ខេត្តកំពង់ឆ្នាំង ៖ បាតុភាពទំនាស់រវាងភាគីម្ខាងដែលមានប្រជាពលរដ្ឋច្រើនភូមិមានផ្ទៃដីស្រែប្រាំងជាង៤០ហិចតា ចង់រក្សាទុកទឹកក្នុងបឹងភ្នៀតធ្វើស្រែកុំឲ្យស្រូវស្កក ជាមួយភាគីម្ខាងទៀត ដែលមានដីស្រែតែ២ហិចតា ចង់បង្ហូរទឹកចេញពីបឹង ដើម្បីឲ្យគោកដល់ដីរបស់ខ្លួន ។ បាតុភាពដែលធ្វើឲ្យអាជ្ញាធរ និងមន្ត្រីជំនាញឈឺក្បាលនេះបានកើតឡើងនៅ ក្នុងឃុំកំពង់ហៅ ស្រុកកំពង់លែង ។
លោកសុខ រិន ប្រធានការិយាល័យកសិកម្មស្រុកកំពង់លែងបានឲ្យដឹងថា ប្រជាពលរដ្ឋជាច្រើនគ្រួសារ ដែលរស់នៅក្នុងឃុំកំពង់ហៅ និងឃុំត្រងិលបានប្រកបរបរធ្វើស្រែនៅចំណុចជុំវិញបឹងភ្នៀត មុខសាលាស្រុកកំពង់លែង ដែលមានផ្ទៃដីស្រៃប្រាំងជាង៤០ហិចតា ពួកគាត់ត្រូវការទឹកក្នុងបឹងសម្រាប់ បូមដាក់ស្រែរបស់ពួកគាត់ ម្លោះហើយពួកគាត់ត្រូវទប់ទំនប់នៅចំណុចលូកាត់ទទឹងអូរ ដែលជាផ្លូវទឹកហូរចេញពីបឹងភ្នៀត ចុះទៅបឹងគ្រួស និងបន្តហួសចូលទៅទន្លេ ។ ដោយឡែកមានប្រជាពលរដ្ឋ២គ្រួសារ ដែលមានដីជម្រៅក្នុងបឹងភ្នៀតនេះ ចង់បង្ហូរទឹកចេញពីបឹងឲ្យគោកដល់ដីស្រែគាត់ ដើម្បីបានធ្វើស្រែដែរ ទើបបណ្តាលឲ្យមានទំនាស់ ។
លោកបានបញ្ជាក់ដែរថា មិនមែនតែអ្នកធ្វើស្រែនៅជុំវិញបឹងភ្នៀតនោះទេ ដែលមានបញ្ហា អ្នកនៅជុំវិញបឹងគ្រួសជាប់បឹងភ្នៀតក៏មានបញ្ហានេះដែរ តែអ្នកដែលចង់បង្ហូរទឹកចេញពីបឹងឲ្យគោកដីគាត់ បានធ្វើស្រែ តែមួយភាគតូចប៉ុណ្ណោះ ។ លោកបន្តថា បញ្ហានេះផ្ទុះវិវាទស្ទើក្លាយជាអំពើហិង្សាកាលពីថ្ងៃទី១៧ និង១៨ ខែមករានេះ ក្រោយមកអាជ្ញាធរ និងសមត្ថកិច្ចបានសម្រេចទប់បិទមិនបង្ហូរទឹក នោះជាបណ្តោះអាសន្ន រង់ចាំការពិភាក្សាដោះស្រាយគ្នាជាថ្មី ។
យ៉ាងនេះក្តីដំណោះស្រាយនៅសាលាឃុំកំពង់ហាវ កាលពីរសៀលថ្ងៃ១៩ ខែមករានេះ មិនទទួលបានផលជាផ្លែផ្កាទេ ព្រោះនៅមិនទាន់ដាច់ស្រេចនៅឡើយ ហើយរឿងនេះបានបញ្ជូនទៅសាលាស្រុកកំពង់លែងហើយ ដើម្បីឲ្យអភិបាលស្រុកជួយដោះស្រាយ ។ លោកបានបញ្ជាក់ជាថ្មីថា ប្រសិនបើយើងមិនទប់ទឹកក្នុងបឹងរក្សាទុកទេ ប្រជាកសិករ ភាគច្រើនដូចបានរាប់ខាងលើ និងខ្វះទឹកបណ្តាលឲ្យស្រូវគាត់ស្កក ដូចរាល់ឆ្នាំជាពុំខាន ៕
ចែករំលែកព័តមាននេះ