រាជធានីភ្មំពេញ ៖តារាកំប្លែងលោកជួង ជី ហៅនាយកុយ បានទទួលស្គាល់ពីការធ្លាក់ចុះនូវសិល្បៈកំប្លែងតាមបណ្តាស្ថានីយទូរទស្សន៍ក្នុងរយៈកាលចុងក្រោយនេះ ខណៈពេលដែលកម្មវិធីចម្រៀងបែបយុវវ័យកើនឡើងខ្លាំង ។ ការស្តែងឲ្យឃើញពីការធ្លាក់ចុះក្នុងវិស័យកំប្លែងតាមបណ្តាស្ថានីយទូរទស្សន៍របស់នាយកុយ គឺដោយសារបច្ចុប្បន្នមានស្ថានីយទូរទស្សន៍ជាច្រើនបានសម្រេចបិទកម្មវិធីរបស់ខ្លួនដែលនៅក្នុងនោះក៏មានកាភ្ជាប់នូវទស្សនីយភាពកំប្លែងផងដែរ ។
លោកជួង ជី ហៅកុយ បានហៅការបិទនូវសិល្បៈកំប្លែងនាពេលនេះ គឺជាសញ្ញាអវិជ្ជមានមួយដែលអាចនាំឲ្យសិល្បៈមួយនេះប្រឈមនូវការបាត់បង់ប្រជាប្រិយភាព ក្នុងពេលដែលកំប្លែងនៅតែមានការគាំទ្រច្រើនពីទស្សនិកជននាពេលបច្ចុប្បន្ន ។ នាយកុយ បានអះអាងប្រាប់កោះសន្តិភាពកាលពីពេល ថ្មីៗកន្លងមកថា បច្ចុប្បន្នស្ទើរតែគ្រប់ស្ថានីយទូរទស្សន៍នៅក្នុងស្រុកទាំងអស់បានលុបចោលនូវកម្មវិធីកំប្លែងចោលទាំងស្រុង ដោយជំនួសមកវិញនូវកម្មវិធីចម្រៀងតាមបែបយុវវ័យ ។
មិនមានតែសិល្បៈកំប្លែងមួយទេដែលស្ទើរតែគ្មានកម្មវិធីសម្តែង ប៉ុន្តែសិល្បៈបុរាណជាច្រើនទៀត ក៏មិនសូវមានការសម្តែងដូចគ្នា ។ លោកមិនយល់ច្បាស់ទេថាបណ្តាស្ថានីយទូរទស្សន៍ទាំងអស់នោះមិនចាប់អារម្មណ៍ និងបិទកម្មវិធីសម្តែងកំប្លែងនេះចោល ក្នុងពេលដែលសិល្បៈមួយនេះនៅតែទទួលការពេញនិយមពីទស្សនិកជននៅឡើយ។ បើតាមនាយកុយ សម្រាប់ខ្លួនលោកម្នាក់ បើទោះបីជាមិនមានការសម្តែងកំប្លែងតាមបណ្តាស្ថានីយទូរទស្សន៍ក៏ដោយ ប៉ុន្តែលោកនៅអាចរស់ចិញ្ចឹមជីវិតបានដដែល ដោយសារលោកមានមុខរបរមួយចំនួនទៀតក្រៅពីអាជីពមួយនេះ។ ប៉ុន្តែអ្វីដែលលោកចង់និយាយនេះមិនមានន័យថា គ្រប់ស្ថានីយទូរទស្សន៍ទាំងអស់ ត្រូវតែមានកំប្លែងនោះទេ តែលោកគ្រាន់តែចង់ស្នើសុំឲ្យកម្មវិធីកម្សាន្តណាមួយគួរដាក់បញ្ចូលនូវសិល្បៈកំប្លែង និងសិល្បៈបុរាណ ខ្លះៗនោះជាការល្អ ។
លោកជួង ជី និយាយថា បើក្រឡេកមើលប្រទេសគេ គឺគេតែងតែដាក់បញ្ចូលនូវកម្មវិធីកំប្លែងមិនចោលឡើយ ហើយទាំងសម័យ និងបុរាណគឺដើរទន្ទឹមគ្នា មិនមែនលើកស្ទួយតែសម័យតែមួយមុខ ហើយគ្នាអ្នកសម្តែងបុរាណគ្មានការងារធ្វើនោះឡើយ ។ ការធ្លាក់ចុះនូវការលេងកំប្លែងនោះ គឺមិនមែនមានតែក្រុមលោកមួយឡើយ ពោលសូម្បីក្រុមកំប្លែងមួយចំនួនទៀត ក៏ស្ទើរតែគ្មានឱកាសសម្តែងដូចគ្នា ។
យ៉ាងណាក៏ដោយក្នុងនាមលោកដែលជាអ្នកសម្តែងកំប្លែងអស់ជាច្រើនឆ្នាំមកនេះ លោកមិនចង់ឲ្យអាជីព និងសិល្បៈមួយនេះត្រូវគេបិទចោលនោះឡើយ ពោលលោកនៅតែទទូចស្នើឲ្យមានការដាក់កំប្លែងនេះរហូតទៅ បើទោះបីជាផ្នែកចម្រៀងសម័យមានការនិយមគាំទ្រច្រើនពីទស្សនិកជន ហើយទទួលបានការឧបត្ថម្ភគាំទ្រពីបណ្តាក្រុមហ៊ុន ផ្សេងៗក៏ដោយ ។
