រាជធានីភ្នំពេញ ៖ ម៉ូតូពីរគ្រឿងខ្វះការប្រុងប្រយ័ត្នបានជ្រុលទៅបុកពេញទំហឹងនៅចំណុចផ្លូវអក្សរតេ បណ្ដាលឲ្យបុរសម្នាក់ស្លាប់ពេលបញ្ជូនទៅដល់គ្លីនិកឯកជនមួយ ចំណែកម្នាក់ទៀតរងរបួសធ្ងន់ ហេតុការណ៍នេះបានកើតឡើងនៅវេលាម៉ោង០៩និង៣០នាទីយប់ ថ្ងៃទី១៨ ខែមករា ឆ្នាំ២០១៨ ទល់មុខនឹងរោងចក្រអគ្គិសនី…
រាជធានីភ្នំពេញ ៖ ម៉ូតូពីរគ្រឿងខ្វះការប្រុងប្រយ័ត្នបានជ្រុលទៅបុកពេញទំហឹងនៅចំណុចផ្លូវអក្សរតេ បណ្ដាលឲ្យបុរសម្នាក់ស្លាប់ពេលបញ្ជូនទៅដល់គ្លីនិកឯកជនមួយ ចំណែកម្នាក់ទៀតរងរបួសធ្ងន់ ហេតុការណ៍នេះបានកើតឡើងនៅវេលាម៉ោង០៩និង៣០នាទីយប់ ថ្ងៃទី១៨ ខែមករា ឆ្នាំ២០១៨ ទល់មុខនឹងរោងចក្រអគ្គិសនី ផ្លូវបេតុងដីថ្មី កែងនិងផ្លូវបេតុងអត់លេខ ភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ ។
ជនរងគ្រោះដែលរងរបួសធ្ងន់មានឈ្មោះ ទួន ម៉ៅ ភេទប្រុស អាយុ២២ឆ្នាំ មុខរបរកម្មកររោងចក្រ ស្នាក់នៅផ្ទះជួលភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើតនៅភូមិទួលខ្ពស់ ឃុំឈើកាច់ ស្រុកបាភ្នំ ខេត្តព្រៃវែង ជិះម៉ូតូម៉ាកស៊ុយសុគីឡែត ពណ៌ស លាយផ្កាឈូក ពាក់ស្លាកលេខ ភ្នំពេញ ១CT-៥៧២៣ ។ ចំណែកសពជនរងគ្រោះ គឺមិនទាន់ស្គាល់អត្តសញ្ញាណនោះទេ គ្រាន់តែដឹងថាជិះម៉ូតូម៉ាកហុងដាឌ្រីម ស៊េរីឆ្នាំ២០១៣ ពាក់ស្លាកលេខ ភ្នំពេញ ១BU-៧៩២៤ ។
តាមប្រភពព័ត៌មានពីកន្លែងកើតបានឲ្យដឹងថា មុនពេលកើតហេតុ គេបានឃើញបុរសមិនស្គាល់អត្តសញ្ញាណ បានជិះម៉ូតូម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ បានធ្វើដំណើរតាមបេតុងដីថ្មី ក្នុងទិសដៅពីជើងទៅត្បូង ខណៈមកដល់ចំណុចកើតហេតុ បានបត់ឆ្វេងឡើងទៅផ្លូវរោងចក្រអគ្គិសនី ស្រាប់តែពេលនោះ មានបុរសម្នាក់ទៀតមិនដឹងថាគោលបំណងទៅណានោះទេ គឺបានជិះម៉ូតូម៉ាកស៊ុយសុគីឡែត ពណ៌ស បានធ្វើដំណើរតាមផ្លូវបេតុងរោងចក្រអគ្គិសនី ទិសដៅពីកើតទៅលិច ក្នុងល្បឿនលឿនដូចហោះ បានជ្រុលទៅបុកនឹងម៉ូតូហុងដាឌ្រីមពេញទំហឹង បណ្ដាលខាងម៉ូតូស៊ុយសុគីឡែត រងរបួសបែកក្បាលសន្លប់ស្តូកស្តឹង ត្រូវបានបានរថយន្តសង្គ្រោះបានមកដឹកយកទៅសង្គ្រោះនៅគ្លិនិកឯកជន ចំណែកម៉ូតូរងការខូចខាតខ្ទេចខ្ទីផ្នែកខាងមុខ ។ ដោយឡែកខាងម៉ូតូហុងដាឌ្រីម របួសបែកមុខបែកមាត់ និងបាក់ថ្គាម ហើយភ្លាមៗនោះដែរ ជនរងគ្រោះត្រូវបានរថយន្តបានមកដឹកយកទៅសង្គ្រោះនៅគ្លិនិកឯកជនមួយ ពេលទៅដល់គ្លិនិកជនរងគ្រោះបានដាច់ខ្យល់ស្លាប់ទៅ ។
អ្វីដែលគួរឲ្យហួសចិត្ត គឺខាងបងប្អូនសាច់ញាតិ និងម្តាយរបស់ជនរងគ្រោះដែលរងរបួសធ្ងន់ មកពីផ្ទះវិញគ្រាន់តែដឹងថា កូនគ្រោះថ្នាក់ចរាចរណ៍ស្លាប់បានយំសោកសៅស្តាយកូនរបស់ខ្លួន ស្មានតែកូនខ្លួនឯងស្លាប់ហើយមិនបានមើលមុខទេ គឺតែពីយំរៀបរាប់ពីកូន រហូតដល់សមត្ថកិច្ចធ្វើកំណើតហេតុ ដើម្បីប្រគល់សពយកទៅធ្វើបុណ្យតាមប្រពៃណី និងបម្រុងដឹកសពយកទៅធ្វើបុណ្យនៅឯខេត្តព្រៃវែងហើយ ទើបមើលចុះមើលឡើងដឹងថា សពជនរងគ្រោះមិនជាកូនរបស់ខ្លួន ហើយតាមពិតកូនរបស់គាត់នៅរស់សោះ ហើយកំពុងតែសង្គ្រោះនៅគ្លិនិកឯកជន ក៏នាំគ្នាត្រលប់ទៅមើលកូនខ្លួនឯងវិញអស់ទៅ ។
ចំណែកសពជនរងគ្រោះមិនទាន់ស្គាល់អត្តសញ្ញាណ ត្រូវសមត្ថកិច្ចធ្វើកំណត់ហេតុ រួចហើយបានរថយន្តដឹកសពយកទៅទៅតម្កល់ទុកនៅវត្តទឹកថ្លា ខណ្ឌសែនសុខ ដើម្បីស្វែងរកសាច់ញាតិបងប្អូនមកយកទៅធ្វើបុណ្យ ។ ដោយឡែកម៉ូតូទាំងពីរគ្រឿង ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