រាជធានីភ្នំពេញ ៖ ម៉ូតូម៉ាកស៊ីទីសេ១០០ កូរ៉េ១គ្រឿងដឹកប្រេងសាំងជាច្រើនប៊ីដុង និងបើកបរក្នុងល្បឿនលឿនផង ខណៈពេលកំពុងបើកសុខៗស្រាប់តែភ្លាត់ស្នៀត បណ្ដាលឲ្យដួលជាប់ហ្គ្រ៊ែររោទិ៍ម៉ាស៊ីនខ្លាំង ហើយបានឆ្លងចរន្តបែកផ្កាភ្លើង ។ ហេតុការណ៍ខាងលើនេះបានកើតឡើងកាលវេលាម៉ោង៥និង៣០នាទីព្រឹកថ្ងៃទី១០ ខែមករា ឆ្នាំ២០១៨ នៅលើកំណាត់មហាវិថីសហព័ន្ធរុស្ស៊ី ត្រង់ចំណុចមុខវត្តទួលសុភាឃួន ខាងលិចអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ។
នគរបាលបានឲ្យដឹងថា ម៉ូតូដែលឆេះនោះ ម៉ាកស៊ីទីសេ១០០កូរ៉េ ពណ៌ខ្មៅ អត់ស្លាកលេខ ដឹកប្រេងសាំងជាច្រើនប៊ីដុង បើកដោយយុវជនម្នាក់ឈ្មោះចុន ចំរើន អាយុ១៩ឆ្នាំ មុខរបរកម្មករស្ថានីយ៍ប្រេងឥន្ធនៈមួយ និងស្នាក់នៅក្នុងបុរីសន្តិភាព២ ភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ រងរបួសស្រាល ។
ប្រភពដដែលបានបន្តទៀតថា នៅមុនពេលកើតហេតុយុជននោះបានបើកបរម៉ូតូខាងលើដឹកប្រេងសាំងជាច្រើនប៊ីដុង ធ្វើដំណើរក្នុងទិសដៅពីត្បូងទៅជើងយ៉ាងលឿន ចេញពីស្ថានីយ៍ប្រេងឥន្ធនៈមួយកន្លែង ។ លុះពេលទៅដល់ត្រង់ចំណុចកើតហេតុខាងលើបានភ្លាត់ស្នៀត បណ្ដាលឲ្យដួលធ្វើឲ្យម៉ូតូនេះជាប់ហ្គ្រ៊ែររោទិ៍ម៉ាស៊ីនយ៉ាងខ្លាំងរហូតឆ្លងចរន្ត បែកផ្កាភ្លើងបង្កជាអណ្ដាតភ្លើងឆាបឆេះឡើងតែម្តង ។
ប្រភពខាងលើបានបន្តទៀតថា ខណៈនោះបានបង្កឲ្យមានការភ្ញាក់ផ្អើល ហើយប្រជាពលរដ្ឋបាននាំគ្នាចូលទៅជួយទើបមិនបានបណ្ដាលឲ្យឆេះប៊ីដុងសាំងទាំងនោះឡើយ ។ បន្ទាប់មកបានយកទឹកទៅជះពន្លត់ រហូតភ្លើងរលត់ទៅវិញ ប៉ុន្តែម៉ូតូត្រូវបានភ្លើងឆេះខ្ទេចទាំងស្រុង នៅសល់តែគ្រោងឆ្អឹង និងក្លាយទៅជាដែកអេតចាយ ។
ចំណែកប៊ីដុងប្រេងសាំងត្រូវបានកម្មករស្ថានីយ៍ប្រេងឥន្ធនៈនោះ យកម៉ូតូសណ្ដោងរ៉ឺម៉កផ្សេងទៀត ដឹកបន្តយកទៅដាក់ឲ្យម៉ូយ ៕
ចែករំលែកព័តមាននេះ