រាជធានីភ្នំពេញ ៖ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង លើកទី២ ដែលនឹងប្រព្រឹត្តទៅនៅថ្ងៃទី១០ មករា ឆ្នាំ២០១៨ ខាងមុខនេះ នៅរាជធានីភ្នំពេញ ។…
រាជធានីភ្នំពេញ ៖ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង លើកទី២ ដែលនឹងប្រព្រឹត្តទៅនៅថ្ងៃទី១០ មករា ឆ្នាំ២០១៨ ខាងមុខនេះ នៅរាជធានីភ្នំពេញ ។ កិច្ចប្រជុំកំពូលនេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក លី ខឺឈាង (Li Keqiang) នាយករដ្ឋមន្ត្រីចិន នឹងធ្វើជាសហប្រធានដែលមានមូលបទ «ទន្លេរបស់យើងដើម្បីសន្ដិភាព និងការអភិវឌ្ឍប្រកបដោយចីរភាព»។ នេះបើយោងតាមសេចក្ដីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ។
សេចក្ដីជូនព័ត៌មានដដែលបញ្ជាក់ថា ថ្នាក់ដឹកនាំប្រទេសទាំង៦ នៃកិច្ចសហប្រតិបត្តិការមេគង្គ-ឡានឆាង នឹងពិភាក្សាលើបញ្ហាសំខាន់ៗ ដើម្បីអភិវឌ្ឍន៍អនុតំបន់ទន្លេមេគង្គ ដោយផ្ដោតសំខាន់ទៅលើការតាំងចិត្តក្នុងការរក្សាសន្ដិភាព ស្ថិរភាព ការអភិវឌ្ឍប្រកបដោយចីរភាព និងវិបុលភាពនៃអនុតំបន់ទន្លេមេគង្គ ។
កិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាង លើកទី២នេះ ក៏នឹងផ្ដោតសំខាន់ដល់កិច្ចសហប្រតិបត្តិការអភិវឌ្ឍន៍សេដ្ឋកិច្ច-សង្គមរបស់ប្រទេសអនុតំបន់ ការធ្វើឲ្យប្រសើរឡើងនូវសុខុមាលភាពប្រជាជន ការបំព្រួញគម្លាតអភិវឌ្ឍន៍នៅក្នុងចំណោមប្រទេស ដើម្បីគាំទ្រដល់ការកសាងសហគមន៍អាស៊ាន និងការជំរុញកិច្ចសហប្រតិបត្តិការត្បូង-ត្បូង ដើម្បីរួមចំណែកបន្ថែមទៀតដល់ការអនុវត្តរបៀបវារៈឆ្នាំ២០៣០របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព ។
កិច្ចប្រជុំនេះត្រូវបានរំពឹងទុកថា នឹងអនុម័តឯកសារចំនួន៤ ដូចខាងក្រោម ៖
១-សេចក្ដីថ្លែងការណ៍ទីក្រុងភ្នំពេញនៃកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាងលើកទី២
២-ផែនការសកម្មភាព៥ឆ្នាំនៃកិច្ចសហប្រតិបត្តិការមេគង្គ-ឡានឆាង ២០១៨-២០២២
៣-បញ្ជីរួមនៃគម្រោងកិច្ចសហប្រតិបត្តិការដំណាក់កាលទី២
៤-របាយការណ៍នៃក្រុមការងាររួមតាមវិស័យអាទិភាពទាំង៦ ។
នៅមុនពេលបញ្ចប់កិច្ចប្រជុំនេះ នឹងមានពិធីផ្ទេរតួនាទីប្រធានទៅប្រទេសឡាវ ហើយនឹងបន្ដការធ្វើសន្និសីទសារព័ត៌មានរួមគ្នាដោយសហប្រធានផងដែរ ។
