ខេត្តព្រៃវែង ៖ តាមសេចក្ដីរាយការណ៍ពីភ្នាក់ងារសារព័ត៌មានកោះសន្ដិភាពប្រចាំនៅខេត្តព្រៃវែង បានឲ្យដឹងថា ខណៈនេះឈ្មួញកំពុងសម្រុកនាំចូលកូនជ្រូករាប់រយក្បាលក្នុង១ថ្ងៃៗមកលក់ឲ្យថៅកែធំៗដល់ទីតាំងសម្រាប់ចែកចាយលក់បន្ដ ឬដឹកមកភ្នំពេញ ដើម្បីធ្វើជាកូនជ្រូកខ្វៃ សម្រាប់ពិធីអាពាហ៍ពិពាហ៍ផ្សេងៗ ស្របពេលរដូវចូលឆ្នាំចិន ក៏ជិតមកដល់ផងនោះ ។
បើតាមឈ្មួញកណ្ដាលដែលរកស៊ីដើរទិញកូនជ្រូកពីតាមផ្ទះប្រជាពលរដ្ឋ យកមកលក់ឲ្យថៅកែធំនៅផ្សារច្រេស ក្នុងឃុំច្រេស ស្រុកមេសាង បាននិយាយថា កូនជ្រូកខ្មែរបច្ចុប្បន្ន ធ្លាក់ថ្លៃហៅលែងឮហើយ ព្រោះកូនជ្រូកវៀតណាមកំពុងវាយលុកខ្លាំង ដោយក្នុង១ថ្ងៃៗ ឈ្មួញបានដឹកមកលក់ឲ្យថៅកែធំៗប្រចាំនៅផ្សារច្រេសនេះ ។
ឈ្មួញដដែលបានត្អូញត្អែរថា ៖« រឿងតម្លៃកូនជ្រូកធ្លាក់ចុះថោកខ្លាំង រហូតធ្វើឲ្យពួកគាត់ប្រមាណជា៨០%បោះបង់មុខរបរនេះចោល ដោយសារតែមានការនាំចូលកូនជ្រូកមកពីប្រទេសវៀតណាមច្រើនពេក ក្នុង១ថ្ងៃៗប្រមាណជា៤ទៅ៥រយក្បាលចូលតាមច្រករបៀងចេកមាស ស្ថិតនៅក្នុងឃុំដូង ស្រុករមាសហែក ខេត្តស្វាយរៀង ដោយគេបានដឹកជញ្ជូនតាមរ៉ឺម៉កម៉ូតូ យកមកលក់ឲ្យដល់ផ្ទះថៅកែធំៗនៅផ្សារច្រេសតែម្តង ។ ចំណែកឯថៅកែធំៗ៥ទៅ៦នាក់ដែលប្រមូលទិញកូនជ្រូកនៅផ្សារច្រេសនេះ ដោយសារតែមានកូនជ្រូកវៀតណាមចូលមកច្រើន ក៏ទិញទម្លាក់តម្លៃកូនជ្រូកក្នុងស្រុកយ៉ាងគំហុកតែម្ដង ជាហេតុធ្វើឲ្យប៉ះពាល់ដល់ពួកគាត់ផង និងប្រជាពលរដ្ឋអ្នកចិញ្ចឹមផ្ទាល់ផង »។
លោក យ៉ន ឃឿន ជាឈ្មួញកណ្តាលម្នាក់ក្នុងចំណោមឈ្មួញផ្សេងៗទៀតបានប្រាប់កោះសន្តិភាពថា ពួកគាត់ភាគច្រើនមិនត្រឹមតែជាឈ្មួញកណ្តាលដើរប្រមូលទិញកូនជ្រូកតាមផ្ទះប្រជាពលរដ្ឋនោះទេ ប៉ុន្តែពួកគាត់ក៏ជាអ្នកចិញ្ចឹមមេជ្រូកយកកូនលក់ដែរ អ្នកខ្លះមេ៤ក្បាល អ្នកខ្លះ៥ក្បាល ប៉ុន្តែពេលនេះ ម្នាក់ៗនៅតែសល់តែមេ១ឬ២ក្បាលទេ ហើយអ្នកខ្លះទៀតគឺឈប់ចិញ្ចឹមតែម្តង ព្រោះកូនជ្រូកថោកពេក ។