លោកយល់ថា ការសម្តែងកំប្លែងក្រុមរបស់លោកគឺម្តងត្រូវចំណាយតែ៣០០ដុល្លារ ហើយយកមកចែកគ្នាបានម្នាក់២០ដុល្លារប៉ុណ្ណោះ ប៉ុន្តែអ្វីដែលសំខាន់គឺលោកចង់បន្តវត្តមានសម្តែងកំប្លែងនេះឲ្យក្មេងជំនាន់ក្រោយបានទស្សនាបន្តទៀត ជាពិសេសក៏ដូចជាការជួយដល់តារាកំប្លែង ចាស់ៗមួយចំនួនដែលក្រលំបាកផងដែរ ។
ដោយឡែកតារាកំប្លែងថ្មី ជាកូនប្រុសរបស់តារាកំប្លែងស្ងួតនាយខ្ជឹប គឺនាយខ្ចៅ បានបង្ហោះសារស្តែងពីការធ្លាក់ចុះការសម្តែងរបស់ខ្លួនដែរថា «អាធ្រាត្រយប់ស្ងាត់ ខ្យល់ផាត់រំភើយ ឱខ្លួនខ្ញុំអើយ ខំចេញពីស្រុក ប្រឡូកសិល្បៈគិតថាស្រណុក បងប្អូនចាំទុក បានតែម៉ារស់ ។ ខំប្រឹងសាបព្រោះ ចង់បានគេឈ្មោះ ជូនភូមិអ្នកស្រុក តែបច្ចុប្បន្ននេះ សិល្បៈធ្លាក់ស្រុត ចូលចិត្តមូយគត់ នៃការរាំច្រៀង ។ មិនអន់ចិត្តខ្លួនឯងនឹងវាសនា តែចេញពីរអារម្មណ៍ពិត »។
ក្នុងរយៈកាលចុងក្រោយនេះកម្មវិធីកំប្លែងតាមឆាកតន្ត្រីរបស់ស្ថានីយទូរទស្សន៍មួយចំនួនបានធ្លាក់ចុះជាបន្តបន្ទាប់ ក្រោយពីកម្មវិធីតន្ត្រីនានា ដែលមានការសម្តែងកំប្លែងនៅម៉ោងចុងក្រោយនោះបានបិទកម្មវិធីចោលទាំងស្រុង ។ ការសម្តែងកំប្លែងដែលត្រូវបានបិទ នោះមានដូចជា ប្រជុំតារាតន្ត្រីរបស់ស្ថានីយទូរទស្សន៍បាយ័នដែលមានក្រុមនាយកុយជាអ្នកសម្តែង ។
កម្មវិធី«មន្តស្នេហ៍សំនៀង»របស់ទូរទស្សន៍ CTN ។ កម្មវិធីតន្ត្រីលើទឹករបស់ស្ថានីយទូរទស្សន៍ហង្សមាសដែលមានក្រុមនាយខ្ជឹបជាអ្នកសម្តែង ។ កម្មវិធី តន្ត្រីថ្ងៃអាទិត្យរបស់ស្ថានីយទូរទស្សន៍ហង្សមាស ដែលមានក្រុមកំប្លែងនាយក្រិន នាយហុងដា និងអ្នកនាងប្រិមប្រិយ ជាអ្នកសម្តែង ។ កម្មវិធីកម្មវិធីតន្ត្រីថ្ងៃសៅរ៍របស់ស្ថានីយទូរទស្សន៍អាស៊ីអាគ្នេយ៍ ដែលមានក្រុមនាយស្វិត និងនាយ តឹង ជាអ្នកសម្តែង ។ នៅមានកម្មវិធីមួយចំនួនទៀត ។
បើតាមប្រភពក្រៅផ្លួវការពីបណ្តាស្ថានីយទូរទស្សន៍មួយចំនួនបានបង្ហើបឲ្យដឹងថា មូលហេតុដែលនាំឲ្យបិទនូវកម្មវិធីទាំងនោះចោល គឺដោយសារមិនមានអ្នកឧបត្ថម្ភ មិនបន្តកុងត្រាថ្មី ហើយខ្លះគឺតម្រូវតាមការចង់បានពីម្ចាស់ឧបត្ថម្ភប៉ុណ្ណោះ ។ យ៉ាងណាក៏ដោយ មានស្ថានីយទូរទស្សន៍មួយចំនួននៅតែអះអាងថា កម្មវិធីកំប្លែងគឺនៅតែមានដដែល ដោយនៅក្នុងនោះអ្នកដឹកនាំអាចនឹងយកទៅដាក់នៅក្នុងកម្មវិធីណាមួយផ្សេង ឬក៏អាចផ្លាស់ប្តូរការសម្តែងទៅជាទម្រង់បែបផ្សេងអាស្រ័យទៅលើការរៀបចំ និងការចង់បានពីម្ចាស់ឧបត្ថម្ភកម្មវិធី ៕
ចែករំលែកព័តមាននេះ