ខេត្តមណ្ឌលគិរី ៖ អភិបាលខេត្តមណ្ឌលគិរី បានដឹកនាំមន្ត្រីរាជការជុំវិញខេត្ត ចុះចែកមួកការពារសុវត្ថិភាពចំនួន១០០សម្រាប់ ដល់ប្រជាពលរដ្ឋដែលធ្វើចរាចរតាមទ្រូងផ្លូវ ដែលភាគច្រើនពួកគាត់ជិះម៉ូតូមិនមានពាក់មួកការពារ ។ យុទ្ឋនាការចែកមួកសុវត្ថិភាពដល់អ្នកធ្វើដំណើរដោយទោចក្រយានយន្តនេះ បានធ្វើឡើងនៅរង្វង់មូលគោព្រៃ…
ខេត្តមណ្ឌលគិរី ៖ អភិបាលខេត្តមណ្ឌលគិរី បានដឹកនាំមន្ត្រីរាជការជុំវិញខេត្ត ចុះចែកមួកការពារសុវត្ថិភាពចំនួន១០០សម្រាប់ ដល់ប្រជាពលរដ្ឋដែលធ្វើចរាចរតាមទ្រូងផ្លូវ ដែលភាគច្រើនពួកគាត់ជិះម៉ូតូមិនមានពាក់មួកការពារ ។
យុទ្ឋនាការចែកមួកសុវត្ថិភាពដល់អ្នកធ្វើដំណើរដោយទោចក្រយានយន្តនេះ បានធ្វើឡើងនៅរង្វង់មូលគោព្រៃ ក្នុងក្រុងសែនមនោរម្យ កាលពីព្រឹកថ្ងៃទី២៨ ខែធ្នូ ឆ្នាំ២០១៧ ដោយមានការចូលរួមពីមន្ត្រីអាជ្ញាធរពាក់ព័ន្ឋជាច្រើនរូប ។
លោក ស្វាយ សំអ៊ាង អភិបាលខេត្តមណ្ឌលគិរីបានថ្លែងថា ដើម្បីចូលរួមកាត់បន្ថយនូវគ្រោះថ្នាក់ចរាចរ ដែលកើតមានជារៀងរាល់ថ្ងៃ ធ្វើឲ្យមានប្រជាពលរដ្ឋរងគ្រោះរហូតដល់បាត់បង់ជីវិត ដោយសារតែមិនមានពាក់មួកការពារសុវត្ថិភាព ។ អភិបាលខេត្តបន្តថា សកម្មភាពចុះចែកមួកដល់អ្នកបញ្ជាទោចក្រយានយន្តនាពេលនេះ គឺជាការដាស់ស្មារតីដល់អ្នកបើកបរទាំងឡាយ ឲ្យមានការប្រុងប្រយ័ត្នលើបញ្ហាសុវត្ថិភាពក្នុងពេលបើកបរ ព្រោះនៅពេលមានការប៉ះទង្គិចដោយប្រការណាមួយ មួកសុវត្ថិភាពអាចការពារក្បាលរបស់អ្នក ពីគ្រោះថ្នាក់ទាំងនោះបានយ៉ាងមានប្រសិទ្ឋភាព ។
លោក ម៉ៅ ធនារក្ស ប្រធានមន្ទីរសាធារណៈការ នឹងដឹកជញ្ជូនខេត្ត បានឲ្យដឹងថា យុទ្ឋនាការនេះក្រៅពីចែកមួកជូនដល់ប្រជាពលរដ្ឋនឹងអ្នកដំណើរ មន្ត្រីជំនាញនឹងសមត្ថកិច្ចផ្នែកចរាចរណ៍ ក៏បានអប់រំផ្សព្វផ្សាយ ដល់អ្នកធ្វើចរាចរតាមទ្រូងផ្លូវទាំងឡាយ ត្រូវប្រកាន់ភ្ជាប់នូវស្មារតីប្រុងប្រយ័ត្ន យោគយល់អធ្យាស្រ័យ នឹងគោរពច្បាប់ចរាចរណ៍ឲ្យបានខ្ជាប់ខ្ជួន មិនត្រូវបើកបរលើសល្បឿនកំណត់ ។
លោក ម៉ៅ ធនារក្ស ក៏បានបញ្ជាក់ដែរថា ការធ្វើសកម្មភាពចែកមួកនេះ គឺបានធ្វើរួមគ្នាទូទាំងប្រទេសក្នុងថ្ងៃតែមួយ លើការឡើងកម្ពស់សុវត្ថិភាពរបស់អ្នកដំណើរ បង្ការគ្រោះថ្នាក់នានា ដែលកើតមានជាយថាហេតុ ជាពិសេសចំពោះអ្នកបើកបរម៉ូតូដែលមិនពាក់មួកការពារ ឲ្យមានស្មារតីប្រុងប្រយ័ត្នជានិច្ច ជាពិសេសត្រូវពាក់មួកគ្រប់ពេលធ្វើដំណើរ ៕
ចែករំលែកព័តមាននេះ