រាជធានីភ្នំពេញ ៖ រាជរដ្ឋាភិបាលកម្ពុជានឹងរៀបចំបុណ្យទន្លេលើកទី៤ នៅក្រុងតាខ្មៅ ទីរួមខេត្តកណ្ដាល ដែលនឹងធ្វើឡើងចាប់ពីថ្ងៃទី៩-១១ ខែមីនា ខាងមុខ ជាមួយការរំពឹងទុកថា នឹងមានអ្នកចូលរួមជាង១លាននាក់…
រាជធានីភ្នំពេញ ៖ រាជរដ្ឋាភិបាលកម្ពុជានឹងរៀបចំបុណ្យទន្លេលើកទី៤ នៅក្រុងតាខ្មៅ ទីរួមខេត្តកណ្ដាល ដែលនឹងធ្វើឡើងចាប់ពីថ្ងៃទី៩-១១ ខែមីនា ខាងមុខ ជាមួយការរំពឹងទុកថា នឹងមានអ្នកចូលរួមជាង១លាននាក់ ។
ការសម្រេចជ្រើសរើសយកខេត្តកណ្តាលដើម្បីរៀបចំបុណ្យលើកទី៤នេះ ធ្វើឡើងក្នុងកិច្ចប្រជុំនៅសាលាខេត្តកណ្ដាល កាលពីថ្ងៃទី២២ មករា ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោក ម៉ៅ ភិរុណ អភិបាលខេត្តកណ្ដាល ។ ការជ្រើសរើសទីតាំងនេះដែរ បន្ទាប់ពីគណៈអធិបតីទាំងពីរបានដឹកនាំប្រតិភូ និងមន្ត្រីពាក់ព័ន្ធចុះត្រួតពិនិត្យទីតាំងជាក់ស្ដែងតាមមាត់ទន្លេបាសាក់ ក្នុងដែនរដ្ឋបាលក្រុងតាខ្មៅ ។
ថ្លែងទៅកាន់អង្គប្រជុំ លោក ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងថា ទីតាំងនៅក្រុងតាខ្មៅ ខេត្តកណ្តាល មានភូមិសាស្ត្រនៅជិតរាជធានីភ្នំពេញ ដូច្នេះនឹងមានភ្ញៀវទេសចរចូលរួមកម្សាន្តប្រមាណ១លាន៥សែននាក់ ។
នេះជាលើកទី៤ហើយដែលរាជរដ្ឋាភិបាលកម្ពុជាបានរៀបចំបុណ្យទន្លេ ដែលកាលពីលើកទី១ បានរៀបចំនៅខេត្តក្រចេះក្នុងឆ្នាំ២០១៥, លើកទី២នៅខេត្តកំពង់ចាម និងលើកទី៣កាលពីឆ្នាំ២០១៧ រៀបចំនៅខេត្តស្ទឹងត្រែង។ បុណ្យទន្លេត្រូវបានសម្រេចរៀបចំឡើងដោយយកសប្តាហ៍ទី១ ឬទី២ ក្នុងខែមីនា ។ បុណ្យទន្លេបានក្លាយជាព្រឹត្តិការណ៍ទេសចរណ៍ក្នុងយុទ្ធនាការផ្សព្វផ្សាយអាស៊ានផងដែរ ហើយបុណ្យនេះដែរ ក៏ជាផលិតផលទេសចរណ៍ឆ្លើយតបនឹងក្របខ័ណ្ឌនយោបាយយុទ្ធសាស្ត្រ នៃកិច្ចសហប្រតិបត្តិការមេគង្គ-ឡានឆាង មហាអនុតំបន់មេគង្គ អាស៊ានមេគង្គ-គង្គា ។
រដ្ឋមន្ត្រីក្រសួងទេសចរណ៍ លោក ថោង ខុន បានសង្កត់ធ្ងន់ថា ដើម្បីរៀបចំពិធីបុណ្យទន្លេលើកទី៤នេះ ឲ្យមានភាពឱឡារឹក និងទទួលបានជោគជ័យផងនោះ ភាគីពាក់ព័ន្ធទាំងអស់ត្រូវចូលរួមសហការគ្នាបំពេញការងារឲ្យបានគ្រប់ជ្រុងជ្រោយ ដោយក្នុងនោះ លោកបានណែនាំឱ្យអនុវត្តការងារចាំបាច់មួយចំនួន ដូចជា ៖
