ខេត្តសៀមរាប៖លោកស្រី គួយ ណាលីន ឃឹមប៊ុនសុង អនុប្រធានគណៈ កម្មាធិការសាខាកាកបាទក្រហមកម្ពុជា ខេត្តសៀមរាប និងសហការី បានផ្តល់ផ្ទះមនុស្សធម៌ទី៤៥ និងអណ្តូងទឹកស្អាត ជូនដល់ប្អូនប្រុស ប៊ុន បៀន អាយុ២៤ឆ្នាំ មានភរិយាឈ្មោះ ហែម ប៉ុក អាយុ២៣ឆ្នាំ មានកូចតូច២នាក់ ជាគ្រួសារទីទ័លក្រ និងខ្វះជម្រក រស់នៅភូមិ ដំបូកខ្ពស់ ឃុំតាសៀម ស្រុកស្វាយលើ ខេត្តសៀមរាប នាថ្ងៃទី ០៤ ខែកម្ភៈ ឆ្នាំ២០១៨ ផ្ដួចផ្ដើមដោយលោក ឃឹម ប៊ុនសុង ប្រធានគណៈកម្មាធិការសាខា ដែលមានផ្ទះមានទំហំ៥ម៉ែត្រ x ៦ម៉ែត្រ ធ្វើពីឈើ ប្រក់ស័ង្កសី ក្រាលក្ដារ ជញ្ជាំងក្ដារ តម្កល់លើជើងតាងកម្ពស់១.៨០ម៉ែត្រ បច្ចុប្បន្នដើរស៊ីឈ្នួលដកដំឡូង ដើម្បីដោះស្រាយជីវភាពគ្រួសារ ។
បន្ទាប់ពីប្រគល់ផ្ទះមនុស្សធម៌ទី៤៥រួច លោកស្រី និងប្រតិភូបានអញ្ជើញប្រគល់អណ្ដូងទឹកស្អាតចំនួន២ ជូនដល់សហគមន៍ គឺអណ្ដូងទី២៥ (អណ្ដូងអាហ្វ្រីដេវ ទី១) ប្រគល់ជូនសហគមន៍ភូមិដំបូកខ្ពស់ ឃុំតាសៀម ស្រុកស្វាយលើ និងអណ្ដូងទី២៦ (អណ្ដូងអាហ្វ្រីដេវ ទី២) ប្រគល់ជូនសហគមន៍ភូមិរហាល ឃុំតាសៀម ស្រុកស្វាយលើ ដែលជាតំបន់ខ្វះខាតទឹកប្រើប្រាស់ ។
មានប្រសាសន៍សំណេះសំណាលក្នុងឱកាសនោះ លោកស្រី គួយ ណាលីន ឃឹមប៊ុនសុង អនុប្រធានគណៈ កម្មាធិការសាខាកាកបាទក្រហមកម្ពុជា ខេត្តសៀមរាប ក៏បានពាំនាំនូវការផ្ដាំផ្ញើសួរសុខទុក្ខពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាលោក ឃឹម ប៊ុន សុង ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូបមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។ លោកស្រីក៏បានធ្វើការលើកទឹកចិត្តដល់បងប្អូនត្រូវចេះដាំដំណាំរួមផ្សំនៅជិតៗផ្ទះ ដើម្បីជួយសម្រួលដល់ជីវភាព និងការរស់នៅរបស់បងប្អូន ។ លោកស្រី ក៏បានបន្តថា នេះជារដូវប្រាំងសូមបងប្អូនទាំងអស់ត្រូវចេះប្រុងប្រយ័ត្នចំពោះភ្លើងផ្សែង និងសុខភាព ពិសេសកូនចៅតូចៗ បើឃើញថាមិនស្រួលត្រូវប្រញាប់បញ្ជូនទៅមណ្ឌលសុខភាពដែលនៅជិតបំផុត ។
លោកស្រីក៏បានផ្តាំផ្ញើដល់សមាជិកគ្រួសារទាំងអស់ត្រូវចេះសម្អាតថែរក្សាផ្ទះថ្មីនេះដើម្បីបានជាជម្រកដ៏កក់ក្តៅតរៀងទៅ ពិសេសសហគមន៍ត្រូវចេះជួយថែរក្សាអណ្ដូងទឹកស្អាតទាំងនេះឱ្យបានល្អ ដើម្បីជួយសម្រួលដល់ជីវភាពរស់នៅ និងអាចប្រើប្រាស់បានរយូអង្វែង ។
អំណោយមនុស្សធម៌បន្ថែមទៀតក្នុងការប្រគល់ផ្ទះនោះរួមមាន ៖ មុង១ ភួយ១ សារុង១ ក្រមា១ កន្ទេល១ អង្ករ៥០គីឡូក្រាម មី១កេស ត្រីខ១យួរ ទឹកត្រី១យួរ ទឹកបរិសុទ្ធ៥យួរ សម្ភារផ្ទះបាយមួយចំនួន និងថវិកា២០ម៉ឺនរៀល សម្រាប់លោកតា លោកយាយ ដែលអញ្ជើញចូលរួមពិធីប្រគល់ផ្ទះម្នាក់ៗទទួលបានថវិកា១ម៉ឺនរៀល ដោយឡែកសម្រាប់ប្រជាពលរដ្ឋចូលរួមក្នុងពិធីប្រគល់អណ្ដូង ម្នាក់ៗទទួលបាន សារុង១ និងថវិកា១ម៉ឺនរៀលផងដែរ ។
សូមបញ្ជាក់ផងដែរថា បន្ទាប់ជួបធ្វើការងារមនុស្សធម៌ក្នុងសហគមន៍រួចមក លោកស្រី និងប្រតិភូបានអញ្ជើញត្រួតពិនិត្យអគារទីស្នាក់ការអនុសាខាកាកបាទក្រហមកម្ពុជា ស្រុកស្វាយលើ ដែលបានសាងសង់កាលពីថ្ងៃទី១១ ខែកញ្ញា ឆ្នាំ២០១៧ មានទីតាំងស្ថិតនៅភូមិជប់ក្រោមស្វាយលើ ស្រុកស្វាយលើ ខេត្តសៀមរាប សម្រេចរួចរាល់ជាស្ថាពរ ហើយអគារនេះគ្រោងនឹងបើកសម្ពាធនៅថ្ងៃខាងមុខឆាប់ៗនេះផងដែរ ៕
ចែករំលែកព័តមាននេះ