ប្រទេសអ៊ីតាលី ៖ ស្ត្រីជនជាតិអ៊ីតាលីមិនត្រូវបានបង្ហាញអត្តសញ្ញាណម្នាក់ បានធ្វេសប្រហែសចោលចុងសន្លឹកឆ្នោតឈ្នះរង្វាន់ទឹកប្រាក់ ១លានអឺរ៉ូ ឬប្រហែល ១,១៥ លានដុល្លារអាមេរិក ចូលទៅក្នុងធុងសំរាម ប៉ុន្តែជាមហាសំណាងបំផុត ចុងឆ្នោត១សន្លឹកនោះ ត្រូវបានក្រុមកម្មករប្រមូលសំរាមជួយរកឃើញត្រឡប់មកវិញ បន្ទាប់ពីចាយពេលកាយរុករកក្នុងគំនរសំរាមស្ទើរពេញ១ថ្ងៃ។ នេះបើតាមប្រភពពី South China Morning Post និង BBC បានចេញផ្សាយកាលពីពេលថ្មីៗនេះ។
យោងតាមលោក Roberto Nicola Toscano នាយកក្រុមហ៊ុនគ្រប់គ្រងកាកសំណល់សាធារណៈ SANB នៅក្នុងតំបន់ Apuglia ភាគខាងត្បូងប្រទេសអ៊ីតាលី បានឱ្យដឹងថា សន្លឹកឆ្នោតផ្សងសំណាងឈ្នះភ្លាមៗនោះពិតជាអស្ចារ្យណាស់ ដែលវានៅតែរក្សាបានទាំងស្រុងមិនខូចទ្រង់ទ្រាយ បន្ទាប់ពីក្រុមកម្មករប្រមូលសំរាមបានកាយកចេញពីគំនរសំរាមដ៏ច្រើននៅក្នុងឡានដឹកសំរាមពួកគេ។
លោក Toscano បានពន្យល់ដើមទងដូច្នេះថា នៅពេលអ្នកឈ្នះរង្វាន់បានទៅពិនិត្យសន្លឹកឆ្នោតនៅហាងមួយស្ថិតនៅទីប្រជុំជន Bitonto នៃតំបន់ Apuglia បន្ទាប់ពីការចាប់ឆ្នោតរួច ម៉ាស៊ីនបង្ហាញថាមិនអាចបើកប្រាក់រង្វាន់បានទេ នោះគឺដោយសារអ្នកលក់រាយតូចៗអាចបើកជូនបានតែប្រាក់រង្វាន់តូចៗប៉ុណ្ណោះ។ ប៉ុន្តែស្ត្រីរូបនោះ មិនបានដឹងថា ខ្លួនបានឈ្នះរង្វាន់ធំ (Jackpot) នោះឡើយ ដ្បិតអ្នកឈ្នះរូបនេះតែងតែទិញលេខដដែលៗ ព្រោះជាលេខដែលទាក់ទងនឹងមនុស្សជាទីស្រឡាញ់របស់ខ្លួន។
លុះនៅពេលគាត់ត្រឡប់ទៅដល់ផ្ទះវិញ សមាជិកគ្រួសារម្នាក់បានប្រាប់ថា លេខដែលគាត់តែងតែទិញជាប្រចាំនោះគឺ ២, ៤, ៨, ១០ និង ៥១ បានឈ្នះរង្វាន់។ ពួកគេក៏បានរត់ត្រឡប់ទៅហាងវិញភ្លាមៗ ប៉ុន្តែបានត្រឹមខកចិត្ត ព្រោះសន្លឹកឆ្នោតនោះត្រូវបានអ្នកលក់បោះចោល ហើយឡានដឹកសំរាមបានមកប្រមូលយកទៅបាត់ថែមទៀត។
ម្ចាស់សន្លឹកឆ្នោតបានទាក់ទងទៅលោក Toscano ហើយលោកបាននិយាយថា ភ្លាមៗក្រុមការងារបានតាមដានដំណើរឡើងវិញនៃសន្លឹកឆ្នោតនោះ ដោយគ្មានសង្ឃឹមច្រើនថានឹងរកឃើញវិញនោះទេ ព្រោះត្រូវឡានដឹកសំរាមប្រមូលយកទៅបាត់ហើយ។ ទោះជាយ៉ាងណាក៏ដោយ ជាមហាសំណាងបំផុត ក្រុមការងាររកឃើញឡានដឹកសំរាមនោះ ហើយបានឃាត់ទុក។ លោក Toscano បានបន្តថា ដោយសារហានិភ័យនៃការខូចខាតបង្កឡើងដោយសារធាតុជាច្រើនក្នុងកាកសំណល់សំរាម ក្រុមហ៊ុនបានយកឡាននោះទៅកាន់ក្រុមហ៊ុនមានឧបករណ៍គ្រប់គ្រាន់ដើម្បីស្វែងរក ដោយក្រុមកម្មករប្រមូលសំរាមបានចំណាយពេលស្ទើរពេញ១ថ្ងៃ ហើយនៅទីបំផុតបានរកឃើញសន្លឹកឆ្នោតនោះ ព្រមទាំងចុងសន្លឹកឆ្នោតជាច្រើនផ្សេទៀត។
អ្វីដែលកាន់តែភ្ញាក់បំផុតនោះ លោក Toscano បានបញ្ជាក់ថា ក្នុងចំណោមចុងសន្លឹកឆ្នោតទាំងនោះ ចុងសន្លឹកឆ្នោតដែលកំពុងតែស្វែងរកនៅតែមានសណ្ឋានល្អពេញលេញទាំងស្រុងយ៉ាងអស្ចារ្យ។ លោកបានបន្ថែមចុងក្រោយថា នៅពេលលោកទាក់ទងទៅអ្នកឈ្នះ គាត់បានយំដោយក្តីរំភើប និងនឹកស្មានមិនដល់បំផុត៕
ចែករំលែកព័តមាននេះ