រាជធានីភ្នំពេញ ៖ នៅមួយរយៈពេលចុងក្រោយនេះ ទំនាក់ទំនងការទូតរវាងប្រទេសទាំងពីរ កម្ពុជា-សហរដ្ឋអាមេរិក ត្រូវបានគេមើលឃើញថា ហាក់មិនសូវល្អនឹងគ្នាប៉ុន្មានទេ ដោយក្នុងនោះមន្ត្រីជាន់ខ្ពស់កម្ពុជា និងអាមេរិកបានផ្លែផ្កាដាក់គ្នាទៅវិញទៅមកគួរឲ្យកត់សម្គាល់ ។…
រាជធានីភ្នំពេញ ៖ នៅមួយរយៈពេលចុងក្រោយនេះ ទំនាក់ទំនងការទូតរវាងប្រទេសទាំងពីរ កម្ពុជា-សហរដ្ឋអាមេរិក ត្រូវបានគេមើលឃើញថា ហាក់មិនសូវល្អនឹងគ្នាប៉ុន្មានទេ ដោយក្នុងនោះមន្ត្រីជាន់ខ្ពស់កម្ពុជា និងអាមេរិកបានផ្លែផ្កាដាក់គ្នាទៅវិញទៅមកគួរឲ្យកត់សម្គាល់ ។ យ៉ាងណាក៏ដោយ បើងាកមកមើលស្ថានភាពវិនិយោគ និងការធ្វើអាជីវកម្មរបស់អាមេរិកនៅកម្ពុជាវិញ នៅតែបន្តដំណើរដោយរលូន និងមិនខ្វល់ពីទំនាក់ទំនងឡើយ ។ ជាក់ស្ដែង ក្រុមហ៊ុនធំៗរបស់អាមេរិកបានចូលមកស្វែងរកការវិនិយោគជាបន្ដបន្ទាប់ ហើយក៏មានអាជីវកម្មម៉ាកល្បីៗរបស់អាមេរិកជាច្រើនទៀតបានបន្តចូលមកកាន់ទីផ្សារកម្ពុជាផងដែរ ។
រដ្ឋលេខាធិការក្រសួងពាណិជ្ជកម្មកម្ពុជា លោក កឹម ស៊ីថន បានឲ្យដឹងថា ដោយសារមានការជឿជាក់លើស្ថានភាពនយោបាយ និងសេដ្ឋកិច្ចរបស់ប្រទេសកម្ពុជា វិនិយោគិនបរទេសជាច្រើនបានបន្តចូលមកបណ្ដាក់ទុនធ្វើអាជីវកម្មផ្សេងៗក្នុងប្រទេសកម្ពុជា ហើយក្នុងនោះក៏មានក្រុមហ៊ុនម៉ាកល្បីៗជាច្រើនរបស់សហរដ្ឋអាមេរិកផងដែរ ។
លោកបន្តថា វិស័យពាណិជ្ជកម្ម សេវាកម្ម និងការនាំចេញ-នាំចូល បាននិងកំពុងតែមានការអភិវឌ្ឍ និងរីកលូតលាស់ពីមួយថ្ងៃទៅមួយថ្ងៃ ដែលបានរួមចំណែកជំរុញឲ្យសេដ្ឋកិច្ចកម្ពុជារីកចម្រើនក្នុងអត្រាមធ្យម៧%ក្នុងរយៈពេល២០ឆ្នាំកន្លងមកនេះ ហើយក៏មានម៉ាកល្បីៗជាច្រើនចូលមកកាន់ទីផ្សារកម្ពុជា ។ លោកថា ៖« ក្នុងឆ្នាំ២០១៧កន្លងទៅនេះ មានម៉ាកល្បីៗចំនួន៩៩ ត្រូវបានម្ចាស់ម៉ាកទាំងនោះប្រគល់សិទ្ធិឲ្យក្រុមហ៊ុនក្នុងស្រុកគ្រប់គ្រង និងបែងចែកលក់បន្តក្នុងនាមជាម្ចាស់ម៉ាក » ។
លោក William A.Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានឲ្យដឹងផងដែរថា លោកពិតជារីករាយនៅពេលបានឃើញម៉ាកល្បីៗរបស់អាមេរិកនៅក្នុងទឹកដីព្រះរាជាណាចក្រកម្ពុជា ។ តាមរយៈស្ថានភាព និងភាពជាដៃគូរវាងវិនិយោគិនខ្មែរ និងបរទេស លោកសង្ឃឹមថា ម៉ាកល្បីៗអាមេរិកជាច្រើនទៀតនឹងចូលមកកាន់ទីនេះ ដើម្បីធ្វើអាជីវកម្មរួមគ្នាជាមួយវិនិយោគិនខ្មែរ ។
លោកបន្តថា ៖« វិនិយោគិនទាំងពីរប្រទេសពិតជាមានភាពឆ្លាតវៃ ព្រោះគេបានយល់ច្បាស់ពីទីផ្សារនៅក្នុងប្រទេសកម្ពុជានាពេលបច្ចុប្បន្ន និងតម្រូវការនៅពេលអនាគត ។ យើងសង្ឃឹមថាពួកគេនឹងធ្វើការជាមួយគ្នាកាន់តែល្អដើម្បីឲ្យអាជីវកម្មពួកគេនៅទីនេះកាន់តែរីកចម្រើន និងល្បីល្បាញ » ។
គួរបញ្ជាក់ថា បច្ចុប្បន្ន វត្តមានផលិតផលនិងអាជីវកម្មអាមេរិកមួយចំនួននៅកម្ពុជា ត្រូវបានទទួលស្គាល់ និងគាំទ្រពីសំណាក់ភ្ញៀវជាតិ និងអន្តរជាតិនៅកម្ពុជា ក្នុងនោះដែរ គេសង្កេតមានម៉ាកភោជនីយដ្ឋាន ហាងកាហ្វេ រថយន្តល្បីៗ និងសេវាកម្មមួយចំនួនទៀតរបស់អាមេ រិកកំពុងដំណើរការនៅក្នុងប្រទេសកម្ពុជា ៕
ចែករំលែកព័តមាននេះ