រាជធានីភ្នំពេញ ៖ ដើម្បីកំណត់អត្តសញ្ញាណសំណង់អគារឱ្យកាន់តែច្បាស់លាស់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បាននិងកំពុងជំរុញឱ្យមន្ត្រីក្រោមឱវាទរៀបចំប្រមូលទិន្នន័យសំណង់អគារគ្រប់ប្រភេទចងក្រងដាក់បញ្ចូលទៅក្នុងប្រព័ន្ធទិន្នន័យ Google Map ងាយស្រួលទាំងការគ្រប់គ្រង…
រាជធានីភ្នំពេញ ៖ ដើម្បីកំណត់អត្តសញ្ញាណសំណង់អគារឱ្យកាន់តែច្បាស់លាស់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បាននិងកំពុងជំរុញឱ្យមន្ត្រីក្រោមឱវាទរៀបចំប្រមូលទិន្នន័យសំណង់អគារគ្រប់ប្រភេទចងក្រងដាក់បញ្ចូលទៅក្នុងប្រព័ន្ធទិន្នន័យ Google Map ងាយស្រួលទាំងការគ្រប់គ្រង និងអាចឆ្លើយតបទៅរាជរដ្ឋាភិបាលទាន់ពេលវេលា ហើយក៏ជាគោលនយោបាយថ្មីមួយទៀតដែរដើម្បីប្រមូលថវិកាជាតិ ខណៈគម្រោងនេះ លោកមានបំណងធ្វើអស់រយៈពេល២ឆ្នាំហើយ ។
លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍នាពេលថ្មីៗនេះថា ៖« ខ្ញុំគុំ២ឆ្នាំហើយ គុំយ៉ាងម៉េច គឺថា សំណង់នេះងាកទៅឃើញវាខ្ពស់ ហើយអត់ដឹងថា សំណង់ជារបស់អ្នកណា ? ខ្ញុំខ្លាចអង្គុយវេទិកាខាងក្រោយសម្តេច បើសម្តេចសួរ ឱ្យខ្ញុំឆ្លើយយ៉ាងម៉េច បើខ្ញុំអត់មានទិន្នន័យក្នុងដៃផង»។
លោករដ្ឋមន្ត្រីបញ្ជាក់ថា ៖« ឥឡូវនេះ យើងសម្រេចយកប្រព័ន្ធទិន្នន័យតាម Google Map ដែលមិនដាក់តែសំណង់អគារ និងសណ្ឋាគារទេ គឺដាក់សំណង់ភោជនីយដ្ឋាន រមណីយដ្ឋាន វត្តអារាម និងសំណង់ផ្សេងៗដូចជា សំណង់បេតិកភណ្ឌដាក់ចម្រុះគ្នា ។ ការដាក់នេះ គឺបញ្ចូលទិន្នន័យរបស់ប្រទេសឱ្យតែមានសំណង់ ទោះបីសំណង់នោះចេញដោយក្រសួងរៀបចំដែនដី, ចេញច្បាប់អនុញ្ញាតដោយខេត្ត-ក្រុង ឬអភិបាលស្រុក-ខណ្ឌក្តី » ។
បើតាមលោករដ្ឋមន្ត្រី ការដាក់បញ្ចូលទិន្នន័យសំណង់អគារទាំងអស់នៅក្នុងប្រទេសកម្ពុជានេះ គឺដើម្បីឱ្យមានភាពងាយស្រួលក្នុងការគ្រប់គ្រង និងមានសារប្រយោជន៍សម្រាប់ក្រសួងនាពេលខាងមុខ ។
លោកបន្តថា ៖« ចំពោះការដាក់បញ្ចូលសំណង់នៅគ្រប់ទីកន្លែងទាំងអស់តាមថ្នាក់ រមណីយដ្ឋាន សណ្ឋាគារ និងភោជនីយដ្ឋាន នេះ គឺក្នុងគោលដៅគ្រប់គ្រង បើយើងចង់ដឹងគ្រាន់តែចុច អាចដឹងបានភ្លាមៗ។ ការដាក់នេះ វាមិនអត់ប្រយោជន៍ទេ ពេលខ្ញុំប្រមូលបានទិន្នន័យទាំងអស់ហើយ យើងនឹងចាប់ផ្តើមបញ្ចូលទៅក្នុងគេហទំព័ររបស់ក្រសួង ។ នៅពេលគេឃើញទំនងល្អ គេនឹងផ្សាយពាណិជ្ជកម្ម ដែលអាចបានចំណូលចូលថវិកាជាតិថែមទៀត » ។
យោងតាមរបាយការណ៍ប្រចាំឆ្នាំ២០១៧ របស់ក្រសួងរៀបចំដែនដី នគរូបនីយកម្ម និងសំណង់បង្ហាញថា គិតចាប់ពីឆ្នាំ២០០០ រហូតដល់ឆ្នាំ២០១៧កន្លងទៅនេះ នៅទូទាំងប្រទេសកម្ពុជាមានសំណង់អគារខ្ពស់ៗចាប់ពី៥ជាន់ឡើងទៅ មានចំនួន៩៨៥អគារ ៕
ចែករំលែកព័តមាននេះ