លោកបានបញ្ជាក់ថា ៖« កាលពីឆ្នាំមុន កូនជ្រូកខ្មែរដែលធំល្អ អាយុពី១ខែ៥ថ្ងៃ ទៅ១ខែ១០ថ្ងៃ លក់បានពី១៣ម៉ឺនទៅ១៥ម៉ឺនរៀលក្នុង១ក្បាល ចំណែកកូនជ្រូកធម្មតាមិនសូវល្អលក់បានយ៉ាងទាប ក៏៦ម៉ឺនទៅ៧ម៉ឺនរៀលដែរ តែបន្ទាប់ពីកូនជ្រូកវៀតណាមវាយប្រហារទីផ្សារមក កូនជ្រូកខ្មែរដែលល្អនោះ តម្លៃយ៉ាងច្រើនជាង៥ម៉ឺនរៀលប៉ុណ្ណោះ ហើយបើអន់វិញ បានតែ២ទៅ៣ម៉ឺនរៀលទេ » ។
លោកបន្ដថា ចំណែកថៅកែធំៗដែលប្រមូលទិញទាំងនោះវិញ បានលក់បន្ដឲ្យអ្នកចិញ្ចឹមនៅតាមផ្ទះ ក្នុងតម្លៃពី១៥ម៉ឺនឬ១៦ម៉ឺនរៀលក្នុង១ក្បាល ឬដឹកបន្ដមកផ្គត់ផ្គង់នៅភ្នំពេញ ដើម្បីខ្វៃសម្រាប់ពិធីមង្គលការ និងកម្មវិធីផ្សេងៗ ។
ដោយសារតែទីផ្សារមួយនេះកំពុងប៉ះពាល់ខ្លាំងដល់អ្នកចិញ្ចឹមមេជ្រូកយកកូន រួមទាំងឈ្មួញកណ្តាលផងនោះ ពួកគាត់បានសំណូមពរសុំឲ្យសមត្ថកិច្ចគ្រប់ជាន់ថ្នាក់ មន្ទីរកសិកម្មខេត្តព្រៃវែង ពិសេសលោក ជា សុមេធី អភិបាលខេត្ត មេត្តាជួយគិតគូរដោះស្រាយផង ហើយអ្វីដែលពួកគាត់ចង់បានបំផុតនាពេលនេះ គឺសូមជួយទប់ស្កាត់កុំឲ្យកូនជ្រូកវៀតណាមហូរចូលមកដោយស្រួលពេក ព្រោះវាធ្វើឲ្យប៉ះពាល់ដល់ពួកគាត់ខ្លាំងណាស់។
ពាក់ព័ន្ធបញ្ហានេះ លោក អ៊ុក សំណាង ប្រធានមន្ទីរកសិកម្មខេត្ត បានឲ្យដឹងថា រឿងនេះលោកមិនបានដឹងទេ ។ ទោះបីយ៉ាងណាក៏ដោយ លោកសន្យាថា នឹងឲ្យមន្ត្រីជំនាញចុះស្រាវជ្រាវមើល ហើយបើមានរឿងបែបនេះមែន លោកនិងចាត់វិធានការទប់ស្កាត់ភ្លាម។
បញ្ហាលំហូរទំនិញពីប្រទេសជិតខាងនេះ មិនមែនជារឿងថ្មីទេសម្រាប់កម្ពុជា ដែលធ្វើឲ្យពលរដ្ឋខ្មែរជាអ្នកផ្គត់ផ្គង់ដែរនោះ បាត់ភាពប្រកួតប្រជែង និងបាក់ទឹកចិត្តលែងចង់ផលិត ពិសេសនៅពេលផលិតបានហើយ គ្មានទីផ្សារ និងតម្លៃថោកជាដើម ខណៈថ្លៃដើមផលិតខ្ពស់។ ទោះបីយ៉ាងណា មួយរយៈចុងក្រោយនេះ រាជរដ្ឋាភិបាលបានផ្ដោតការចាប់អារម្មណ៍ខ្ពស់ទៅលើផលិតផលក្នុងស្រុក និងលើកទឹកចិត្តដល់ផលិតករខ្មែរបង្កើនការវិនិយោគ និងផលិតឲ្យបានគ្រប់គ្រាន់តាមតម្រូវការក្នុងស្រុក ដើម្បីកាត់បន្ថយការនាំចូលពីប្រទេសជិតខាង ៕
ចែករំលែកព័តមាននេះ