់កំពង់កណ្តាល ក្រុងកំពត (ចាប់ខ្លួនថ្ងៃទី៦កុម្ភៈ២០១៨ តុលាការឃុំខ្លួនរួចហើយ) ។
២.ឈ្មោះ សំ រតនា ហៅ ឆាង ភេទប្រុស អាយុ១៩ឆ្នាំ ភូមិកំណើតកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត (ចាប់ខ្លួនថ្ងៃទី៩កុម្ភៈ២០១៨ នៅភ្នំពេញបញ្ជូនមកខេត្តកំពត) ។ ៣.ឈ្មោះ តេង ដារិទ្ឋ ហៅ ម៉េង (ចាប់ខ្លួនយប់ថ្ងៃទី៩កុម្ភៈ២០១៨ នៅក្រុងកំពង់សោមបញ្ជូនមកកំពត) ។ ៤.ឈ្មោះ ហួន រិទ្ឋី ហៅ អឿន (ចាប់ខ្លួនយប់ថ្ងៃទី៩កុម្ភៈ២០១៨ នៅកំពង់សោម ហើយបញ្ជូនមកខេត្តកំពតដែរ) ។ ជនសង្ស័យជាមុខសញ្ញាចោរឆក់ទាំង៤នាក់ សមត្ថកិច្ចការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត កំពុងកសាងសំណុំរឿងបញ្ជូនទៅតុលាការដើម្បីចាត់ការបន្តតាមនីតិវិធី ៕
ចែករំលែកព័តមាននេះ