ដោយឡែក នៅថ្ងៃទី៨ ខែមករា ម្សិលមិញ ក្រសួងការបរទេស និងសហប្រតិបត្តិការអន្តរជាតិ ក៏បានចេញសេចក្ដីជូនដំណឹងមួយទៀតដោយក្នុងនោះ បានបញ្ជាក់ថា លោកនាយករដ្ឋមន្ត្រីចិន លី ខឺឈាង នឹងដឹកនាំគណៈប្រតិភូបំពេញទស្សនកិច្ចជាផ្លូវការនៅថ្ងៃទី១១ មករា បន្ទាប់ពីបញ្ចប់កិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង ។
ក្នុងដំណើរទស្សនកិច្ចនេះ លោកនាយករដ្ឋមន្ត្រីនឹងចូលគាល់ព្រះមហាក្សត្រនៃព្រះរាជាណាចក្រកម្ពុជា បន្ទាប់មកនឹងមានកិច្ចប្រជុំទ្វេភាគីជាមួយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
សេចក្ដីជូនដំណឹងបញ្ជាក់ថា បន្ទាប់ពីកិច្ចប្រជុំទ្វេភាគីរួច ថ្នាក់ដឹកនាំនៃប្រទេសទាំងពីរនឹងអញ្ជើញជាអធិបតីក្នុងពិធីចុះហត្ថលេខាលើឯកសារមួយចំនួន ហើយនិងពិធីប្រកាសជាផ្លូវការអំពីគម្រោង «ដំណើរនៃក្ដីស្រឡាញ់ពីបេះដូង» នៅកម្ពុជា, ជំនួយឥតសំណងសម្រាប់គម្រោងសាងសង់មន្ទីរពេទ្យមិត្តភាពកម្ពុជា-ចិន ព្រះកុសុមៈ និងមន្ទីរពេទ្យខេត្តត្បូងឃ្មុំ និងគម្រោងប្លង់ស្ថាបត្យកម្មអាកាសយានដ្ឋានអន្តរជាតិសៀមរាបអង្គរ។
កិច្ចប្រជុំកំពូលនេះ ត្រូវបានគេមើលឃើញថា កម្ពុជានឹងទទួលបានផលចំណេញយ៉ាងច្រើន ពិសេសគឺទាក់ទាញវិនិយោគិនចិនមកបណ្ដាក់ទុនវិនិយោគបន្ថែមទៀតនៅកម្ពុជា។
លោកបណ្ឌិត សុក ស៊ីផាណា ទីប្រឹក្សារាជ រដ្ឋាភិបាលកម្ពុជា បានឲ្យដឹងថា កិច្ចសហការមេគង្គ-ឡានឆាង គឺមានប្រយោជន៍ធំណាស់ សម្រាប់កម្ពុជា ហើយប្រយោជន៍ដែលធំ និងសំខាន់នោះ គឺការបង្កើតការងារឲ្យកូនខ្មែរ តែអ្វីដែលកូនខ្មែរខំប្រឹងដោយខ្លួនឯងនោះ គឺត្រូវមានជំនាញផ្ទាល់ខ្លួនសម្រាប់ធ្វើការងារ ដែលមានតម្លៃខ្ពស់ជាងការងារនាពេលបច្ចុប្បន្ន ។
លោកបន្ដថា ៖« អត្ថប្រយោជន៍ស្នូលសម្រាប់កម្ពុជាពីកិច្ចសហប្រតិបត្តិការនេះគឺការ កៀងគរវិនិយោគទន់ ពីប្រទេសចិន និងប្រទេសជិតខាងឲ្យដាក់ទុនមកប្រទេសកម្ពុជា ព្រោះថាអ្វីដែលកម្ពុជាទទួលបានគឺបង្កើតការងារជូនកូនខ្មែរដែលមានតម្លៃបន្ថែមខ្ពស់។
លោកបញ្ជាក់ថា ៖« បើកម្ពុជាយើងផ្សារភ្ជាប់នៃតំបន់មហាអនុតំបន់មេគង្គនេះ យើងនឹងអាចនាំចេញនូវផលិតផលទៅកាន់បណ្តាប្រទេសនៃមហាអនុតំបន់បានទូលាយ ។ ដូច្នេះវាជាសារសំខាន់មួយដ៏ធំសម្រាប់កម្ពុជា »។
លោក ឈាង វណ្ណារិទ្ធ អនុប្រធានក្រុមប្រឹក្សាភិបាលនៃវិទ្យាស្ថានកម្ពុជា បានឲ្យដឹងថា កិច្ចសហប្រតិបត្តិការនេះ បានផ្ដល់លទ្ធភាពដល់ប្រទេសដែលជាប់តំបន់ទន្លេមេគង្គ ជាពិសេសនោះ គឺការកសាងហេដ្ឋារចនាសម្ព័ន្ធដើម្បីតភ្ជាប់នៃតំបន់មហាអនុតំបន់ទន្លេមេគង្គក្នុងការផ្លាស់ប្ដូរទំនិញរវាងគ្នានិងគ្នា ៕
ចែករំលែកព័តមាននេះ