រាជធានីភ្នំពេញ ៖ កាលពីព្រឹកថ្ងៃទី៨ មករា ឆ្នាំ២០១៨ ផលិតកម្មចក្កវាឡពេជ្របានរៀបចំពិធីក្រុងពលីថតរឿងថ្មីរបស់ខ្លួនដោយមានតារា ល្បីៗជាច្រើនចូលរួម ។ គួរឲ្យចាប់អារម្មណ៍ក្នុងពិធីនោះ គឺតួអង្គថ្មីមួយដួងក្នុងផ្ទៃរឿងត្រូវគេទម្លាយប្រាប់ថាជាគ្រាប់ពូជសិល្បៈថ្មីរបស់លោកមុត ថារី ជាអ្នកដឹកនាំរឿង ។
រឿងភាគថ្មីមានចំណងជើងថា«ដួងចន្ទដួងចិត្ត» សម្តែងដោយតារា ល្បីៗ ដូចជាពៅ លីដា លោកអែតវីន កញ្ញាលឹម មួយហ្គិច ហៅស្រីកែវ និងលោកមុត ដារីរិទ្ធីយ៉ា ជាកូនប្រុសលោកមុត ថារី ។ រឿង«ដួងចន្ទដួងចិត្ត» សហការផលិតជាមួយស្ថានីយទូរទស្សន៍ភីអិនអិន ដោយនិពន្ឋ និងដឹកនាំរឿងដោយលោកមុត ថារី ជំនួយការដឹកនាំរឿងដោយលោកឧត្តម តារាឌួង ។
លោកមុត ដារីរិទ្ធីយ៉ា កូនប្រុសបង្កើតរបស់លោកមុត ថារី ឱ្យដឹងថា «មុននឹងលោកប៉ាសម្រេចយករូបខ្ញុំមកថតរឿង«ដួងចន្ទដួងចិត្ត» នេះគឺក្រោយពេលប៉ាគាត់ឃើញខ្ញុំទៅធ្វើតេស្តជាប់ក្នុងផលិតកម្មផ្សេងចេះសម្តែងបាន ទើបលោកប៉ាគាត់សម្រេចជ្រើសរើសជាតួក្នុងផ្ទៃរឿងភាគនេះ ។ មិនមែនចេះតែបានសម្តែងទេគឺត្រូវហ្វឹកហាត់ច្រើន លុតដំច្រើន ប៉ារបស់ខ្ញុំមានសិទ្ធិសម្រេចយកតួណាមែន តែត្រូវចេះមានសមត្ថភាព ។ អ៊ីចឹងហើយទើបជាកូនទម្រាំបានត្រឹមតួរងត្រូវឆ្លងកាត់ផលិតកម្មផ្សេងសិនឱ្យគាត់ឃើញ មហាជនថាល្អទើបសាច់ឈាមឯងអាចយកបាន នេះជាការណ៍ពិត » ។
លោកមុត ថារី អះអាងថា លោកមិនអាចផលិតបានច្រើនជាង២រឿង សម្រាប់រឿងភាគទេ បើទោះជាផលិតករខ្លះបានអះអាងពីការផលិតបានច្រើនរឿងនៅក្នុង មួយឆ្នាំៗយ៉ាងណាក៏ដោយ ។ ឆ្លងតាមបទពិសោធន៍ក្នុងរឿង «ក្រមុំឆ្នាសប៉ះមេស្រុកឆ្នើម» គឺលោកអត់សល់ពេលវេលាសម្រាប់ផ្ទាល់ខ្លួនទេ ដោយសូម្បីតែការងារនៅឯក្រសួង និងការងារផ្ទាល់ខ្លួនផ្សេងទៀត ក៏លោកប្រមូលយកមកចំណាយក្នុងការផលិតរឿងអស់ដែរ ។
ដូច្នេះហើយទើបលោកបញ្ជាក់ថា សម្រាប់ការផលិតរឿង «ដួងចន្ទដួងចិត្ត» ដែលគ្រោងចំណាយទុនអស់១០ម៉ឺនដុល្លារ និងជារឿងរបស់ទូរទស្សន៍ PNN នេះពិតជាធ្វើឲ្យមិនមានសល់ពេលវេលាសម្រាប់ផ្ទាល់ខ្លួនដូចគ្នាដែរ ។
លោកមុត ថារី ថ្លែងថា «ខ្ញុំមានគម្រោងចំណាយពេល៦ខែសម្រាប់ការផលិតរឿងភាគថ្មីនេះ ដោយក្នុងរយ:ពេលនៃការផលិតនេះ គឺខ្ញុំមិនខុសពីកម្មករកុន ដែលអត់សូម្បីតែពេលវេលាសម្រាប់រឿងរ៉ាវផ្ទាល់ខ្លួនទេ »។
នៅក្នុងរឿងភាគនេះ លោកមុត ថារី បញ្ជាក់ថា លោកបានជ្រើសយកកូនប្រុសឈ្មោះមុត ដារីរិទ្ធីយ៉ា ឲ្យសម្ដែង តែឲ្យសម្ដែងត្រឹមជាតួរងប៉ុណ្ណោះ ។ លោកមិនបានលើកគេឲ្យក្លាយជាតួឯកទេ បើទោះជាកូនប្រុសរបស់លោកធ្លាប់បានសម្ដែងឲ្យផលិតកម្មផ្សេងក្តី ។
លោកមុត ដារីរិទ្ធីយ៉ា អាយុ២៤ ឆ្នាំ កម្ពស់១,៧៥ម៉ែត្រ បញ្ចប់ថ្នាក់វិទ្យាល័យនៅប្រទេសបារាំង បច្ចុប្បន្នជានិស្សិតនៅសាកលវិទ្យាល័យបញ្ញាសាស្ត្រ ៕
ចែករំលែកព័តមាននេះ