រាជធានីភ្នំពេញ ៖ ជាថ្មីម្តងទៀតតារាចម្រៀងពីរដួងក្នុងផលិតកម្មតែមួយគឺ ទេព បូព្រឹក្ស និងជី ដេវីដ បានបង្ហាញភាពស្និទ្ធស្នាលគ្នាកាន់តែខ្លាំងឡើងក្នុងពិធីឡើងគេហដ្ឋានថ្មីរបស់បូព្រឹក្ស ។
ទេព បូព្រឹក្ស បានបង្ហោះរូបភាពឡើងគេហដ្ឋានថ្មីរបស់នាងនៅថ្ងៃមាឃបូជា ទី៣១ មករា ២០១៨ ដោយក្នុងរូបភាពនោះក៏មានជីដេវីដ ផងដែរ ។ បើយោងតាម Instagram របស់តារាចម្រៀងស្រីប្រចាំផលិកម្មហង្សមាស កញ្ញាទេព បូព្រឹក្ស បានបង្ហោះវីដេអូមួយបង្ហាញរូបនាងកំពុងរៀបចំពិធីសូត្រមន្តឡើងគេហដ្ឋានថ្មី ដោយនាង និងលោកជីដេវីដ អង្គុយជិតគ្នា យ៉ាងស្និទ្ធស្នាល ប្រៀបបាននឹងប្តីប្រពន្ធថ្មោងថ្មី ។ មិនតែប៉ុណ្ណោះជួយរៀបចំ អ្វីៗក្នុងពិធីជាមួយគ្នា ដោយលោកដេវីដ មើលទៅដូចជាម្ចាស់ផ្ទះដែរ ។
នេះមិនមែនលើកដំបូងឡើយដែលអ្នកទាំងពីរបានបង្ហាញវត្តមានរួមគ្នាដូចគូស្នេហ៍ទាំងនៅលើឆាកសិល្បៈ និងក្រៅឆាក ។ បើទោះបីជាភាពស្និទ្ធស្នាលដោយបើកចំហជាសាធារណៈមិនមានការលាក់លៀមពីតារាទាំងពីរនោះក៏ដោយ ប៉ុន្តែរហូតមកដល់ពេលនេះពួកគេនៅមិនទាន់បញ្ជាក់ច្បាស់ថា ស្នេហ៍ ឬមិនមែនស្នេហ៍នោះទេ ។
ទេព បូព្រឹក្ស និងលោកងួន ចាន់ដេវីត បានចាប់ដៃគូច្រៀងជាមួយគ្នា ក្នុងកម្មវិធីប្រគំតន្ត្រីនានា ខណៈតារាចម្រៀងទាំងពីរនាក់នេះ ត្រូវទស្សនិកជនសង្ស័យថា កំពុងបង្កាត់ភ្លើងស្នេហ៍ជាមួយគ្នា ៕
ចែករំលែកព័តមាននេះ