រាជធានីភ្នំពេញ ៖ ពិធីបុណ្យឆ្លងឆ្នាំសកល ឆ្នាំនេះ ភ្ញៀវទេសចរជាតិ និងអន្តរជាតិ បានចេញដំណើរកម្សាន្ដ ទាំងទឹកមុខសប្បាយរីករាយ ទៅកាន់គោលដៅនានានៅទូទាំងប្រទេស ក្នុងនោះនៅតំបន់ឆ្នេរ បានកើនឡើងគួរឲ្យកត់សម្គាល់ ។
ប្រធានមន្ទីរទេសចរណ៍ខេត្តកំពត លោកសយ ស៊ីណុល បានថ្លែងឲ្យដឹងតាមទូរស័ព្ទកាលពីព្រឹកថ្ងៃទី១ មករា ឆ្នាំ២០១៨ ថា ភ្ញៀវទេសចរជាតិ អន្តរជាតិប្រមាណ៨ម៉ឺននាក់ បានទៅទស្សនា និងលេងកម្សាន្ដក្នុងខេត្តកំពត កើនឡើងប្រមាណ៤% បើធៀបរយៈពេលដូចគ្នាកាលពីឆ្នាំមុន ក្នុងនោះមានភ្ញៀវទេសចរអន្តរជាតិមានចំនួន១.៤០០នាក់ ។
លោកបន្តថា ខេត្តកំពតទទួលបានភ្ញៀវទេសចរជាតិ និងអន្ដរជាតិប្រមាណ១,៦លាននាក់ កាលពីឆ្នាំ២០១៧កន្លងមកថ្មីៗនេះ ។
លោកបន្តថា ៖« ភ្ញៀវទេសចរបានមកទស្សនាក្នុងខេត្តយ៉ាងកកកុញ និងបន្តដល់ថ្ងៃនេះ (ថ្ងៃទី១ មករា) ខណៈរមណីយដ្ឋានក្នុងខេត្តបានកើនឡើងដល់១៤កន្លែង និងមានសណ្ឋាគារ ព្រមទាំងផ្ទះសំណាក់ជាច្រើនពាន់បន្ទប់ »។
រីឯខេត្តព្រះសីហនុវិញ លោកតាំង សុចិត្រគ្រឹស្នា ប្រធានមន្ទីរទេសចរណ៍ខេត្តបានឲ្យដឹងផងដែរថា ខេត្តព្រះសីហនុឆ្នាំនេះ ទទួលបានភ្ញៀវទេសចរប្រហាក់ប្រហែលឆ្នាំមុនៗដែរ ប៉ុន្តែបញ្ហាប្រឈមគឺកង្វះបន្ទប់គេង ដែលភ្ញៀវមួយចំនួនបានសម្រាកនៅមាត់សមុទ្រ និងត្រលប់ទៅលំនៅឋានវិញ ទោះបីជាចំនួនបន្ទប់សណ្ឋាគារ និងផ្ទះសំណាក់បានកើនឡើងប្រមាណ១ម៉ឺនបន្ទប់ក្តី ក៏មិនទាន់គ្រប់តម្រូវការដែរ ។
លោកបន្តថា ៖« យើងរំពឹងថានៅឆ្នាំថ្មីនេះ មានសណ្ឋាគារជាច្រើនទៀតបញ្ចប់ការសាងសង់ និងដាក់ឲ្យដំណើរការបន្ថែមទៀត ដើម្បីជាការឆ្លើយតបនឹងកំណើនទេសចរក្នុងខេត្តនេះ »។
ចំណែកទឹកដីខេត្តកោះកុងឯណោះវិញ ចំនួនភ្ញៀវទេសចរទៅទស្សនាខេត្តនេះមានប្រមាណ១ម៉ឺននាក់ ជាចំនួនប្រហាក់ប្រហែលនឹងឆ្នាំមុន ដែរ។ នេះបើតាមលោក ប៊ុន ទៀន ប្រធានមន្ទីរទេសចរណ៍ខេត្តនេះ ។
លោកបន្តថា ខេត្តកោះកុងបច្ចុប្បន្នមានសណ្ឋាគារចំនួន៨ និងមានផ្ទះសំណាក់ជាង៦០ ដែលមានបន្ទប់សរុបជាង១.៤០០បន្ទប់ សម្រាប់ទទួលភ្ញៀវទេសចរជាតិ និងអន្តរជាតិ ។
ខេត្តនេះមានសហគមន៍ទេសចរណ៍ចំនួន៥ ដែលបាននិងកំពុងទាក់ទាញភ្ញៀវទេសចរជាតិ អន្តរជាតិទៅទស្សនាកម្សាន្ដ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា ចំនួនភ្ញៀវទេសចរទៅទស្សនាតាមរមណីយដ្ឋាននានា បាននិងកំពុងកើនឡើង ហើយអ្វីលោកកត់សម្គាល់នោះ គឺឃើញថា ចំនួនភ្ញៀវបានចាប់ផ្តើមងាកទៅកាន់តំបន់ធម្មជាតិច្រើន ដោយពួកគេដើរកម្សាន្ដជាលក្ខណៈគ្រួសារ និងបោះតង់នៅតាមព្រៃនានា ។
លោកបន្តថា ៖« ទោះជាភ្ញៀវកើនឡើងក្តី ប៉ុន្តែបាតុភាពការដំឡើងថ្លៃពីសេវាកម្មទេសចរណ៍នានា មិនមានអ្វីគួរឲ្យកត់គម្លាល់ទេ ដោយសារមានការយល់ដឹង និងមានការចូលរួមពីប្រតិបត្តិករនានាកាន់តែច្រើន »។
រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា ចំនួនភ្ញៀវទេសចរជាតិ និងអន្តរជាតិបានទៅទស្សនានៅតាមរមណីយដ្ឋាននានានៅទូទាំងប្រទេស កើនឡើងខ្លាំងណាស់ ដែលជាការឆ្លុះបញ្ចាំងពីការកើនឡើងនូវប្រាក់ចំណូលរបស់ប្រជាពលរដ្ឋ ។
លោកបន្តថា ប្រជាជនចេញទៅទស្សនានៅក្រៅប្រទេសក៏បានកើនឡើងដែរ ដោយសារពួកគេមានជីវភាពល្អប្រសើរ និងតម្លៃសុខសន្តិភាពដែលកម្ពុជាទទួលបាន ។
លោកបន្តថា ៖« នេះជាតម្លៃនៃស្ថិរភាពនយោបាយ និងសុខសន្តិភាព ដែលផ្តល់ឱកាសឲ្យប្រជាពលរដ្ឋអាចដើរកម្សាន្ដសប្បាយ ព្រោះបើគ្មានសុខសន្តិភាពទេ ពួកគេក៏មិនអាចរកចំណូលបានដែរ »៕
ចែករំលែកព័តមាននេះ