រាជធានីភ្នំពេញ ៖ យោងតាមរបាយការណ៍ស្តីពីសន្ទស្សន៍ឥណទានលក្ខណៈបុគ្គលរបស់ការិយាល័យឥណទានកម្ពុជា ហៅថា ស៊ីប៊ីស៊ី បានបង្ហាញថា ចំនួនអ្នកស្នើសុំប្រាក់កម្ចីបានបន្តកើនឡើងនៅក្នុងត្រីមាសទី៤នេះ បន្ទាប់ពីធ្លាក់ចុះក្នុងត្រីមាសទី២ និងកើនឡើងបន្តិចក្នុងត្រីមាសទី៣ ឆ្នាំ២០១៧ ។ ក្នុងត្រីមាសនេះ ផលិតផលទាំងបីបានកើនឡើង ដោយឡែក យើងសង្កេតឃើញថា ការស្នើសុំប័ណ្ណឥណទានកើនឡើងគួរឲ្យកត់សម្គាល់រហូតដល់៩៤% ធៀបនឹងត្រីមាសមុន ។
ទន្ទឹមនឹងនេះ កម្ចីមិនដំណើរការលើសពី៣០ថ្ងៃស្ថិតក្នុងស្ថានភាពល្អ អនុបាតបានបន្តធ្លាក់ចុះនៅត្រឹម១,៥១% គិតត្រឹមខែធ្នូ ឆ្នាំ២០១៧ ទាបជាងអនុបាតកាលពីខែធ្នូ ឆ្នាំ២០១៦ ខណៈសមតុល្យកម្ចីលក្ខណៈបុគ្គលសរុបបានកើនឡើង៤៤% ក្នុងអំឡុងពេល១២ខែនេះ ។
តាមរបាយការណ៍ក្នុងត្រីមាសទី៤ ឆ្នាំ២០១៧ បានបង្ហាញថា ការស្នើសុំឥណទានលក្ខណៈបុគ្គលបានកើនឡើងក្នុងកម្រិត+១៩% ធៀបនឹងត្រីមាសទី៣ ដែលមានកម្រិត+១០%។ កំណើននេះ ដោយសារតែមានការកើនឡើងនៃការស្នើសុំប្រាក់កម្ចីនៃផលិតផលទាំង៣ប្រភេទគឺ ការស្នើសុំហិរញ្ញវត្ថុផ្ទាល់ខ្លួន (+១៥%) ការស្នើសុំប័ណ្ណឥណទាន (+៩៤%) និងការស្នើសុំកម្ចីអចលនទ្រព្យ (+៦២%) ។ ការស្នើសុំប័ណ្ណឥណទានមានកំណើនគួរឲ្យចាប់អារម្មណ៍ ដោយសារតែមានការស្នើសុំកើនឡើងខ្ពស់នៅតំបន់ទំនាប (+១០៩%) ពិសេសមានកំណើនឡើងខ្ពស់ក្នុងរាជធានី និងតំបន់ទន្លេសាប (+៣៥%) ដោយមានកំណើនមធ្យមក្នុងខេត្តសៀមរាប ។
ដោយឡែក តំបន់ឆ្នេរ និងតំបន់ខ្ពង់រាបធ្លាក់ចុះក្នុងកម្រិត-៣១% និង-៤% រៀងគ្នា លើការស្នើសុំប័ណ្ណឥណទានក្នុងត្រីមាសទី៤ ផងដែរ ។ ចំណែកកម្ចីអចលនទ្រព្យ ការកើនឡើងនៃការស្នើសុំក្នុងត្រីមាសទី៤នេះ ជាចម្បងក្នុងតំបន់ទំនាប រួមមាន ខេត្តកំពង់ស្ពឺ ព្រៃវែង និងតាកែវ ។
ក្នុងចំណោមត្រីមាសទាំង៤ឆ្នាំ២០១៧ ចំនួនគណនីឥណទានត្រីមាសទី៤ បានកើនឡើងលំដាប់ទី២ បន្ទាប់ពីត្រីមាសទី១ ។