១-ត្រូវយកឱកាសប្រារព្ធពិធីបុណ្យទន្លេនេះ ធ្វើជាយុទ្ធនាការទីក្រុងស្អាត រៀបចំសណ្ដាប់ធ្នាប់សាធារណៈបន្ថែម និងសម្អាតបង្គន់អនាម័យសាធារណៈ ដោះស្រាយបញ្ហាសំរាម និងត្រូវដាក់ធុងសំរាមបន្ថែមនៅតាមទីសាធារណៈ ត្រូវមានការតុបតែងរចនាលម្អគេហដ្ឋានរបស់ប្រជាពលរដ្ឋទាំងនៅក្នុងក្រុងតាខ្មៅ ក៏ដូចជានៅត្រើយម្ខាង និងទូទាំងខេត្តផង ដែរ ។
២-ពង្រឹងការគ្រប់គ្រងអភិវឌ្ឍន៍រមណីយដ្ឋាន គុណភាពសេវាទេសចរណ៍នៅតាមភោជនីយដ្ឋាន អាហារដ្ឋាននានាឲ្យបានសមរម្យ និងមានការពេញចិត្ត ពិសេសត្រូវយកចិត្តទុកដាក់ដល់គុណភាព សេវានាវាទេសចរណ៍ ទន្លេ (Mekong river cruise) ជាទុនទាក់ទាញភ្ញៀវទេសចរឲ្យមកទស្សនាកម្សាន្ត ពិសេសត្រូវបញ្ឈប់ការបោះសំរាម ឬក្រដាសចោលក្រោមតុ ដោយជំនួសមកវិញនូវកន្សែងត្រជាក់ ឬក្រណាត់អនាម័យ ទើបជាការប្រសើរ ។
៣-រៀបចំប្រព័ន្ធការពារសុវត្ថិភាព សណ្ដាប់ធ្នាប់សាធារណៈ ការបញ្ចៀស និងកាត់បន្ថយបញ្ហាចរាចរណ៍ ត្រូវរៀបចំឲ្យមានការដឹកជញ្ជូនភ្ញៀវតាមផ្លូវទឹក និងផ្លូវវាងនៅត្រើយម្ខាង (សង្កាត់ព្រែកថ្មី ខណ្ឌច្បារអំពៅ) ។
៤-ត្រូវកៀងគរប្រជាពលរដ្ឋខ្មែរឲ្យចូលរួមតាំងពិព័រណ៍ និងដាក់លក់ផលិតផលក្នុងស្រុកដែលពួកគាត់សម្រេចបានដូចជា ដំណាំកសិកម្ម ឧស្សាហកម្ម និងផលិតផលកែច្នៃក្នុងស្រុកជាដើម ដើម្បីបង្ហាញពីសក្តានុពលផលិតផលក្នុងស្រុកទាំងនោះ សំដៅទាក់ទាញការបញ្ជាទិញពីក្រៅប្រទេស ។
៥-ត្រូវជំរុញការសម្ដែងសិល្បៈចម្រុះ សិល្បៈវប្បធម៌ ផ្ទាំងទស្សនីយភាពដែលបង្ហាញ ពីអត្តសញ្ញាណនៃទឹកដី ភូមិសាស្ត្រ និងសកម្ម ភាពកីឡានានាទាំងនៅលើគោក និងនៅលើទឹក ហើយត្រូវមានទូកកាណូតដឹកទេសចរចូលរួមផងដែរ។
៦-ត្រូវពង្រីកការផ្សព្វផ្សាយអំពីព្រឹត្តិការណ៍បុណ្យទន្លេនេះប្រាប់ទៅប្រជាពលរដ្ឋ ភ្ញៀវទេសចរ អាជីវករ ក្រុមហ៊ុន និងដៃគូនានា ដើម្បីជំរុញការចូលរួមក្នុងព្រឹត្តិការណ៍ទេសចរណ៍នេះឲ្យបានច្រើនកុះករ ពោលគឺសម្រេចឲ្យបានតាមការរំពឹងទុក១លាន៥សែននាក់ ។
លោក ថោង ខុន បានគូសបញ្ជាក់បន្ថែមថា ទន្លេមេគង្គជាទន្លេដែលវែងជាងគេលំដាប់ទី១៧ក្នុងពិភពលោក និងទី១២ក្នុងអាស៊ី ។ ទន្លេមេគង្គមានប្រវែង៤.២០០គីឡូម៉ែត្រ ហើយហូរឆ្លងកាត់ប្រទេសចិន មីយ៉ាន់ម៉ា ថៃ ឡាវ កម្ពុជា និងវៀតណាម ។ ដោយឡែក នៅកម្ពុជា ទន្លេមេគង្គហូរឆ្លងកាត់មានប្រវែងជាង៥០០គីឡូម៉ែត្រ និងបានបែកចេញជាទន្លេសាប និងទន្លេតូចជាច្រើនទៀត ទាំងនៅប៉ែកខាងលើ ប៉ែកខាងក្រោម ដែលមានប្រជាពលរដ្ឋរាប់លាននាក់រស់នៅតាមដងទន្លេ និងទទួលបានផលប្រយោជន៍ពីទន្លេនេះ ៕
ចែករំលែកព័តមាននេះ