វាបានកើនឡើងក្នុងកម្រិត+៦,៤០% ក្រោយពីថមថយបន្តិចក្នុងត្រីមាសទី៣ ដោយមានកំណើន+២,១១% ធ្លាក់ពី+៤,១៩% ជាកំណើនក្នុងត្រីមាសទី២ ។ គិតត្រឹមខែធ្នូ ឆ្នាំ២០១៧ ចំនួនគណនីឥណទានសរុបកើនឡើងដល់២,៦៩លានគណនី ក្នុងនោះគណនីឥណទានលក្ខណៈបុគ្គលមានចំនួន៨៤៣ពាន់គណនី (ប្រៀបធៀប៨០១ពាន់គណនីក្នុងត្រីមាសទី៣) ស្មើនឹង៣១% នៃចំនួនគណនីឥណទានសរុប ។ គិតជាចំនួនគណនី ហិរញ្ញវត្ថុផ្ទាល់ខ្លួន នៅតែមានចំណែកច្រើនជាងគេក្នុងចំណោមប្រាក់កម្ចីលក្ខណៈបុគ្គលសរុប ដែលស្មើនឹង៨១,០៨% បន្ទាប់មក គឺកម្ចីអចលនទ្រព្យដែលមាន១១,២៤% និងជាប័ណ្ណឥណទានស្មើនឹង៧,៦៨% ។
អាស្រ័យដោយចំនួនគណនីឥណទានសរុបកើនឡើង សមតុល្យឥណទានបានកើនឡើងស្របគ្នាក្នុងកម្រិត+៨,៧០% ធៀបនឹងត្រីមាសទី៣ ដែលមានចំនួន+៧,៨៥% ។ កំណើននេះធ្វើឲ្យសមតុល្យឥណទានកើនឡើងមកដល់៤,៥៤ពាន់លានដុល្លារអាមេរិកនៅបំណាច់ត្រីមាស ស្មើនឹង២៨% នៃសមតុល្យឥណទានសរុបក្នុងទីផ្សារ ។
ស្រដៀងនឹងចំនួនគណនីផងដែរ ហិរញ្ញវត្ថុផ្ទាល់ខ្លួននៅតែមានចំណែកច្រើនជាងគេ ៥០,០៣% នៃសមតុល្យឥណទានលក្ខណៈបុគ្គលសរុប កម្ចីអចលនទ្រព្យនៅតែមានលំដាប់លេខ២ ចំណែកធំជាងមុន៤៩,១១% (ប្រៀបធៀប៤៧,៩៣% ខែធ្នូ ឆ្នាំ២០១៦) នៃសមតុល្យឥណទានលក្ខណៈបុគ្គលសរុប សម្រាប់ប័ណ្ណឥណទាននៅតែមានចំណែកមួួយដ៏តូចត្រឹមតែ០,៨៦%នៃសមតុល្យឥណទានលក្ខណៈបុគ្គលសរុប (កើនឡើងបន្តិចពី០,៨៣% គិតត្រឹមខែធ្នូ ឆ្នាំ២០១៦) ។ បើប្រៀបធៀបនឹងពេលដូចគ្នានាចុងឆ្នាំ២០១៦ វានៅតែមានភាពដូចគ្នាសម្រាប់ទីតាំងដែលប្រើប្រាស់ឥណទានលក្ខណៈបុគ្គលច្រើនជាងគេ រួមមាន រាជធានីភ្នំពេញ ខេត្តកណ្តាល សៀមរាប និងកំពង់ស្ពឺ រៀងគ្នា ជាតំបន់ដែលមានសមតុល្យឥណទានឈានមុខគេ ។
ចំណែកប្រាក់កម្ចីមិនដំណើរការលើសពី៣០ថ្ងៃ (NPL 30) មានភាពល្អជាងមុននៅគ្រប់តំបន់ ប្រៀបធៀបនឹងត្រីមាសទី៣ ។ វាបានបន្តធ្លាក់ចុះពី១,៦១%ក្នុងត្រីមាសទី៣ មកត្រឹម១,៥១%គិតត្រឹមខែធ្នូ ឆ្នាំ២០១៧ ។ ម្យ៉ាងវិញទៀត វាបានធ្លាក់ចុះជាងមុនបន្តិចទៀត បើប្រៀបធៀបនឹងត្រីមាសដូចគ្នាកាលពីឆ្នាំ២០១៦ ខណៈសមតុល្យឥណទានសរុបបានកើនឡើងរហូតដល់ទៅ៤៤% បើប្រៀបធៀបពីត្រីមាសទី៤ ឆ្នាំ២០១៦ និងត្រីមាសទី៤ ឆ្នាំ២០១៧ ៕
ចែករំលែកព័តមាននេះ